ជំនួបពិភាក្សានេះ បានផ្តោតការយកចិត្តទុកដាក់ជាសំខាន់ទៅលើការស្វែងរកទិសដៅយុទ្ធសាស្ត្រ ដើម្បីពង្រឹងកិច្ចសហប្រតិបត្តិការរវាងលេខាធិការដ្ឋាន គ.ជ.អ.ប. និង ADB លើវិស័យកសិកម្ម និងការអភិវឌ្ឍជនបទ។ កិច្ចពិភាក្សាបានសង្កត់ធ្ងន់ជាពិសេសលើការជំរុញការអភិវឌ្ឍជនបទតាមបែបវិមជ្ឈការ ការធ្វើប្រតិភូកម្មមុខងារ និងការផ្ទេរធនធានទៅកាន់រដ្ឋបាលថ្នាក់ក្រោមជាតិ ព្រមទាំងការពង្រឹងសមត្ថភាពស្ថាប័នរដ្ឋបាលមូលដ្ឋាន សំដៅធានាប្រសិទ្ធភាពក្នុងការបំពេញតួនាទី និងការផ្តល់សេវាសាធារណៈជូនប្រជាពលរដ្ឋឱ្យកាន់តែប្រសើរឡើង។

ទន្ទឹមនឹងនេះ ភាគីទាំងពីរបានផ្លាស់ប្តូរមតិយោបល់យ៉ាងលម្អិតជុំវិញដំណើរការត្រៀមអនុវត្ត «គម្រោងអភិវឌ្ឍសេដ្ឋកិច្ចកសិករខ្នាតតូចធន់នឹងការប្រែប្រួលអាកាសធាតុ (SRED-SP)» ដោយផ្តោតលើការរៀបចំយន្តការគ្រប់គ្រង នីតិវិធីលទ្ធកម្ម និងការសម្របសម្រួលយ៉ាងជិតស្និទ្ធរវាងស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិពាក់ព័ន្ធ។ គោលដៅចម្បង គឺដើម្បីធានាឱ្យការអនុវត្តគម្រោងនេះអាចដំណើរការទៅបានដោយរលូន ទាន់ពេលវេលា និងប្រកបដោយប្រសិទ្ធភាពខ្ពស់។

ក្នុងឱកាសនោះ ឯកឧត្តម ចាន់ សុធា បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះធនាគារ ADB ដែលតែងតែបន្តគាំទ្រយ៉ាងសកម្មដល់កម្មវិធីកំណែទម្រង់វិមជ្ឈការនិងវិសហមជ្ឈការ ការអភិវឌ្ឍជនបទ និងការពង្រឹងភាពធន់របស់សហគមន៍មូលដ្ឋាននៅកម្ពុជា។

ឯកឧត្តមរដ្ឋលេខាធិការ ក៏បានគូសបញ្ជាក់យ៉ាងច្បាស់ពីសារៈសំខាន់នៃការបន្តប្រើប្រាស់ប្រព័ន្ធ និងយន្តការរបស់រដ្ឋបាលថ្នាក់ក្រោមជាតិដែលមានស្រាប់សម្រាប់អនុវត្តគម្រោង ដើម្បីលើកកម្ពស់ភាពជាម្ចាស់ ធានាបាននូវគណនេយ្យភាព និងរក្សាបាននូវនិរន្តរភាពនៃសមិទ្ធផល ក្រោយពេលគម្រោងត្រូវបានបញ្ចប់។

ជាលទ្ធផលនៃកិច្ចជំនួប ភាគីទាំងពីរបានប្តេជ្ញាឯកភាពគ្នាក្នុងការបន្តពង្រឹងកិច្ចសហប្រតិបត្តិការ និងការសម្របសម្រួលឱ្យកាន់តែស្អិតរមួត ដើម្បីជំរុញការអនុវត្តគម្រោង SRED-SP ឱ្យសម្រេចបានជោគជ័យតាមគោលដៅរំពឹងទុក។

បន្ថែមពីនេះ ភាគីទាំងពីរក៏នឹងបន្តស្វែងរកកាលានុវត្តភាពនៃកិច្ចសហប្រតិបត្តិការថ្មីៗបន្ថែមទៀត ដើម្បីគាំទ្រដល់របៀបវារៈនៃការអភិវឌ្ឍជនបទតាមបែបវិមជ្ឈការ ការកសាងសមត្ថភាពរដ្ឋបាលថ្នាក់ក្រោមជាតិ ការលើកកម្ពស់កម្រិតជីវភាព និងការកសាងភាពធន់របស់ប្រជាពលរដ្ឋនៅមូលដ្ឋានឱ្យកាន់តែរឹងមាំ៕