ផែនការយុទ្ធសាស្ត្រនេះបង្ហាញអំពីចក្ខុវិស័យ គោលបំណង លទ្ធផលរំពឹងទុក គោលការណ៍គន្លឹះ និងក្របខណ្ឌយុទ្ធសាស្ត្រដោយផ្តោតលើយុទ្ធសាស្ត្រសំខាន់ៗចំនួន៥ ដែលត្រូវប្រកាន់យកដោយតួអង្គពាក់ព័ន្ធទាំងអស់ដើម្បីសហការគ្នាអនុវត្តផែនការយុទ្ធសាស្ត្រនេះប្រកបដោយជោគជ័យ។

ផែនការយុទ្ធសាស្ត្រស្តីពីការងារគណនេយ្យភាពសង្គមនេះ មានចក្ខុវិស័យផ្តោតទៅលើការពង្រឹងភាពជាដៃគូរវាងរដ្ឋបាលថ្នាក់ក្រោមជាតិជាមួយប្រជាពលរដ្ឋ ការលើកកម្ពស់នូវសិទ្ធិអំណាចរបស់ប្រជាពលរដ្ឋ និងគណនេយ្យភាពរបស់រដ្ឋបាលថ្នាក់ក្រោមជាតិ សំដៅអនុវត្តកិច្ចដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិឱ្យកាន់តែមានប្រសិទ្ធភាព។

គណនេយ្យភាពសង្គម ក្នុងកិច្ចដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ មានគោលបំណងផ្តល់នូវសិទ្ធិអំណាចដល់ប្រជាពលរដ្ឋ សហគមន៍មូលដ្ឋាន ជាពិសេសក្រុមដែលតំណាងឱ្យផលប្រយោជន៍របស់ស្ត្រី យុវវ័យ និងក្រុមជនងាយរងគ្រោះនានា ក្នុងការចូលរួមពង្រឹងការចាត់ចែង ការប្រើប្រាស់ថវិកា និងការផ្តល់សេវាសាធារណៈនៅមូលដ្ឋាន តាមរយៈការលើកកម្ពស់នូវភាពងាយទទួលបានព័ត៌មាន និងការចូលរួមពិនិត្យតាមដានលើការងារថវិកា និងការបំពេញការងាររបស់រដ្ឋបាលថ្នាក់ក្រោមជាតិ។

ដើម្បីសម្រេចបានគោលបំណងខាងលើនេះ ក្របខ័ណ្ឌគណនេយ្យភាពសង្គមមានយុទ្ធសាស្ត្រជាចម្បងចំនួន៥ ដូចខាងក្រោម៖

• យុទ្ធសាស្ត្រទីមួយ៖ ការលើកកម្ពស់តម្លាភាព និងភាពងាយទទួលបាននូវព័ត៌មានអំពីស្តង់ដារថវិកា និងការបំពេញការងារ
• យុទ្ធសាស្ត្រទីពីរ៖ ការសម្របសម្រួលឱ្យមានការត្រួតពិនិត្យ តាមដានរបស់ប្រជាពលរដ្ឋលើសកម្មភាព និងការផ្តល់សេវាកម្មមូលដ្ឋានរបស់រដ្ឋបាលថ្នាក់ក្រោមជាតិ
• យុទ្ធសាស្ត្រទីបី៖ ការលើកកម្ពស់សមត្ថភាពយល់ដឹងរបស់ប្រជាពលរដ្ឋអំពីថវិកា
• យុទ្ធសាស្ត្រទីបួន៖ ការគាំទ្រដល់តួអង្គនានា និងការកសាងសមត្ថភាពដល់តួអង្គទាំងនេះដើម្បីសម្របសម្រួលការចូលរួមរបស់ប្រជាពលរដ្ឋ និងកិច្ចដំណើរការនានានៃគណនេយ្យភាពសង្គម
• យុទ្ធសាស្ត្រទីប្រាំ៖ ការប្រមូលមេរៀន បទពិសោធន៍ ដែលបានមកពីអន្តរាគមន៍នានានៅមូលដ្ឋានដើម្បីប្រែក្លាយបទពិសោធន៍ទាំងនេះដាក់បញ្ចូលទៅក្នុងគោលនយោបាយរបស់រាជរដ្ឋាភិបាល និងពង្រឹងការងារអង្គការសង្គមស៊ីវិលនានា។

