កម្មវិធីនេះត្រូវបានសហការរៀបចំឡើងដោយក្រសួងកិច្ចការនារី និងអង្គការ UN Women ក្នុងគោលបំណងលើកកម្ពស់ការយល់ដឹង ការគាំទ្រ និងការធ្វើសេចក្តីសម្រេចចិត្ត ក្នុងការលើកកម្ពស់សមភាពយេនឌ័រ នៅក្នុងការប្រែប្រួលអាកាសធាតុ និងការគ្រប់គ្រងគ្រោះមហន្តរាយ ដោយផ្អែកលើអំណះអំណាងតាមបែបវិទ្យាសាស្ត្រ និងព័ត៌មានទិន្នន័យជាក់ស្តែង ។វេទិកានេះមានសមាសភាពចូលរួមផ្ទាល់សរុបប្រមាណ ៨០ រូប ដែលរួមមាន ថ្នាក់ដឹកនាំជាន់ខ្ពស់ពីក្រសួងកិច្ចការនារី និងក្រសួងស្ថាប័នពាក់ព័ន្ធ ព្រមទាំងតំណាងដៃគូអភិវឌ្ឍន៍ពីអង្គការ UN Women, UNDP, UNIDO, ADB, World Bank, Plan International Cambodia, CAPRED, FAO, JICA, និង Tetra-tech ។ ជាមួយគ្នានេះ ក៏មានការអញ្ជើញចូលរួមពីយន្តការអនុវត្ត ដែលជាប្រធាននិងសមាជិកនៃក្រុមការងារបញ្ជ្រាបយេនឌ័រ (GMAG) តាមវិស័យ ព្រមទាំងតំណាងសង្គមស៊ីវិល និងសហគមន៍ មកពីអង្គការមិនមែនរដ្ឋាភិបាលជាតិ-អន្តរជាតិ និងក្រុមយុវជនផងដែរ ។

នៅក្នុងកិច្ចពិភាក្សាដេញដោលនៃកិច្ចសន្ទនាកម្រិតខ្ពស់នេះ អង្គពិធីបានធ្វើការពិភាក្សាយ៉ាងស៊ីជម្រៅលើប្រធានបទ៖ «ការពង្រឹងយន្តការ និងវិធីសាស្ត្រ ក្នុងការជំរុញការអនុវត្តគោលនយោបាយ និងយុទ្ធសាស្ត្របញ្ជ្រាបយេនឌ័រ ក្នុងកម្មវិធី និងវិស័យពាក់ព័ន្ធនឹងអាកាសធាតុ និងគ្រោះមហន្តរាយ»។