តើអ្វីទៅជាគណនេយ្យភាពសង្គម?

១. សេចក្តីផ្តើម

ការងារគណនេយ្យភាពសង្គម គឺជាការងារដ៏ចាំបាច់មួយនៃកំណែទម្រង់វិមជ្ឈការ និងវិសហមជ្ឈការ។ ការរៀបចំ និងការអនុវត្តការងារគណនេយ្យភាពសង្គម គឺដើម្បី (១) បង្កលក្ខណៈងាយស្រួលជូនប្រជាពលរដ្ឋក្នុងការទទួលបានព័ត៌មានចាំបាច់នានាពីរដ្ឋបាលថ្នាក់ក្រោមជាតិ និងអង្គភាពផ្តល់សេវានានានៅតាមមូលដ្ឋាន (២) ជំរុញលើកទឹកចិត្តឱ្យប្រជាពលរដ្ឋចូលរួមផ្តល់យោបល់ត្រឡប់ និងគំនិតផ្តួចផ្តើមនានាជូនដល់រដ្ឋបាលថ្នាក់ក្រោមជាតិ និងអង្គភាពផ្តល់សេវាអំពីវិធានការ ឬមធ្យោបាយនានាដែលត្រូវផ្តល់ការយកចិត្តទុកដាក់ក្នុងការកែលម្អទាំងប្រសិទ្ធភាព និងគុណភាពសេវា និង (៣) ពង្រឹងការចូលរួមរបស់ប្រជាពលរដ្ឋក្នុងការតាមដាន ត្រូតពិនិត្យ និងវាយតម្លៃលើការបំពេញការងារ និងការផ្តល់សេវារបស់រដ្ឋបាលថ្នាក់ក្រោមជាតិ និងអង្គភាពផ្តល់សេវានានា។

ការងារនេះ ត្រូវបានចាប់ផ្តើមតាមរយៈការរៀបចំ និងដាក់ឱ្យអនុវត្តផែនការយុទ្ធសាស្រ្តស្តីពីការងារគណនេយ្យភាពសង្គមក្នុងឆ្នាំ២០១៣ ដោយ គ.ជ.អ.ប. និងបានអនុវត្តសាកល្បងរយៈពេល២ឆ្នាំ ចាប់ពីឆ្នាំ២០១៤-២០១៥។ ឆ្លងតាមការប្រមូលចងក្រងមេរៀនបទពិសោធន៍ដែលទទួលបានពីការអនុវត្តសាកល្បងការងារគណនេយ្យភាពសង្គមនេះ គ.ជ.អ.ប. បានដាក់ចេញនូវផែនការអនុវត្តគណនេយ្យភាពសង្គម ដំណាក់កាលទី១ រយៈពេល៣ឆ្នាំ (២០១៦-២០១៨) ដែលផ្តោតលើសេវានៅមូលដ្ឋានចំនួន០៣គឺ៖

ការបំពេញការងាររបស់ក្រុមប្រឹក្សាឃុំ
ការផ្តល់សេវានៅសាលាបឋមសិក្សា
ការផ្តល់សេវានៅមណ្ឌលសុខភាព

បន្ទាប់មកផែនការអនុវត្តគណនេយ្យភាពសង្គមដំណាក់កាលទី២ រយៈពេល៥ឆ្នាំ (២០១៩-២០២៣) ក៏ត្រូវបានអនុម័ត និងដាក់ឱ្យប្រើប្រាស់ជាផ្លូវការរួមគ្នារវាងភាគីរដ្ឋ (ដែលរួមមានតំណាងក្រសួង ស្ថាប័នពាក់ព័ន្ធ) និងភាគីអង្គការសង្គមស៊ីវិលនៅក្នុងឆ្នាំ២០១៩។ ក្នុងនោះផងដែរ ផែនការអនុវត្តគណនេយ្យភាពសង្គមដំណាក់កាលទី២ ត្រូវបានឯកភាពដោយ សម្តេចក្រឡាហោម ស ខេង ក្នុងការពន្យាពេលអនុវត្តរហូតដល់ឆ្នាំ២០២៥ ដើម្បីសម្រេចឱ្យបានគោលបំណង និងគោលដៅរបស់ខ្លួន និងឱ្យស្របតាមក្របខ័ណ្ឌពេលវេលានៃផែនការអនុវត្តរយៈពេល៥ឆ្នាំ ដំណាក់កាលទី១ (២០២១-២០២៥) នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ របស់រាជរដ្ឋាភិបាលកម្ពុជា។

