យោងអនុក្រឹត្យលេខ ១៦ អនក្រ.បក ចុះថ្ងៃទី៣០ ខែមករា ឆ្នាំ២០២៤ ស្តីពីការរៀបចំ និងការប្រព្រឹត្តទៅនៃអនុគណៈកម្មាធិការរបស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ អនុក្រឹត្យនេះមានគោលបំណងលើកកម្ពស់ប្រសិទ្ធភាពនៃការអនុវត្តតួនាទី ភារកិច្ច និងការទទួលខុសត្រូវរបស់ គ.ជ.អ.ប. ក្នុងការដឹកនាំ ការសម្របសម្រួល និងការគ្រប់គ្រងកម្មវិធីកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ អនុក្រឹត្យនេះមានគោលដៅកំណត់អំពីការរៀបចំ និងការប្រព្រឹត្តទៅនៃអនុគណៈកម្មាធិការចំណុះគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។

គ.ជ.អ.ប. មានអនុគណៈកម្មាធិការនានាចំណុះចំនួន៣ ដូចខាងក្រោម៖

១- អនុគណៈកម្មាធិការមុខងារនិងធនធាន

២- អនុគណៈកម្មាធិការកិច្ចការសារពើពន្ធនិងហិរញ្ញវត្ថុ

៣- អនុគណៈកម្មាធិការបុគ្គលិករបស់រដ្ឋបាលថ្នាក់ក្រោមជាតិ។

ចំពោះ អនុគណៈកម្មាធិការកិច្ចការសារពើពន្ធនិងហិរញ្ញវត្ថុ មានសមាសភាព ដូចខាងក្រោម៖

អនុគណៈកម្មាធិការកិច្ចការសារពើពន្ធនិងហិរញ្ញវត្ថុ មានតួនាទីផ្តល់យោបល់ជូន គ.ជ.អ.ប. លើកិច្ចការនានាពាក់ព័ន្ធនឹងការធ្វើវិមជ្ឈការហិរញ្ញវត្ថុ ការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ ព្រមទាំងការរៀបចំ និងការអនុវត្តផែនការអភិវឌ្ឍន៍ និងកម្មវិធីវិនិយោគរបស់រដ្ឋបាលថ្នាក់ក្រោមជាតិ ដូចខាងក្រោម៖

• ពិនិត្យ និងផ្តល់យោបល់លើការរៀបចំ និងការអនុវត្តគោលនយោបាយ ច្បាប់ លិខិតបទដ្ឋានគតិយុត្ត ផែនការយុទ្ធសាស្ត្រថវិកា និងឯកសារបច្ចេកទេសនានាពាក់ព័ន្ធនឹងការធ្វើវិមជ្ឈការហិរញ្ញវត្ថុ ការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ និងការកសាងផែនការអភិវឌ្ឍ កម្មវិធីវិនិយោគ ផែនការសកម្មភាព និងថវិកាប្រចាំឆ្នាំរបស់រដ្ឋបាលថ្នាក់ក្រោមជាតិ
• ពិភាក្សា និងពិគ្រោះយោបល់ជាមួយក្រសួង ស្ថាប័ន និងអ្នកពាក់ព័ន្ធនានាដើម្បីកំណត់នូវធនធានហិរញ្ញវត្ថុ ទ្រព្យសម្បត្តិ បែបបទ និងនីតិវិធីសម្រាប់ការផ្ទេរធនធានហិរញ្ញវត្ថុមានភ្ជាប់លក្ខខណ្ឌ ធនធានហិរញ្ញវត្ថុគ្មានភ្ជាប់លក្ខខណ្ឌ ចំណូលចែករំលែក និងទ្រព្យសម្បត្តិទៅរដ្ឋបាលថ្នាក់ក្រោមជាតិ
• ពិនិត្យ និងផ្តល់យោបល់លើការរៀបចំ និងការកែលម្អប្រព័ន្ធគ្រប់គ្រងហិរញ្ញវត្ថុ ប្រព័ន្ធ នីតិវិធី និងដំណើរការកសាងផែនការអភិវឌ្ឍន៍ កម្មវិធីវិនិយោគ ផែនការសកម្មភាព និងថវិកាប្រចាំឆ្នាំរបស់រដ្ឋបាលថ្នាក់ក្រោមជាតិ ព្រមទាំងជម្រើសនានាសម្រាប់ការបង្កើតប្រភពចំណូលផ្ទាល់នៅមូលដ្ឋាន និងការរៀបចំប្រព័ន្ធបែងចែកធនធានទៅឱ្យរដ្ឋបាលថ្នាក់ក្រោមជាតិប្រកបដោយសមធម៌
• ពិនិត្យ និងផ្តល់យោបល់លើការរៀបចំ និងការកែលម្អប្រព័ន្ធគ្រប់គ្រងទិន្នន័យមូលដ្ឋាននានាសម្រាប់ការកសាងផែនការអភិវឌ្ឍន៍ កម្មវិធីវិនិយោគ ផែនការសកម្មភាពនិងថវិកាប្រចាំឆ្នាំរបស់រដ្ឋបាលថ្នាក់ក្រោមជាតិ
• ពិនិត្យ និងផ្តល់យោបល់លើការរៀបចំបន្ស៉ីគ្នារវាងការកសាងផែនការអភិវឌ្ឍន៍ និងកម្មវិធីវិនិយោគជាមួយនឹងដំណើរការរៀបចំគម្រោងថវិការបស់រដ្ឋបាលថ្នាក់ក្រោមជាតិ
• ពិនិត្យ និងផ្តល់យោបល់លើការរៀបចំស្តង់ដា និងបែបបទសម្រាប់ការធ្វើសវនកម្មផ្ទៃក្នុង និងផ្ទៃក្រៅលើការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ
• ពិនិត្យ និងផ្តល់យោបល់លើការរៀបចំយន្តការគាំទ្រ​ អភិវឌ្ឍសមត្ថភាព តាមដាន ត្រួតពិនិត្យ និងវាយតម្លៃលើការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ និងការរៀបចំផែនការអភិវឌ្ឈន៍ និងកម្មវិធីវិនិយោគរបស់រដ្ឋបាលថ្នាក់ក្រោមជាតិ
• បំពេញភារកិច្ចផ្សេងទៀតតាមការណែនាំរបស់ គ.ជ.អ.ប.។