កម្មវិធី “ធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋនៅប្រទេសកម្ពុជា (ហៅកាត់ថា ISD)” ដែលអនុវត្តដោយ Deutsche Gesellschaft für International Zusammenarbeit (GIZ) " ជី អាយ ហ្សេត " ជាមួយ លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (លេខាធិការដ្ឋាន គ.ជ.អ.ប.) ចាប់ពីថ្ងៃទី០១ ខែមីនា ឆ្នាំ២០២២ រហូតដល់ថ្ងៃទី៣១ ខែធ្នូ ឆ្នាំ២០២៥។ កម្មវិធី ISD បានទទួលមូលនិធិគាំទ្រពីរដ្ឋាភិបាលអាល្លឺម៉ង់ រដ្ឋាភិបាលស្វីស តាមរយៈទីភ្នាក់ងារស្វីសសម្រាប់ការអភិវឌ្ឍ និងសហប្រតិបត្តិការ និងរដ្ឋាភិបាលលុចសំបួ តាមរយៈទីភ្នាក់ងារលុចសំបួសម្រាប់កិច្ចសហប្រតិបត្តិការអភិវឌ្ឍន៍ (LuxAid)។ កម្មវិធី ISD គាំទ្រដល់រដ្ឋបាលថ្នាក់ក្រោមជាតិ ពិសេសរដ្ឋបាលក្រុងស្រុកដៃគូ ក្នុងការធ្វើឱ្យប្រសើរឡើងដល់ការផ្តល់សេវាជូន ប្រជាពលរដ្ឋ ពាក់ព័ន្ធនឹងការរៀបចំ ការអនុវត្តផែនការយុទ្ធសាស្ត្រ និងនីតិវិធីនានា ប្រកបដោយប្រសិទ្ធភាពនៅក្នុង វិស័យអាទិភាពមួយចំនួន។

កម្មវិធី ISD ផ្តោតលើកិច្ចការសំខាន់ៗមួយចំនួនដូចជា៖

(១) ការអនុវត្តកម្មវិធីជាតិ ស្តីពី ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិឆ្នាំ ២០២១-២០៣០ (NP-2) ពិសេសក្នុងវិស័យសុខាភិបាល និងការលើកកម្ពស់ស្ត្រីដែលបម្រើការងារនៅរដ្ឋបាលថ្នាក់ក្រោមជាតិ

(២) ការផ្តល់សេវារដ្ឋបាលដោយការិយាល័យច្រកចេញចូលតែមួយ (OWSO) តាមបែបឌីជីថល និងការផ្តល់សេវាចល័ត

(៣) ការរៀបចំ និងការអនុវត្តផែនការគ្រប់គ្រងទឹក និងផែនការគ្រប់គ្រងសំរាម សំណល់រឹង ដែលធននឹងការប្រែប្រួលអាកាសធាតុ

(៤) ការពង្រឹងសិទ្ធិអំណាចរបស់ប្រជាពលរដ្ឋក្នុងដំណើរការធ្វើសេចក្តីសម្រេចចិត្ត និងការពង្រឹងយន្តការបណ្តឹងតវ៉ានៅថ្នាក់ក្រុងស្រុក និង

(៥) ការពង្រឹងកិច្ចការហិរញ្ញវត្ថុរបស់រដ្ឋបាលក្រុង ស្រុកពាក់ព័ន្ធនឹងថវិកាសម្រាប់ផ្ដល់សេវា និងការគ្រប់គ្រងហិរញ្ញវត្ថុ។