២. តំបន់គោលដៅអនុវត្ត និងការពង្រីកវិសាលភាពសេវា

ការអនុវត្តការងារគណនេយ្យភាពសង្គមបាន និងកំពុងអនុវត្តនៅក្នុងក្រុង ស្រុក ខណ្ឌគោលដៅចំនួន១៩០ នៃរាជធានី ខេត្តចំនួន២៥ ដោយគ្របដណ្តប់លើការផ្តល់សេវារបស់រដ្ឋបាលឃុំ សង្កាត់ចំនួន១.៥៥០ ស្មើនឹង៩៤% នៃឃុំ សង្កាត់ទូទាំងប្រទេស សាលាបឋមសិក្សាចំនួន៦.៩២២ ស្មើនឹង៩៤% នៃសាលាបឋមសិក្សាទូទាំងប្រទេស មណ្ឌលសុខភាពចំនួន១.២៥៦ ស្មើនឹង៩៦% នៃមណ្ឌលសុខភាពទូទាំងប្រទេស និងការផ្តល់សេវារបស់រដ្ឋបាលក្រុង ស្រុក ខណ្ឌចំនួន៥៤ ស្មើនឹង២៦% នៃក្រុង ស្រុក ខណ្ឌទូទាំងប្រទេស។

តារាងតំបន់គោលដៅនិងការគ្របដណ្តប់លើសេវានៃការអនុវត្តការងារគណនេយ្យភាពសង្គម

បរិយាយ	ចំនួនទូទាំងប្រទេស	ដំណាក់កាលទី១	ដំណាក់កាលទី២ (គិតត្រឹម២០២៥)
បរិយាយ	ចំនួនទូទាំងប្រទេស	ដំណាក់កាលទី១	ចំនួន	ភាគរយ
តំបន់គោលដៅអនុវត្ត
រាជធានី ខេត្ត	២៥	១៨	២៥	១០០%
ក្រុង ស្រុក ខណ្ឌ	២១០	៩៨	១៩០	៩០%
គ្របដណ្តប់លើសេវា
ឃុំ សង្កាត់	១.៦៥២	៨២៧	១.៥៥០	៩៤%
សាលាបឋមសិក្សា	៧.៧២១	៤.១០៦	៦.៩២២	៩៤%
មណ្ឌលសុខភាព	១.៣១៣	៦០៥	១.២៥៦	៩៦%
រដ្ឋបាលក្រុង ស្រុក ខណ្ឌ	២១០	០	៥៤	២៦%

ក្នុងនោះផងដែរ ការអនុវត្តការងារគណនេយ្យភាពសង្គម ដំណាក់កាលទី២ លេខាធិការដ្ឋាន គ.ជ.អ.ប. បានទទួលការគាំទ្រថវិកាពីរដ្ឋាភិបាលស្វីស រដ្ឋាភិបាលអាល្លឺម៉ង់ និងរដ្ឋាភិបាលអូស្រ្តាលីតាមរយៈមូលនិធិបរធនបាលកិច្ច (Trust Fund) ដែលសម្របសម្រួលដោយធនាគារពិភពលោក ដោយបាននឹងកំពុងអនុវត្តនៅក្នុងនៅក្នុងក្រុង ស្រុក ខណ្ឌគោលដៅចំនួន១០៣ នៃរាជធានី ខេត្តចំនួន២០ ដោយគ្របដណ្តប់លើការផ្តល់សេវារបស់រដ្ឋបាលឃុំ សង្កាត់ចំនួន៨៦២ ស្មើនឹង៥២% នៃឃុំ សង្កាត់ទូទាំងប្រទេស សាលាបឋមសិក្សាចំនួន៣.៩២២ ស្មើនឹង៥១% នៃសាលាបឋមសិក្សាទូទាំងប្រទេស មណ្ឌលសុខភាពចំនួន៧០២ ស្មើនឹង៥៣% និង ការផ្តល់សេវារបស់រដ្ឋបាលក្រុង ស្រុក ខណ្ឌចំនួន២០ ស្មើនឹង១០% នៃក្រុង ស្រុក ខណ្ឌទូទាំងប្រទេស។

