និមិត្តសញ្ញាថ្មី៖ មានរង្វង់ព័ទ្ធជុំវិញពីរជាន់ ដែលក្នុងរង្វង់មូលទី១ មានអក្សររាជរដ្ឋាភិបាលកម្ពុជានៅចំកណ្តាលមានផ្ការំដួលពីរសងខាង និងមានអក្សរគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិនៅខាងក្រោម។ រង្វង់ទី២ មានអដ្ឋរង្សី៨ឆ្នូតនៅចំកណ្តាលសៀវភៅដែលទ្រដោយជើងពាន ដោយមានរូបស្លឹករំដួលទ្រនិងអមសងខាងជើងពាន ព្រមទាំងមានអក្សរ គ.ជ.អ.ប. ទ្រពីក្រោម។

ជាប្រភេទផ្កាតំណាងឱ្យអត្តសញ្ញាណរបស់ប្រទេសកម្ពុជាដែលមានក្លិនក្រអូបសព្វសាយប្រៀបដូចទៅនឹងចក្ខុវិស័យនៃកំណែទម្រង់វិមជ្ឈការ និងវិសហមជ្ឈការ​ ការលើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋានឱ្យកាន់តែល្អប្រសើរឡើង ប្រកបដោយតម្លាភាព គណនេយ្យភាព បរិយាបន្ន និងសមធម៌សង្គម ស្របតាមបរិបទនៃប្រទេសកម្ពុជា (កត្តានយោបាយ ភូមិសាស្ត្រ ប្រជាសាស្ត្រ សេដ្ឋកិច្ច វប្បធម៌ និងប្រពៃណីជាតិ)។

ក្លិនៈ ជំនឿទុកចិត្តនិងភាពពេញចិត្តពីគ្រប់ភាគីពាក់ព័ន្ធក្នុងការចូលរួមអនុវត្តកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា។

សម្រស់ៈ ការរៀបចំស្ថាប័ន​ដែលមានលក្ខណៈធន់មាំ ទំនើប ស្វ័យភាព ប្រសិទ្ធភាព តម្លាភាព និងគណនេយ្យភាព។

គុណតម្លៃៈ ប្រជាពលរដ្ឋទទួលបានសេវាសាធារណៈនិងផលប្រយោជន៏ពីការអភិវឌ្ឍមូលដ្ឋានដែលផ្តល់ដោយរដ្ឋបាលថ្នាក់  ក្រោមជាតិប្រកបដោយប្រសិទ្ធភាព គុណភាព តម្លាភាព គណនេយ្យភាព បរិយាបន្ន និងសមធម៌សង្គម។

តំណាងឱ្យគោលការណ៍គ្រឺះទាំង៨នៃការអភិវឌ្ឍតាមបែបប្រជាធិបតេយ្យដែលបានកំណត់ក្នុងមាត្រា១២នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ រួមមាន៖

១. ភាពជាតំណាងសាធារណៈ 

២. ស្វ័យភាពរបស់មូលដ្ឋាន 

៣. ការពិគ្រោះយោបល់ និងការចូលរួម​ ​ ​

៤. ការឆ្លើយតប និងគណនេយ្យភាព

​៥. ការលើកកម្ពស់គុណភាពជីវិតរបស់ប្រជាជននៅក្នុងមូលដ្ឋាន  

៦. ការលើកស្ទួយសមធម៌  

៧. តម្លាភាព និងសុចរិតភាព 

៨. វិធានការប្រឆាំងអំពើពុករលួយ និងការរំលោភអំណាច។