ផែនការអនុវត្តបីឆ្នាំដំណាក់កាលទី១(ផអ៣ទី១) ២០១១-២០១៣ ត្រូវបានអនុម័តដោយ គ.ជ.អ.ប នៅថ្ងៃទី៨ ខែធ្នូ ឆ្នាំ២០១០ ដោយផ្ដោតទៅលើការបង្កើត ការបំពេញមុខងារ អភិបាលកិច្ច និងការត្រួតពិនិត្យរបស់រដ្ឋបាលថ្នាក់ក្រោមជាតិ ដែលចាប់ផ្ដើមជាបឋមគឺនៅថ្នាក់ក្រុង ស្រុក ដើម្បីធានាឱ្យមានកិច្ចសហប្រតិបត្តិការ និងការគាំទ្រប្រកបដោយប្រសិទ្ធភាព និងភាពស័ក្ដិសិទ្ធិរវាងក្រុង ស្រុកជាមួយឃុំ សង្កាត់ ក្នុងន័យពង្រឹងថែមទៀតនូវសមត្ថភាព និងភាពជាម្ចាស់របស់ឃុំ សង្កាត់ ព្រមទាំងយកចិត្តទុកដាក់ដល់ការពង្រឹងសមត្ថភាពរដ្ឋបាលរាជធានី ខេត្ត។ ផអ៣ទី១ ត្រូវបានរៀបចំឡើងផ្អែកលើគោលការណ៍ និងសមិទ្ធផលរំពឹងទុកជាយុទ្ធសាស្ត្រនានាដែលបានកំណត់នៅក្នុងសមាសធាតុកម្មវិធីនីមួយៗនៃកម្មវិធីជាតិ។ ជាមួយគ្នានេះ ផអ៣ទី១ ក៏ផ្ដោតទៅលើការរៀបចំ តាក់តែងបន្ថែមនូវក្របខ័ណ្ឌគោលនយោបាយនានាផងដែរ។
ផអ៣ទី១ ត្រូវបានបែងចែកជា៦អនុកម្មវិធី ដូចខាងក្រោម៖
អនុកម្មវិធីទី១៖ ផ្តោតលើការរៀបចំគោលនយោបាយ លិខិតបទដ្ឋានគតិយុត្ត ការសម្របសម្រួលកម្មវិធី និងការអភិវឌ្ឍសមត្ថភាពរបស់ក្រុមប្រឹក្សារដ្ឋបាលថ្នាក់ក្រោមជាតិ ដែលដឹកនាំ សម្របសម្រួលដោយលេខាធិការដ្ឋាន គ.ជ.អ.ប.។
អនុកម្មវិធីទី២៖ ផ្តោតលើការរៀបចំឡើងវិញនូវរចនាសម្ព័ន្ធ ប្រព័ន្ធគ្រប់គ្រង នីតិវិធីអនុវត្តការងារ និងការអភិវឌ្ឍស្ថាប័ននៃរដ្ឋបាលថ្នាក់ក្រោមជាតិ ដែលដឹកនាំ សម្របសម្រួលដោយក្រសួងមហាផ្ទៃ។
អនុកម្មវិធីទី៣៖ ផ្តោតលើការរៀបចំប្រព័ន្ធគ្រប់គ្រងបុគ្គលិក និងអភិវឌ្ឍធនធានមនុស្សរបស់រដ្ឋបាលថ្នាក់ក្រោមជាតិ ដែលដឹកនាំ សម្របសម្រួលដោយរដ្ឋលេខាធិការដ្ឋានមុខងារសាធារណៈ។
អនុកម្មវិធីទី៤៖ ផ្តោតលើការងារវិមជ្ឈការហិរញ្ញវត្ថុ ដែលធានាដល់ការរៀបចំបង្កើតប្រព័ន្ធផ្ទេរ និងគ្រប់គ្រងធនធានហិរញ្ញវត្ថុរបស់រដ្ឋបាលថ្នាក់ក្រោមជាតិ ដែលដឹកនាំ សម្របសម្រួលដោយក្រសួងសេដ្ឋកិច្ច និងហិរញ្ញវត្ថុ។
អនុកម្មវិធីទី៥៖ ផ្តោតលើការរៀបចំប្រព័ន្ធផែនការរបស់រដ្ឋបាលថ្នាក់ក្រោមជាតិ ដែលដឹកនាំ សម្របសម្រួលដោយក្រសួងផែនការ។
អនុកម្មវិធីទី៦៖ ផ្តោតលើការរៀបចំបង្កើត
និងអភិវឌ្ឍសមត្ថភាពសមាគមក្រុមប្រឹក្សានៃរដ្ឋបាលថ្នាក់ក្រោមជាតិ ដែលដឹកនាំ
សម្របសម្រួលដោយសមាគមក្រុមប្រឹក្សា។
ការពន្យាពេល ផអ៣ទី១ ដល់ឆ្នាំ២០១៤
តាមលទ្ធផលនៃការវាយតម្លៃពាក់កណ្តាលអាណត្តិរបស់ ផអ៣ទី១ និងដោយពិនិត្យឃើញថានៅមានលទ្ធផលរំពឹងទុកសំខាន់ៗមួយចំនួនទៀតមិនអាចបញ្ចប់នៅត្រឹមឆ្នាំ២០១៣ គ.ជ.អ.ប. បានសម្រេចពន្យាពេល ផអ៣ទី១ រយៈពេល១ឆ្នាំទៀតដល់ឆ្នាំ២០១៤។ ជារួម សម្រាប់រយៈពេលដំបូង និងរយៈពេលនៃការពន្យាពេលការអនុវត្តផអ៣ទី១ដែលចាប់ផ្តើមនៅឆ្នាំ២០១១ រហូតដល់ឆ្នាំ២០១៤ គឺបានផ្តោតការយកចិត្តទុកដាក់ទៅលើការពង្រឹង និងការអភិវឌ្ឍសមត្ថភាពរបស់រដ្ឋបាលថ្នាក់ក្រោមជាតិ ជាពិសេសរដ្ឋបាលក្រុង ស្រុក ឱ្យក្លាយជាស្ថាប័នអភិបាលកិច្ចមូលដ្ឋាន និងអភិវឌ្ឍមូលដ្ឋានយ៉ាងពិតប្រាកដ។ មូលដ្ឋានគ្រឹះសំខាន់ៗដូចជា រចនាសម្ព័ន្ធ នីតិវិធី ប្រព័ន្ធ និងឧបករណ៍ជាច្រើនសម្រាប់ការបំពេញការងាររបស់រដ្ឋបាលថ្នាក់ក្រោមជាតិត្រូវបានរៀបចំឡើងវិញ និងបានផ្តល់ជាបង្អែកយ៉ាងរឹងមាំសម្រាប់ការបោះជំហានឆ្ពោះទៅមុខ។ ទាំងនេះបណ្តាលឱ្យផអ៣ទី១ ក្លាយជាកម្លាំងចលករមួយដ៏សំខាន់ សម្រាប់ការងារកំណែទម្រង់ និងជាសនិទានកម្មដ៏សំខាន់ដល់រាជរដ្ឋាភិបាល ដើម្បីបន្តរៀបចំ និងអនុវត្ត ផអ៣ទី២ ដែលចាប់ផ្តើមពីឆ្នាំ២០១៥ ដល់ឆ្នាំ២០១៧។
ស្ថិតក្នុងបរិវេណក្រសួងមហាផ្ទៃ អគារ (V) មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា
(+855) 78 575 775
info@ncdd.gov.kh