តារាងតំបន់គោលដៅនិងការគ្របដណ្តប់លើសេវានៃការអនុវត្តគម្រោង

បរិយាយ	ចំនួនទូទាំងប្រទេស	ដំណាក់កាលទី២ (គិតត្រឹម២០២៥)
បរិយាយ	ចំនួនទូទាំងប្រទេស	ចំនួន	ភាគរយ
តំបន់គោលដៅអនុវត្ត
រាជធានី ខេត្ត	២៥	២០	៨០%
ក្រុង ស្រុក ខណ្ឌ	២១០	១០៣	៦២%
គ្របដណ្តប់លើសេវា
ឃុំ សង្កាត់	១.៦៥២	៨៦២	៥២%
សាលាបឋមសិក្សា	៧.៧២១	៣.៩២២	៥១%
មណ្ឌលសុខភាព	១.៣១៣	៧០២	៥៣%
រដ្ឋបាលក្រុង ស្រុក ខណ្ឌ	២១០	២០	១០%

៣. កិច្ចសហការសម្របសម្រួល ដៃគូអនុវត្ត និងដៃគូអភិវឌ្ឍន៍

ការអនុវត្តការងារគណនេយ្យភាពសង្គម ត្រូវការជាចាំបាច់នូវកិច្ចសហការក្នុងភាពជាដៃគូរវាងផ្នែក ផ្គត់ផ្គង់ (ភាគីរដ្ឋ) ដែលមានក្រសួង ស្ថាប័នថ្នាក់ជាតិ រដ្ឋបាលថ្នាក់ក្រោមជាតិ និងអង្គភាពផ្តល់សេវា និងផ្នែកតម្រូវការ (ភាគីមិនមែនរដ្ឋ) ដែលជាប្រជាពលរដ្ឋ ដោយមានការសម្របសម្រួលដោយអង្គការសង្គមស៊ីវិល។

៣.‌១. ការគ្រប់គ្រង

គណៈកម្មាធិការដឹកនាំការងារគណនេយ្យភាពសង្គមមួយត្រូវបានបង្កើតឡើងដោយ គ.ជ.អ.ប. ដែលមានសមាជិកសរុបចំនួន១៩រូប (តំណាងក្រសួង ស្ថាប័នរាជរដ្ឋាភិបាលចំនួន១០រូប និងអង្គការសង្គមស៊ីវិលចំនួន០៩រូប) ព្រមទាំងមានដៃគូអភិវឌ្ឍន៍ចំនួន០៧ជាអ្នកសង្កេតការណ៍។

គ.គ.អ.ស. មានសមាសភាពដូចខាងក្រោម

ឯកឧត្តមរដ្ឋលេខាធិការក្រសួងមហាផ្ទៃ និងជាសមាជិក គ.ជ.អ.ប.	ជាប្រធាន
ឯកឧត្តមអនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គ.ជ.អ.ប.	ជាអនុប្រធាន
តំណាងអង្គការសង្គមស៊ីវិលមួយរូប	ជាអនុប្រធាន
តំណាងលេខាធិការដ្ឋាន គ.ជ.អ.ប.	ជាសមាជិក
តំណាងក្រសួងមហាផ្ទៃ	ជាសមាជិក
តំណាងក្រសួងសេដ្ឋកិច្ច និងហិរញ្ញវត្ថុ	ជាសមាជិក
តំណាងក្រសួងអប់រំ យុវជន និងកីឡា	ជាសមាជិក
តំណាងក្រសួងសុខាភិបាល	ជាសមាជិក
តំណាងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍	ជាសមាជិក
តំណាងក្រសួងសាធារណការ និងដឹកជញ្ជូន	ជាសមាជិក
តំណាងក្រសួងផែនការ	ជាសមាជិក
តំណាងអង្គការសង្គមស៊ីវិលដៃគូអនុវត្តការងារគណនេយ្យភាពសង្គម ០៨រូប	ជាសមាជិក

គ.គ.អ.ស. បង្កើតឡើងក្នុងគោលបំណង ដើម្បីផ្តល់វេទិកាសម្រាប់កិច្ចពិភាក្សា ដោះស្រាយបញ្ហា និងធ្វើសេចក្តីសម្រេចចិត្តលើការរៀបចំគោលនយោបាយ ផែនការសកម្មភាព និងថវិកា ការកំណត់តំបន់គោលដៅ និងនីតិវិធីគាំទ្រការអនុវត្តការងារគណនេយ្យភាពសង្គមនៅថ្នាក់ជាតិ និងក្រោមជាតិ ព្រមទាំងមានរបបប្រជុំជាទៀតទាត់ប្រចាំឆមាស។