ការរៀបចំតាក់តែង និងការអនុវត្តផែនការយុទ្ធសាស្ត្រនេះផ្តើមចេញពីគោលការណ៍សំខាន់ៗចំនួន៧ ដូចខាងក្រោម៖

១. អាទិភាពរបស់ប្រជាពលរដ្ឋ៖ ប្រជាពលរដ្ឋជាអ្នកកំណត់អំពីតម្រូវការអាទិភាពរបស់ខ្លួន។ តម្រូវការជាអាទិភាពរបស់ប្រជាពលរដ្ឋអាចផ្តោតទៅលើសេវាអប់រំ  សុខាភិបាល ការគ្រប់គ្រងធនធានធម្មជាតិ បរិស្ថាន កសិកម្ម ។ល។

២. កម្រិតមូលដ្ឋាន៖ សកម្មភាពនានានឹងផ្តោតទៅលើការប្រាស្រ័យទាក់ទង ការពិភាក្សា និងការដោះស្រាយបញ្ហានានានៅតែក្នុងកម្រិតមូលដ្ឋានប៉ុណ្ណោះ។

៣. ការចូលរួមក្នុងន័យស្ថាបនា៖ គណនេយ្យភាពសង្គមនឹងប្រកាន់យកនូវអភិក្រម ដែលមានលក្ខណៈស្ថាបនាដោយផ្អែកទៅលើកិច្ចសហការគ្នាជាជាងការប្រឈមមុខគ្នា ដើម្បីឈានទៅសម្រេចនូវលទ្ធផលដែលប្រាថ្នាចង់បាន។

៤. ការតាំងចិត្ត៖ រដ្ឋបាលថ្នាក់ក្រោមជាតិ និងមន្ទីរ អង្គភាពជំនាញនៅថ្នាក់ក្រោមជាតិត្រូវតាំងចិត្តចូលរួមយ៉ាងសកម្មនូវរាល់សកម្មភាពគណនេយ្យភាពសង្គមជាមួយប្រជាពលរដ្ឋ និងតំណាងនានារបស់ប្រជាពលរដ្ឋ។

៥. ភាពជាដៃគូ៖ កិច្ចខិតខំប្រឹងប្រែងនានានឹងត្រូវបានប្រកាន់យកយ៉ាងច្បាស់លាស់ដើម្បីកសាង និងពង្រឹងភាពជាដៃគូរវាងរដ្ឋបាលថ្នាក់ក្រោមជាតិ និងអង្គការសង្គមស៊ីវិល និងក្នុងចំណោមអង្គការសង្គមស៊ីវិលនានា។

៦. ការដាក់បញ្ចូលនូវតម្រូវការនានា៖ អន្តរាគមន៍នានាត្រូវផ្តោតការយកចិត្តទុកដាក់ទៅលើការផ្តល់សិទ្ធិអំណាច ការចូលរួម និងការដោះស្រាយនូវរាល់តម្រូវការផ្សេងៗគ្នារបស់ប្រជាពលរដ្ឋទាំងឡាយ ក្នុងនោះរាប់បញ្ចូលទាំងតម្រូវការរបស់ស្ត្រី យុវវ័យ និងក្រុមជនងាយរងគ្រោះនានា ដូចជាជនក្រីក្រ និងជនជាតិដើមភាគតិចជាដើមផងដែរ។

៧. ការខិតខំលុបបំបាត់នូវគម្លាត៖ ផែនការយុទ្ធសាស្ត្រនេះនឹងដោះស្រាយចន្លោះប្រហោងមួយចំនួននៃការចូលរួមរបស់ប្រជាពលរដ្ឋ ព្រមទាំងមានគោលបំណងធ្វើឱ្យមានការផ្លាស់ប្តូរនូវវិសាលភាព និងសារធាតុនៃការប្រាស្រ័យទាក់ទងរវាងប្រជាពលរដ្ឋ និងរដ្ឋបាលថ្នាក់ក្រោមជាតិ។

ដើម្បីទាញយកឯកសារ: ផែនការយុទ្ធសាស្ត្រស្តីពីការងារគណនេយ្យភាពសង្គម (២០១៣)