សិក្ខាសាលានេះ រៀបចំឡើងក្នុងគោលបំណងឆ្លុះបញ្ចាំង និងចែករំលែកនូវសមិទ្ធផលសំខាន់ៗដែលសម្រេចបាន ព្រមទាំងវឌ្ឍនភាពការងារនាពេលកន្លងមក។ លើសពីនេះ អង្គសិក្ខាសាលាក៏បានចងក្រងនូវមេរៀនបទពិសោធន៍ បញ្ហាប្រឈម និងប្រមូលអនុសាសន៍សំខាន់ៗ ដើម្បីយកទៅប្រើប្រាស់ជាមូលដ្ឋានគ្រឹះក្នុងការជំរុញការអនុវត្ត «គម្រោងរដ្ឋបាលមូលដ្ឋាន និងការប្រែប្រួលអាកាសធាតុ ដំណាក់កាលទី៣ (LGCC-3)» ដែលគាំទ្រថវិកាដោយមូលនិធិអាកាសធាតុបៃតង (GCF) ឱ្យកាន់តែមានប្រសិទ្ធភាព និងនិរន្តរភាព។

គួររំលឹកផងដែរថា «គម្រោងបន្ស៊ាំនឹងការប្រែប្រួលអាកាសធាតុនៅថ្នាក់មូលដ្ឋាន (LoCAL)» ទទួលបានការគាំទ្រថវិកា និងបច្ចេកទេសពីមូលនិធិ UNCDF ដោយបានដាក់ឱ្យអនុវត្តនៅក្នុងស្រុកគោលដៅចំនួន ១៥ នៃខេត្តបាត់ដំបង ខេត្តពោធិ៍សាត់ និងខេត្តព្រះវិហារ។ គម្រោងនេះបានដើរតួនាទីយ៉ាងសំខាន់ក្នុងការផ្តល់ជំនួយបច្ចេកទេសដល់លេខាធិការដ្ឋាន គ.ជ.អ.ប. និងគាំទ្ររដ្ឋបាលថ្នាក់ក្រោមជាតិ ក្នុងការរៀបចំផែនការបន្ស៊ាំនឹងការប្រែប្រួលអាកាសធាតុ ព្រមទាំងពង្រឹងការគ្រប់គ្រង ការតាមដានត្រួតពិនិត្យ និងគណនេយ្យភាពនៅថ្នាក់មូលដ្ឋាន។

នៅក្នុងឱកាសនោះដែរ បន្ទាប់ពីការចាក់បញ្ចាំងវីដេអូបង្ហាញពីសមិទ្ធផលគម្រោង អង្គសិក្ខាសាលាក៏បានបើកវេទិកាពិភាក្សាយ៉ាងផុសផុលលើប្រធានបទសំខាន់ៗចំនួន ២ ៖

• វេទិកាពិភាក្សាទី១៖ «ការបន្សំនឹងការប្រែប្រួលអាកាសធាតុនៅថ្នាក់មូលដ្ឋាន និងឱកាសក្នុងការលើកកម្ពស់ការបន្ស៊ាំទៅនឹងការប្រែប្រួលអាកាសធាតុ» ដែលមានការចូលរួមពីវាគ្មិនកិត្តិយស រួមមាន លោក កែវ ប៊ុនលី អ្នកជំនាញការប្រែប្រួលអាកាសធាតុ, UNCDF លោកស្រី ទេព កេតស៊ីនី ប្រធានផ្នែកគោលនយោបាយ ត្រួតពិនិត្យតាមដាន វាយតម្លៃ និងផែនការ នៃអគ្គលេខាធិការដ្ឋានសមាគមក្រុមប្រឹក្សារដ្ឋបាលថ្នាក់ក្រោមជាតិ(ASAC) លោក សឿង សារឿន នាយកប្រតិបត្តិនៃអង្គការ NGO Foru និងលោក កើត ណាវី អ្នកសម្របសម្រួលគម្រោងរបស់អង្គការមជ្ឈមណ្ឌលអភិវឌ្ឍន៍កុមារ និងស្ត្រីនៅកម្ពុជា (CWDCC)។

• វេទិកាពិភាក្សាទី២៖ «ការផ្តល់ហិរញ្ញប្បទានអាកាសធាតុដល់រដ្ឋបាលថ្នាក់ក្រោមជាតិ និងការវិនិយោគដោយរដ្ឋាភិបាល វិស័យឯកជន និងប្រភពផ្សេងៗ» ដែលមានការចូលរួមពីវាគ្មិនកិត្តិយស រួមមាន លោក គឹម ចាន់បញ្ញា អភិបាលរងខេត្តព្រះវិហារ លោកស្រី ប៊ិន បូឡែន អភិបាលស្រុករុក្ខគិរី លោក ស៊ា ស៊ី មេឃុំបាសាក់ លោក ឈៀង វាសនា អាជីវករទឹកស្អាតបានស័ក្តិ។

តាមរយៈលទ្ធផលនៃសិក្ខាសាលានេះ ភាគីពាក់ព័ន្ធទាំងអស់បានវាយតម្លៃខ្ពស់ចំពោះសមិទ្ធផលដែលសម្រេចបាន និងបានប្តេជ្ញាចិត្តយ៉ាងមុតមាំក្នុងការបន្តកិច្ចសហការឱ្យកាន់តែជិតស្និទ្ធ ដោយបំលែងនូវរាល់អនុសាសន៍ និងមេរៀនបទពិសោធន៍ទាំងនេះទៅជាសកម្មភាពជាក់ស្តែង ក្នុងទិសដៅជំរុញការងារឆ្លើយតបនឹងការប្រែប្រួលអាកាសធាតុនៅកម្ពុជា ឱ្យកាន់តែរីកចម្រើនប្រកបដោយបរិយាបន្ន និងនិរន្តរភាពនានាពេលអនាគត៕