៣.២. ផ្នែកផ្គត់ផ្គង់

ថ្នាក់ជាតិ៖ លេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងអប់រំ យុវជន និងកីឡា ក្រសួងសុខាភិបាល ក្រសួងផែនការ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងក្រសួងសាធារណការ និងដឹកជញ្ជូន។
រដ្ឋបាលថ្នាក់ក្រោមជាតិ៖ ក្រុមការងារគណនេយ្យភាពសង្គមថ្នាក់រាជធានី ខេត្ត ក្រុង ស្រុក ខណ្ឌ មន្រ្តីបង្គោលគណនេយ្យភាពសង្គមនៃអង្គភាពផ្តល់សេវាទាំងបី រួមមាន រដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាព។

៣.៣. ផ្នែកតម្រូវការ

ប្រជាពលរដ្ឋ
អង្គការសង្គមស៊ីវិល៖ ការអនុវត្តការងារគណនេយ្យភាពសង្គម ដំណាក់កាលទី២ នេះ លេខាធិការដ្ឋាន គ.ជ.អ.ប. បានចុះអនុស្សារណៈយោគយល់ជាមួយអង្គការសង្គមស៊ីវិលចំនួន៤ រួមមាន៖ ១). អង្គការទស្សនៈពិភពលោកអន្តរជាតិប្រចាំកម្ពុជា ២). អង្គការឃែរអន្តរជាតិ ៣). អង្គការ FHI 360 និង ៤). អង្គការអុកស្វាមប្រចាំកម្ពុជា ព្រមទាំងមានអង្គការដៃគូអនុវត្តនៅមូលដ្ឋានចំនួន២៩ ដោយគ្របដណ្តប់នៅក្នុងរដ្ឋបាលឃុំ សង្កាត់ចំនួន ១.២៩៨ ស្មើនឹង៧៩% ទូទាំងប្រទេស នៃរដ្ឋបាលក្រុង ស្រុក ខណ្ឌគោលដៅចំនួន១៦៦ ក្នុងរាជធានី ខេត្តទាំង២៥។ នៅក្នុងឆ្នាំ២០២៥ នេះ ការអនុវត្តការងារគណនេយ្យភាពសង្គមផ្នែកតម្រូវការនៅមានការគាំទ្រតែអង្គការទស្សនៈពិភពលោកមួយប៉ុណ្ណោះ ដែលនៅបន្តអនុស្សារណៈយោគយល់ជាមួយលេខាធិការដ្ឋាន គ.ជ.អ.ប. ដោយគ្របដណ្តប់នៅក្នុងរដ្ឋបាលឃុំ សង្កាត់ចំនួន១.០៦៥ ស្មើនឹង៦៤% នៃក្រុង ស្រុក ខណ្ឌគោលដៅចំនួន១២៧ ក្នុងរាជធានី ខេត្តចំនួន២១។
អ្នកសម្របសម្រួលគណនេយ្យភាពសហគមន៍ (CAF)៖ ជាយុវជនស្ម័គ្រចិត្តនៅថ្នាក់ឃុំ សង្កាត់ ដែលត្រូវបានជ្រើសរើសដើម្បីធ្វើជួយសម្របសម្រួលការងារគណនេយ្យភាពសង្គមនៅតាមសហគមន៍។

៣.៤. ដៃគូអភិវឌ្ឍន៍

នៅក្នុងផែនការអនុវត្តគណនេយ្យភាពសង្គម ដំណាក់កាលទី២ (២០១៩-២០២៥) នេះ លេខាធិការដ្ឋាន គ.ជ.អ.ប. និងអង្គការទស្សនៈពិភពលោក បានទទួលការគាំទ្រថវិកា ពីមូលនិធិបរធនបាលកិច្ច (Trust Fund) ចំនួនប្រមាណ២០ លានដុល្លារអាមេរិក ដែលគ្រប់គ្រងដោយធនាគារពិភពលោក ដោយមានការចូលរួមថវិកាពីដៃគូអភិវឌ្ឍន៍ចំនួន០៣រួមមាន៖

រដ្ឋាភិបាលអាល្លឺម៉ង់ ចំនួនប្រមាណ ៥ លានអឺរ៉ូ។
រដ្ឋាភិបាលស្វីស ចំនួនប្រមាណ ៤ លានដុល្លារអាមេរិក។
រដ្ឋាភិបាលអូស្រ្តាលី ចំនួនប្រមាណ ១៥ លានដុល្លារអូស្រ្តាលី។

