ក្នុងឱកាសនោះ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ បានសម្តែងការអបអរសាទរចំពោះលោកអភិបាលរងថ្មី និងបានកោតសរសើរចំពោះសមិទ្ធផលនានាដែលរដ្ឋបាលខេត្តកំពង់ធំសម្រេចបានកន្លងមក ក្នុងការថែរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់គុណភាពសេវាសាធារណៈ និងការជំរុញការអភិវឌ្ឍមូលដ្ឋានប្រកបដោយចីរភាព។

ជាមួយគ្នានេះ ឯកឧត្តមក៏បានលើកឡើងអំពីបរិបទនៃការប្រែប្រួលយ៉ាងឆាប់រហ័សនៃស្ថានភាពតំបន់ និងពិភពលោក ដែលទាមទារឱ្យរដ្ឋបាលថ្នាក់ក្រោមជាតិបន្តពង្រឹងសមត្ថភាព ភាពធន់ និងភាពម្ចាស់ការ ក្នុងការគ្រប់គ្រង និងឆ្លើយតបចំពោះបញ្ហាប្រឈមនានាប្រកបដោយប្រសិទ្ធភាព ព្រមទាំងបន្តជំរុញការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ ដើម្បីលើកកម្ពស់អភិបាលកិច្ចល្អ ការផ្តល់សេវាសាធារណៈ និងការអភិវឌ្ឍមូលដ្ឋានឱ្យកាន់តែឆ្លើយតបនឹងតម្រូវការរបស់ប្រជាពលរដ្ឋ។

ទន្ទឹមនឹងនេះ ឯកឧត្តមបានផ្តល់អនុសាសន៍ដល់រដ្ឋបាលខេត្តកំពង់ធំឱ្យបន្តផ្តោតការយកចិត្តទុកដាក់លើកិច្ចការអាទិភាពសំខាន់ៗ រួមមាន៖ (១) ពង្រឹងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជាពិសេសការបង្ការ និងបង្ក្រាបបទល្មើសគ្រប់ប្រភេទ ការប្រយុទ្ធប្រឆាំងគ្រឿងញៀន និងការឆបោកតាមប្រព័ន្ធបច្ចេកវិទ្យា (Online Scam) (២) ជំរុញការអនុវត្តផែនការអនុវត្តរយៈពេល៥ឆ្នាំ ដំណាក់កាលទី២ (២០២៦-២០៣០) នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (៣) លើកកម្ពស់ការអភិវឌ្ឍសេដ្ឋកិច្ចមូលដ្ឋាន ការទាក់ទាញវិនិយោគ និងការអភិវឌ្ឍវិស័យទេសចរណ៍ និង (៤) ពង្រឹងរបៀបរបបការងារ តម្លាភាព គណនេយ្យភាព វិជ្ជាជីវៈ សាមគ្គីភាពផ្ទៃក្នុង និងភាពជាអ្នកដឹកនាំ ដើម្បីធានាប្រសិទ្ធភាព និងនិរន្តរភាពនៃការគ្រប់គ្រងរដ្ឋបាលខេត្ត។

ជាលទ្ធផល ពិធីបានប្រព្រឹត្តទៅដោយរលូន និងជោគជ័យ ក្នុងបរិយាកាសសាមគ្គីភាព និងការប្តេជ្ញាចិត្តរួមគ្នាក្នុងការបន្តជំរុញការអភិវឌ្ឍខេត្តកំពង់ធំឱ្យកាន់តែមានវឌ្ឍនភាព និងឆ្លើយតបប្រកបដោយប្រសិទ្ធភាពចំពោះតម្រូវការរបស់ប្រជាពលរដ្ឋ៕