វេទិកានេះត្រូវបានរៀបចំឡើងដោយ ធនាគារអភិវឌ្ឍន៍ជនបទ និងកសិកម្ម (ARDB) សហការជាមួយ សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅមជ្ឈមណ្ឌលសន្និបាត និងពិព័រណ៍កោះពេជ្រ។ កម្មវិធីនេះក៏មានការអញ្ជើញចូលរួមពីសំណាក់តំណាងក្រសួង-ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ គ្រឹះស្ថានធនាគារ និងហិរញ្ញវត្ថុ វិស័យឯកជន ព្រមទាំងតំណាងសហគ្រាសធុនមីក្រូ តូច និងមធ្យមយ៉ាងច្រើនកុះករ។

វេទិកានេះមានគោលបំណងលើកកម្ពស់ការយល់ដឹង និងពង្រឹងលទ្ធភាពទទួលបានហិរញ្ញប្បទានរបស់សហគ្រាសធុនមីក្រូ តូច និងមធ្យម តាមរយៈការផ្សព្វផ្សាយព័ត៌មានអំពីប្រភពទុន លក្ខខណ្ឌ និងនីតិវិធីទទួលបានហិរញ្ញប្បទាន ការពង្រឹងសមត្ថភាពរៀបចំឯកសារ និងព័ត៌មានហិរញ្ញវត្ថុ ព្រមទាំងការស្វែងរកដំណោះស្រាយចំពោះបញ្ហាប្រឈមនានា។ ជាមួយគ្នានេះ វេទិកាក៏ផ្តោតលើការពង្រឹងកិច្ចសហប្រតិបត្តិការរវាងស្ថាប័នរដ្ឋគ្រឹះស្ថានផ្តល់ហិរញ្ញប្បទាន និងវិស័យឯកជន ដើម្បីបង្កើតជម្រើសហិរញ្ញប្បទានឱ្យកាន់តែសម្បូរបែប និងឆ្លើយតបចំតម្រូវការជាក់ស្តែងរបស់សហគ្រាស៕