ទន្ទឹមនឹងនេះ ក៏មានដៃគូអភិវឌ្ឍន៍ចំនួន០២ផ្សេងទៀតបានគាំទ្រថវិកាដល់អង្គការសង្គមស៊ីវិលមួយចំនួនក្នុងការអនុវត្តការងារគណនេយ្យភាពសង្គម ដែលរួមមាន៖ សហភាពអឺរ៉ុប គាំទ្រថវិកាដល់អង្គការឃែរអន្តរជាតិប្រចាំកម្ពុជា ចំនួនប្រមាណ២,៨៦ លានដុល្លារអាមេរិក និង ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) គាំទ្រថវិកាដល់អង្គការសុខភាពគ្រួសារអន្តរជាតិប្រចាំកម្ពុជា (FHI 360) ចំនួនប្រមាណ១៧ លានដុល្លារអាមេរិក។

៤. ការអនុវត្តសកម្មភាពគណនេយ្យភាពសង្គមនៅថ្នាក់ក្រោមជាតិ

ការងារគណនេយ្យភាពសង្គមត្រូវអនុវត្តទៅតាមវដ្តនៃសកម្មភាពគណនេយ្យភាពសង្គមប្រចាំឆ្នាំ។ វដ្តសកម្មភាព នៃការអនុវត្តការងារគណនេយ្យភាពសង្គម ត្រូវបានបែងចែកជា០៣ដំណាក់កាលគឺ៖

តម្លាភាព ភាពងាយទទួលបានព័ត៌មាននានា និងព័ត៌មានថវិកា
ការត្រួតពិនិត្យតាមដានដោយប្រជាពលរដ្ឋ
ការអនុវត្ត ត្រួតពិនិត្យ និងវាយតម្លៃ ផ.ស.រ.គ.

ដំណាក់កាលនីមួយៗបែងចែកជាសកម្មភាព ឬជំហានសំខាន់ៗដូចខាងក្រោម៖

ដំណាក់កាល	ជំហាន	ក្របខ័ណ្ឌពេលវេលា
១. តម្លាភាព ភាពងាយទទួលបានព័ត៌មាននានា និងព័ត៌មានថវិកា	១, ការប្រមូលទិន្នន័យ	មករា-មីនា
	២, ការបញ្ចូលទិន្នន័យ	មករា-មីនា
	៣, ការផលិតទិន្នន័យលទ្ធផលការងារ	មករា-មីនា
	៤, ការរៀបចំ និងផ្សព្វផ្សាយកញ្ចប់ព័ត៌មានសម្រាប់ប្រជាពលរដ្ឋ	មករា-មីនា
២.ការត្រួតពិនិត្យតាមដានដោយប្រជាពលរដ្ឋ	៥,ការពិនិត្យវាយតម្លៃអំពីលទ្ធផលការងារ	មេសា-កក្កដា
២.ការត្រួតពិនិត្យតាមដានដោយប្រជាពលរដ្ឋ	៦, ការរៀបចំ ផ.ស.រ.គ.	មេសា-កក្កដា
៣. ការអនុវត្ត ត្រួតពិនិត្យ និងវាយតម្លៃ ផ.ស.រ.គ.	៧, ការអនុវត្ត ផ.ស.រ.គ.	មករា-ធ្នូ
៣. ការអនុវត្ត ត្រួតពិនិត្យ និងវាយតម្លៃ ផ.ស.រ.គ.	៨, ការត្រួតពិនិត្យ និងការវាយតម្លៃ ផ.ស.រ.គ.	មករា-ធ្នូ

ការបរិយាយលម្អិតអំពីដំណាក់កាល និងជំហាននីមួយៗមានដូចខាងក្រោម៖

៤.១. ដំណាក់កាលទី១៖ តម្លាភាព ភាពងាយទទួលបានព័ត៌មាននានា និងព័ត៌មានថវិកា
ក្នុងការអនុវត្តការងារគណនេយ្យភាពសង្គមដំណាក់កាលទី១ ត្រូវអនុវត្តក្នុងអំឡុងខែមករាដល់ខែមីនា ដែលនៅក្នុងដំណាក់កាលនេះ ការអនុវត្តសកម្មភាពត្រូវបានបែងចែកជាមាន០៤ជំហាន រួមមាន៖

ជំហានទី២ ការបញ្ចូលទិន្នន័យ៖ អង្គភាពផ្តល់សេវាត្រូវយកទម្រង់ស្រង់ទិន្នន័យដែលបានពិនិត្យបញ្ជាក់ ដើម្បីបញ្ចូលទិន្នន័យទៅក្នុងប្រព័ន្ធត្រួតពិនិត្យតាមដានការអនុវត្តសកម្មភាពគណនេយ្យភាពសង្គម។ ប្រធានអង្គភាពផ្តល់សេវាត្រូវពិនិត្យមើលភាពត្រឹមត្រូវនៃទិន្នន័យ និងរៀបចំកិច្ចប្រជុំផ្ទៃក្នុង ដើម្បីបញ្ជាក់លទ្ធផល។

