សិក្ខាសាលានេះ បានប្រព្រឹត្តទៅក្រោមអធិបតីភាព លោក ខោល យុទ្ធលី អនុប្រធានអង្គភាពវិភាគ និងអភិវឌ្ឍន៍គោលនយោបាយ តំណាងដ៏ខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. និង លោក ម៉ែន គុណរ័ត្ន ប្រធានក្រុមការងារវិមជ្ឈការនៃកម្មវិធីធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋនៅប្រទេសកម្ពុជាដំណាក់កាលទី២ (GIZ-ISDII) ព្រមទាំងមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសនៃលេខាធិការដ្ឋាន គ.ជ.អ.ប. តំណាងក្រសួងកិច្ចការនារី តំណាងក្រសួងមុខងារសាធារណៈ តំណាងក្រសួងអប់រំ យុវជន និងកីឡា តំណាងក្រសួងសុខាភិបាល តំណាងអគ្គនាយកដ្ឋានរដ្ឋបាល ក្រសួងមហាផ្ទៃ តំណាងសាលាជាតិរដ្ឋបាលមូលដ្ឋាន ព្រមទាំងតំណាងដៃគូអភិវឌ្ឍន៍ និងអង្គការសង្គមស៊ីវិលពាក់ព័ន្ធ សរុបចំនួន ២៨ រូប (ស្រ្តី១៣រូប)។

ក្នុងដំណើរការនៃសិក្ខាសាលានាថ្ងៃទី២នេះ អង្គសិក្ខាសាលាបានស្តាប់បទបង្ហាញសង្ខេបអំពីសេចក្តីព្រាងសេចក្តីណែនាំស្តីពីការបង្កើនចំនួនស្ត្រីក្នុងមុខតំណែងគ្រប់គ្រងនៅរដ្ឋបាលរាជធានី ខេត្ត ក្រុង ស្រុក ខណ្ឌ សម្របសម្រួលដោយ លោក ផ្លិច មាស និងបទបង្ហាញសង្ខេបអំពីសេចក្តីព្រាងសេចក្តីណែនាំស្តីពីការបង្កើតបរិយាកាសមេត្រីភាព និងលក្ខខណ្ឌអំណោយផលនៅកន្លែងបំពេញការងារ និងការអនុវត្តតួនាទីភារកិច្ចរបស់បុគ្គលិកនៅរដ្ឋបាលថ្នាក់ក្រោមជាតិ សម្របសម្រួលដោយ លោក មាស ជីវុធ អនុប្រធាននាយកដ្ឋានសមភាពយេនឌ័រ នៃក្រសួងកិច្ចការនារី។អង្គសិក្ខាសាលាបានបែងចែកជាក្រុមពិភាក្សា ដើម្បីពិគ្រោះយោបល់ និងប្រមូលធាតុចូលយ៉ាងផុលផុសលើសេចក្តីព្រាងសេចក្តីណែនាំទាំងពីរ ក្រោមការសម្របសម្រួលពី កញ្ញា ជួន សុម៉ាលី និង លោក ផុន សុខា ព្រមទាំងបានធ្វើការបង្ហាញលទ្ធផលពិភាក្សាតាមក្រុមនីមួយៗ ដើម្បីបូកសរុបធាតុចូល។

សូមបញ្ជាក់ថា សិក្ខាសាលានេះរៀបចំឡើងក្នុងគោលបំណងពិនិត្យ ពិភាក្សា និងប្រមូលធាតុចូលបន្ថែម សម្រាប់កែសម្រួលសេចក្តីព្រាងសេចក្តីណែនាំទាំងពីរឱ្យមានលក្ខណៈគ្រប់ជ្រុងជ្រោយ អាចអនុវត្តបាន និងឆ្លើយតបស្របតាមស្ថានភាពជាក់ស្តែង ព្រមទាំងតម្រូវការរបស់រដ្ឋបាលថ្នាក់ក្រោមជាតិ។ ការរៀបចំសេចក្តីណែនាំទាំងពីរនេះ គឺជាជំហានគន្លឹះក្នុងការជំរុញការអនុវត្ត «ផែនការយុទ្ធសាស្ត្រស្តីពីការបង្កើនចំនួនស្ត្រីក្នុងមុខតំណែងគ្រប់គ្រងនៅរដ្ឋបាលថ្នាក់ក្រោមជាតិ (២០២៤-២០២៨)» ឱ្យមានប្រសិទ្ធភាពខ្ពស់ និងសម្រេចបានតាមគោលដៅរំពឹងទុក ដើម្បីលើកកម្ពស់សមភាពយេនឌ័រ បរិយាបន្ន សមធម៌សង្គម និងពង្រឹងភាពអង់អាចដល់ស្ត្រី ស្របតាមទិសដៅនៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិ ដំណាក់កាលទី២ (២០២១-២០៣០)។

ជាកិច្ចបិទបញ្ចប់សិក្ខាសាលា លោក ខោល យុទ្ធលី បានថ្លែងអំណរគុណ និងវាយតម្លៃខ្ពស់ចំពោះការចូលរួមយ៉ាងសកម្ម និងការផ្តល់ធាតុចូលយ៉ាងផុលផុសពីសំណាក់តំណាងក្រសួង-ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិលទាំងអស់។ លោកបានគូសបញ្ជាក់ថា ក្រុមការងារបច្ចេកទេសនៃលេខាធិការដ្ឋាន គ.ជ.អ.ប. និងក្រសួងកិច្ចការនារី នឹងប្រមូលបូកសរុប រៀបចំ កែសម្រួល និងសម្រិតសម្រាំងរាល់ធាតុចូលដ៏មានតម្លៃទាំងនេះ ដើម្បីធានាឱ្យការរៀបចំសេចក្តីព្រាងសេចក្តីណែនាំទាំងពីរ កាន់តែមានភាពគ្រប់ជ្រុងជ្រោយ មានលក្ខណៈប្រាកដនិយម និងអាចយកទៅអនុវត្តទទួលបានលទ្ធផលជាវិជ្ជមាននាពេលខាងមុខ។ ជាមួយគ្នានេះដែរ លោកក៏បានថ្លែងអំណរគុណយ៉ាងជ្រាលជ្រៅជូនចំពោះកម្មវិធី GIZ-ISDII ដែលបានផ្តល់ការឧបត្ថម្ភគាំទ្រយ៉ាងពេញទំហឹងក្នុងការរៀបចំសិក្ខាសាលានេះឡើង ប្រកបដោយជោគជ័យ និងទទួលបានផ្លែផ្កាជាផ្លូវការ៕