សិក្ខាសាលានេះ បានរៀបចំឡើងក្នុងគោលបំណងដើម្បី៖

១.ធ្វើការពិនិត្យ ពិភាក្សា និងផ្តល់យោបល់លើសេចក្តីព្រាងការពិពណ៌នាមុខតំណែងរបស់បុគ្គលិករដ្ឋបាលខេត្ត ឱ្យស្របទៅនឹងរចនាសម្ព័ន្ធ មុខងារ តួនាទី ភារកិច្ច និងការទទួលខុសត្រូវរបស់អង្គភាពនីមួយៗ

២.ដើម្បីប្រមូលធាតុចូលបំពេញបន្ថែម និងកែសម្រួលបញ្ចប់សេចក្តីព្រាងការពិពណ៌នាមុខតំណែងរបស់បុគ្គលិករដ្ឋបាលរាជធានី ខេត្ត។

ការរៀបចំ និងការដាក់ឱ្យអនុវត្តប្រព័ន្ធគ្រប់គ្រងផ្អែកលើសមិទ្ធកម្ម គឺជាកិច្ចការដ៏ចាំបាច់ និងមាន សារៈ សំខាន់ក្នុងការលើកកម្ពស់ប្រសិទ្ធភាពនៃការបំពេញការងាររបស់បុគ្គលិក សំដៅធានាដល់ការសម្រេចបាននូវគោលដៅ បេសកកម្ម និងការទទួលខុសត្រូវរបស់អង្គភាពនីមួយៗនៃរដ្ឋបាលថ្នាក់ក្រោមជាតិ។ ផ្អែកលើការងារដ៏មានសារៈសំខាន់នេះ កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ (កជទី២) បាននិងកំពុងរៀបចំ និងដាក់អនុវត្តនូវប្រព័ន្ធគ្រប់គ្រងផ្អែកលើសមិទ្ធកម្មនៅរដ្ឋបាលថ្នាក់ក្រោមជាតិ តាមរយៈការរៀបចំការពិពណ៌នាមុខតំណែង ការកំណត់លក្ខខណ្ឌការងារ ការគ្រប់គ្រងវត្តមានរបស់បុគ្គលិក ការ វាយតម្លៃលើលទ្ធផលនៃការបំពេញការងារ ក៏ដូចជាការលើកទឹកចិត្តដល់ បុគ្គលិកនៃរដ្ឋបាលថ្នាក់ក្រោមជាតិ។

លទ្ធផលនៃការរៀបចំការពិពណ៌នាមុខតំណែង និងលទ្ធផលនៃវាយតម្លៃផ្អែកលើសមិទ្ធកម្ម គឺជាមូលដ្ឋានសម្រាប់ការតែងតាំង ការដំឡើងឋានន្តរស័ក្តិ ថ្នាក់ ការអភិវឌ្ឍសមត្ថភាព ការលើកទឹកចិត្ត ក៏ដូចជាការដាក់ទណ្ឌកម្មខាងវិន័យផងដែរ។ ឯកសារពិពណ៌នាមុខតំណែង គឺជាឯកសារដែលបានរៀបរាប់លម្អិតអំពីតួនាទី ភារកិច្ច ការ ទទួលខុសត្រូវ និងខ្សែគណនេយ្យភាព ព្រមទាំងលក្ខណៈសម្បត្តិសមស្របសម្រាប់មុខតំណែ ងនីមួយៗប្រកបដោយភាពច្បាស់លាស់។