ជំហានទី២ ការបញ្ចូលទិន្នន័យ៖ អង្គភាពផ្តល់សេវាត្រូវយកទម្រង់ស្រង់ទិន្នន័យដែលបានពិនិត្យបញ្ជាក់ដោយប្រធានការិយាល័យជំនាញថ្នាក់ក្រុង ស្រុក ខណ្ឌ ដើម្បីបញ្ចូលទិន្នន័យទៅក្នុងប្រព័ន្ធត្រួតពិនិត្យតាមដានការអនុវត្តសកម្មភាពគណនេយ្យភាពសង្គម។ ប្រធានអង្គភាពផ្តល់សេវាត្រូវពិនិត្យមើលភាពត្រឹមត្រូវនៃការបញ្ចូលទិន្នន័យតាមរយៈការផលិតសេចក្តីព្រាងនៃទិន្នន័យលទ្ធផលការងារ (Post-On) និងរៀបចំកិច្ចប្រជុំផ្ទៃក្នុង របស់ខ្លួនដើម្បីពិនិត្យមើល និងបញ្ជាក់ពីភាពត្រឹមត្រូវនៃទិន្នន័យលទ្ធផលការងារដែលបានបញ្ចូលក្នុងប្រព័ន្ធទិន្នន័យ។

ជំហានទី៣ ការផលិតទិន្នន័យលទ្ធផលការងារ (Post-On)៖ អង្គភាពផ្តល់សេវា ផលិតទិន្នន័យលទ្ធផលការងារ (Post-On) ចេញពីប្រព័ន្ធត្រួតពិនិត្យតាមដានការអនុវត្តសកម្មភាពគណនេយ្យភាពសង្គម ដែលព័ត៌មានទាំងនោះពាក់ព័ន្ធនឹងលទ្ធផលនៃការបំពេញការងារធៀបទៅនឹងស្តង់ដា របស់ក្រសួងសាមី ព្រមទាំងព័ត៌មានអំពីថវិកាចំណូល ចំណាយ និងគម្រោង។ ប្រធានអង្គភាពផ្តល់សេវាត្រូវធ្វើការចុះហត្ថលេខាសង្ខេប ឬបោះត្រាលើទិន្នន័យលទ្ធផលការងារដែលត្រូវយកទៅបិទលើផ្ទាំងកញ្ចប់ព័ត៌មានសម្រាប់ប្រជាពលរដ្ឋ (I4Cs)។

ជំហានទី៤ ការរៀបចំ និងផ្សព្វផ្សាយកញ្ចប់ព័ត៌មានសម្រាប់ប្រជាពលរដ្ឋ៖ អង្គភាពផ្តល់សេវានីមួយៗ ត្រូវយកទិន្នន័យលទ្ធផលការងារ (Post-On) ទៅបិទផ្សព្វផ្សាយនៅលើផ្ទាំងកញ្ចប់ព័ត៌មានសម្រាប់ប្រជាពលរដ្ឋ (I4Cs) តាមអង្គភាពផ្តល់សេវារបស់ខ្លួន និងផ្សព្វផ្សាយព័ត៌មានអំពីសិទ្ធិ ស្តង់ដាការបំពេញការងារ និងថវិកាជូនប្រជាពលរដ្ឋអំឡុងពេលដែលមកទទួលសេវា។ ជាមួយគ្នានេះដែរ អ្នកសម្របសម្រួលគណនេយ្យភាពសហគមន៍ធ្វើការផ្សព្វផ្សាយព័ត៌មានទាំងនេះជូនប្រជាពលរដ្ឋនៅសហគមន៍មូលដ្ឋាន តាមរយៈការរៀបចំកិច្ចប្រជុំតាមភូមិ ប្រើប្រាស់ឧបករណ៍បំពងសំឡេងតាមភូមិ និងការចុះទៅតាមផ្ទះក្រុមជនងាយរងគ្រោះ មានជាអាទិ៍។

៤.២. ដំណាក់កាលទី២៖ ការត្រួតពិនិត្យតាមដានដោយប្រជាពលរដ្ឋ

ក្នុងការអនុវត្តសកម្មភាពគណនេយ្យភាពសង្គមដំណាក់កាលទី២ ត្រូវអនុវត្តក្នុងអំឡុងខែមេសាដល់ខែកក្កដា ដែលនៅក្នុងដំណាក់កាលនេះ ការអនុវត្តសកម្មភាពត្រូវបានបែងចែកជាមាន០២ជំហាន ដូចខាងក្រោម៖

