លេខាធិការដ្ឋាន គ.ជ.អ.ប. មានភារកិច្ចសំខាន់ៗ ដូចខាងក្រោម៖

• សហការ និងសម្របសម្រួលសិក្សាអំពីចក្ខុវិស័យសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយផ្សារភ្ជាប់ជាមួយគោលនយោបាយកំណែទម្រង់នានា ដើម្បីសុំការអនុម័តពី គ.ជ.អ.ប.
• អភិវឌ្ឍន៍ក្របខណ្ឌគោលនយោបាយ ក្របខណ្ឌច្បាប់ និងលិខិតបទដ្ឋានគតិយុត្តនានា ដាក់ជូន គ.ជ.អ.ប. ពិនិត្យនិងអនុម័ត ដើម្បីគាំទ្រដល់ដំណើរការនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ
• រៀបចំឱ្យមានការពិគ្រោះយោបល់ជាមួយក្រសួង ស្ថាប័ន ដៃគូអភិវឌ្ឍន៍ និងអ្នកពាក់ព័ន្ធនានា ដើម្បីរៀបចំកម្មវិធីជាតិ ផែនការអនុវត្តកម្មវិធីជាតិ និងផែនការសកម្មភាព និងថវិកាប្រចាំឆ្នាំ ដើម្បីសុំការសម្រេចពី គ.ជ.អ.ប.
• គាំទ្រ សម្របសម្រួលការអនុវត្តកម្មវិធីជាតិ ផែនការអនុវត្តកម្មវិធីជាតិ និងផែនការសកម្មភាពនិងថវិកាប្រចាំឆ្នាំ ព្រមទាំងរៀបចំ និងអនុវត្តនូវប្រព័ន្ធតាមដាន និងវាយតម្លៃក្នុងកម្រិតកម្មវិធីជាទូទៅលើផែនការ និងកម្មវិធីទាំងនោះ ក្នុងនាម គ.ជ.អ.ប.
• សិក្សា និងលើកយោបល់សុំការសម្រេចពី គ.ជ.អ.ប. ក្នុងការកែសម្រួលកម្មវិធីជាតិ ផែនការអនុវត្តកម្មវិធីជាតិ និងផែនការសកម្មភាពនិងថវិកាប្រចាំឆ្នាំ ផ្អែកលើវឌ្ឍនភាព និងបញ្ហាប្រឈមក្នុងដំណើរការនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ
• សហការរៀបចំឱ្យមានការពិគ្រោះយោបល់ជាមួយក្រសួង ស្ថាប័ន និងអ្នកពាក់ព័ន្ធនានាអំពីការពិនិត្យមើលឡើងវិញនូវមុខងារ និងការផ្ទេរមុខងារ និងធនធានទៅតាមដំណាក់កាលនានា ដែលកំណត់ដោយ គ.ជ.អ.ប.
• បំពេញតួនាទីជាលេខាធិការដ្ឋានឱ្យអនុគណៈកម្មាធិការនានារបស់ គ.ជ.អ.ប.
• សម្របសម្រួលកិច្ចការប្រចាំថ្ងៃរបស់ គ.ជ.អ.ប. ស្របតាមគោលការណ៍ណែនាំនានារបស់ គ.ជ.អ.ប.
• ធ្វើការត្រួតពិនិត្យ សង្ខេប បូកសរុបឯកសារ របាយការណ៍លទ្ធផលនៃកិច្ចប្រជុំ អនុសាសន៍ សំណើសំណូមពរដែលផ្តល់ជូនដោយអនុគណៈកម្មាធិការនានា ដោយភ្ជាប់ជាមួយអនុសាសន៍របស់ខ្លួនដើម្បីដាក់ជូនប្រធាន គ.ជ.អ.ប. ពិនិត្យ សម្រេច
• ត្រៀមរៀបចំកិច្ចប្រជុំទាំងអស់របស់ គ.ជ.អ.ប.
• សម្របសម្រួលក្នុងដំណើរការនៃការអនុវត្តកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ការអនុវត្តច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់ ព្រមទាំងលិខិតបទដ្ឋានអនុវត្តច្បាប់ទាំងនេះ ស្របតាមការណែនាំរបស់ គ.ជ.អ.ប.
• សម្របសម្រួលគម្រោងគាំទ្រពីដៃគូអភិវឌ្ឍន៍នានាដល់ដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ តាមការណែនាំរបស់ គ.ជ.អ.ប.
• អាចធ្វើជាប្រតិបត្តិករនូវគម្រោង កម្មវិធីដែលគាំទ្រពីដៃគូអភិវឌ្ឍន៍នានា តាមការសម្របសម្រួលគ្នារវាងដៃគូអភិវឌ្ឍន៍ទាំងនោះ និងតាមការសម្រេចរបស់ គ.ជ.អ.ប.
• ចូលរួមជាមួយដៃគូអភិវឌ្ឍន៍ក្នុងក្រុមការងារបច្ចេកទេសវិមជ្ឈការ និងវិសហមជ្ឈការ
• គ្រប់គ្រងថវិកា និងហិរញ្ញវត្ថុរបស់ គ.ជ.អ.ប.
• បំពេញការងារផ្សេងៗទៀតតាមការកំណត់របស់ គ.ជ.អ.ប.។