ជំហានទី៥ ការពិនិត្យវាយតម្លៃអំពីលទ្ធផលការងារនៃការផ្តល់សេវា៖ អ្នកសម្របសម្រួល គណនេយ្យភាពសហគមន៍ ធ្វើការសម្របសម្រួល ក្នុងកិច្ចប្រជុំដាក់ពិន្ទុដោយប្រជាពលរដ្ឋ ដើម្បីផ្តល់ឱកាសដល់ប្រជាពលរដ្ឋធ្វើការវាយតម្លៃទៅលើការបំពេញការងារ ចំណុចខ្លាំង ចំណុចខ្សោយ និងលើកឡើងនូវសកម្មភាពកែលម្អចំណុចខ្សោយ របស់ អង្គភាពផ្តល់សេវាទាំងបី ដែលប្រជាពលរដ្ឋធ្លាប់ទៅទទួលសេវា។ ទន្ទឹមនឹងនេះ មន្រ្តី បុគ្គលិកអង្គភាពផ្តល់សេវា ក៏ត្រូវធ្វើការពិនិត្យ វាយតម្លៃការបំពេញការងាររបស់អង្គភាពសាមីនីមួយៗផងដែរ ដើម្បីស្វែងរកចំណុចខ្វះខាតនិងរៀបចំសកម្មភាពកែលម្អចំណុចខ្វះខាតទាំងនោះ។

ជំហានទី៦ ការរៀបចំផែនការសកម្មភាពរួមស្តីពីការងារគណនេយ្យភាពសង្គម (ផ.ស.រ.គ.)៖ មេឃុំ ចៅសង្កាត់ ដោយមានការជួយគាំទ្រផ្នែកបច្ចេកទេស និងសម្របសម្រួលរបស់អង្គការសង្គមស៊ីវិល និងអ្នកសម្របសម្រួលគណនេយ្យភាពសហគមន៍ ដើម្បីរៀបចំកិច្ចប្រជុំរួមរវាងតំណាងប្រជាពលរដ្ឋ និងតំណាងអង្គភាពផ្តល់សេវានីមួយៗ ដើម្បីធ្វើបូកសរុបបញ្ហា តម្រូវការ និងដំណោះស្រាយនានា ដែលទទួលបានពីការពិនិត្យវាយតម្លៃខ្លួនឯងរបស់អង្គភាពផ្តល់សេវា និងការពិនិត្យវាយតម្លៃរបស់ប្រជាពលរដ្ឋដើម្បីបង្កើតជាផែនការសកម្មភាពរួមស្តីពីការងារគណនេយ្យភាពសង្គម (ផ.ស.រ.គ.) សម្រាប់ធ្វើការកែលម្អការបំពេញការងារ និងផ្តល់សេវាសាធារណៈរបស់អង្គភាពផ្តល់សេវានីមួយៗ។ ជាមួយគ្នានេះដែរ រដ្ឋបាលឃុំ សង្កាត់ទទួលខុសត្រូវក្នុងការយកគម្រោង សកម្មភាពនានានៃ ផ.ស.រ.គ. ដាក់បញ្ចូលទៅក្នុងកម្មវិធីវិនិយោគបីឆ្នាំរំកិលឃុំ សង្កាត់។ ក្នុងនោះផងដែរ រដ្ឋបាលឃុំ សង្កាត់តាមរយៈមន្រ្តីបង្គោលគណនេយ្យភាពសង្គមថ្នាក់ឃុំ សង្កាត់ ត្រូវធ្វើការបញ្ចូលគម្រោង សកម្មភាពនានារបស់ ផ.ស.រ.គ. ទៅក្នុងប្រព័ន្ធត្រួតពិនិត្យតាមដានការអនុវត្តសកម្មភាពគណនេយ្យភាពសង្គម និងផលិតទិន្នន័យលទ្ធផលការងារ ផ.ស.រ.គ. ដើម្បីបិទផ្សាយព័ត៌មាននៅតាមរដ្ឋបាល ឃុំ សង្កាត់ និងធ្វើការផ្សព្វផ្សាយជូនប្រជាពលរដ្ឋនៅមូលដ្ឋាន។ ទន្ទឹមនឹងនេះ រដ្ឋបាលឃុំ សង្កាត់ត្រូវរៀបចំបង្កើតគណៈកម្មាធិការ ផ.ស.រ.គ. ដើម្បីធ្វើការត្រួតពិនិត្យតាមដាន វាយតម្លៃ និងដោះស្រាយនូវបញ្ហាប្រឈមនានាពាក់ព័ន្ធនឹងការអនុវត្តគម្រោង សកម្មភាពរបស់ ផ.ស.រ.គ.។

៤.៣. ដំណាក់កាលទី៣៖ ការអនុវត្ត ត្រួតពិនិត្យ និងវាយតម្លៃ ផ.ស.រ.គ.

ក្នុងអំឡុងខែសីហា ដល់ខែធ្នូ ជាពេលវេលាក្នុងការអនុវត្តសកម្មភាពគណនេយ្យភាពសង្គមជំហានទាំង០២ នៃដំណាក់កាលទី៣៖

ជំហានទី៧ ការអនុវត្ត ផ.ស.រ.គ. ៖ ការរៀបចំ និងអនុវត្តគម្រោង និងសកម្មភាពនានានៃ ផ.ស.រ.គ. ទាំងគម្រោង សកម្មភាពដែលត្រូវការគាំទ្រធនធានពីខាងក្រៅ (ក្រសួង ស្ថាប័ន រដ្ឋបាលរាជធានី ខេត្ត ក្រុង ស្រុក ខណ្ឌ អង្គការសង្គមស៊ីវិល និងសប្បុរសជន) និងគម្រោង សកម្មភាពដែលប្រើប្រាស់ធនធានរបស់អង្គភាពផ្តល់សេវាសាមី។ ការអនុវត្តគម្រោង សកម្មភាពនេះមានគោលបំណងលើកកម្ពស់ការបំពេញការងារ ការផ្តល់សេវា និងការអភិវឌ្ឍមូលដ្ឋាន ដើម្បីឆ្លើយតបនឹងតម្រូវការនានារបស់ប្រជាពលរដ្ឋ។ គណៈកម្មាធិការ ផ.ស.រ.គ. ត្រូវរៀបចំរបាយការណ៍វឌ្ឍនភាព បញ្ហាប្រឈម ផ្អែកលើការប្រមូលព័ត៌មានពីអង្គភាពផ្តល់សេវាពាក់ព័ន្ធ និងធ្វើទៅតាមទម្រង់បែបបទ និងសេចក្តីណែនាំនានាដែលបានកំណត់។

ជំហានទី៨ ការត្រួតពិនិត្យ និងវាយតម្លៃ ផ.ស.រ.គ.៖ ការត្រួតពិនិត្យ វាយតម្លៃ ផ.ស.រ.គ. ត្រូវរៀបចំឡើងតាមរយៈការប្រជុំប្រចាំត្រីមាស ឆមាស និងប្រចាំឆ្នាំរបស់គណៈកម្មាធិការ ផ.ស.រ.គ. ដើម្បីពិនិត្យមើលវឌ្ឍនភាព បញ្ហាប្រឈម និងស្វែងរកដំណោះស្រាយ ក៏ដូចជារៀបចំផែនការក្នុងកៀរគរធនធាន ដើម្បីគាំទ្រ ដល់ការអនុវត្តគម្រោង សកម្មភាព ផ.ស.រ.គ.។

Facebook Telegram 𝕏Twitter LinkedIn

បណ្ដុំរូបភាព

អត្ថបទពាក់ព័ន្ធ ៖

ផែនការយុទ្ធសាស្ត្រស្តីពីការងារគណនេយ្យភាពសង្គម (២០១៣) ផែនការអនុវត្តគណនេយ្យភាពសង្គម (ផ.អ.គ.ស.) ដំណាក់កាលទី១ (២០១៦-២០១៨) ផែនការអនុវត្តគណនេយ្យភាពសង្គម (ផ.អ.គ.ស.) ដំណាក់កាលទី២ (២០១៩-២០២៥)

ព្រឹត្តិការណ៍ថ្មីៗ

កិច្ចប្រជុំពិភាក្សាស្តីពីការរៀបចំថវិកាសម្រាប់ការគ្រប់គ្រងឆ្នាំ២០២៦ របស់ក្រសួងមហាផ្ទៃ

២៦ សីហា ២០២៥

កិច្ចប្រជុំសិក្សាស្វែងយល់អំពីស្ថានភាពនៃការរៀបចំ និងការប្រព្រឹត្តទៅនៃរចនាសម្ព័ន្ធ ប្រព័ន្ធគ្រប់គ្រង និងមុខងាររបស់រដ្ឋបាលខេត្ត និងរដ្ឋបាលក្រុង ស្រុកនៃខេត្តមណ្ឌលគិរី

២៦ សីហា ២០២៥