សិក្ខាសាលាផ្សព្វផ្សាយឧបករណ៍ វិធីសាស្ត្របញ្ជ្រាបយេនឌ័រ និងបរិយាបន្នសង្គមក្នុងមូលនិធិអាកាសធាតុសម្រាប់រដ្ឋបាលថ្នាក់ក្រោមជាតិ

០៣ វិច្ឆិកា ២០២៦

ខេត្តសៀមរាប៖ ថ្ងៃអង្គារ ៨រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែវិច្ឆិកា ឆ្នាំ២០២៦ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ ឯកឧត្តម ចាន់ សុធា 
រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញដឹកនាំសិក្ខាសាលាផ្សព្វផ្សាយឧបករណ៍ និងវិធីសាស្ត្របញ្ជ្រាបយេនឌ័រ និងបរិយាបន្នសង្គមក្នុងមូលនិធិអាកាសធាតុសម្រាប់រដ្ឋបាលថ្នាក់ក្រោមជាតិ នៅសណ្ឋាគារ សោមាទេវី អង្គរ រីសត និងស្ប៉ា ខេត្តសៀមរាប ក្រោមកិច្ចសហការគាំទ្រពីទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) និងកម្មវិធីបរិស្ថាននៃអង្គការសហប្រជាជាតិ (UNEP)។
សិក្ខាសាលានេះមានមតិចំណាប់អារម្មណ៍ពីលោកជំទាវ ម៉ននី រង្សី អភិបាលរងនៃគណៈអភិបាលខេត្តសៀមរាប  និងលោកស្រី Zhengzheng Qu តំណាងកម្មវិធីបរិស្ថាននៃអង្គការភាពការសហប្រជាជាតិ(UNEP) លោក សាំង ហៃ តំណាង GIZ  និងមានការអញ្ជើញចូលរួមពីតំណាងក្រសួងកិច្ចការនារី ក្រសួងបរិស្ថាន អភិបាលរងខេត្តទាំង២៤ ទីចាត់ការផែនការ និងវិនិយោគ មន្ត្រីជំនាញតាម
វិស័យនៃរដ្ឋបាលខេត្តសៀមរាប តំណាងអង្គការសង្គមស៊ីវិល ស្ថាប័នហិរញ្ញវត្ថុ ដៃគូអភិវឌ្ឍន៍ ព្រមទាំងថ្នាក់ដឹកនាំ មន្ត្រីនៃលេខាធិការដ្ឋាន គ.ជ.អ.ប. និងក្រុមការងារគម្រោង EmPower សរុបចំនួន ៩៨រូប ស្រី៥០។

សិក្ខាសាលានេះ រៀបចំឡើងក្នុងគោលបំណងសំខាន់ៗ ៖
១. ផ្ដល់វេទិកាសម្រាប់ការផ្លាស់ប្ដូរមតិយោបល់ និងចែករំលែកបទពិសោធន៍៖ លើកកម្ពស់ការចែករំលែកបទពិសោធន៍ និងមេរៀនជោគជ័យពីការអនុវត្តការងារបញ្ជ្រាបយេនឌ័រ និងបរិយាបន្នសង្គមនៅថ្នាក់ក្រោមជាតិ។
២. ផ្សព្វផ្សាយឧបករណ៍ និងវិធីសាស្ត្របច្ចេកទេស៖ ផ្សព្វផ្សាយជាផ្លូវការនូវឧបករណ៍ និងវិធីសាស្ត្របញ្ជ្រាបយេនឌ័រ និងបរិយាបន្នសង្គម ដើម្បីប្រើប្រាស់ជាមូលដ្ឋានក្នុងការរៀបចំផែនការអភិវឌ្ឍន៍ និងការអនុវត្តសកម្មភាពពាក់ព័ន្ធនឹងការប្រែប្រួលអាកាសធាតុនៅថ្នាក់ជាតិ និងថ្នាក់ក្រោមជាតិ។
៣. លើកកម្ពស់ការយល់ដឹង និងការចូលរួមរបស់ភាគីពាក់ព័ន្ធ៖ ជំរុញការយល់ដឹង និងការចូលរួមក្នុងការប្រើប្រាស់ឧបករណ៍ និងវិធីសាស្ត្រទាំងនេះ ដើម្បីធានានិរន្តរភាព និងប្រសិទ្ធភាពនៃការអនុវត្តការងារនាពេលអនាគត។
ក្នុងឱកាសនៃសិក្ខាសាលានេះ ក៏បានរៀបចំវេទិកាពិភាក្សា និងការចែករំលែកបទពិសោធន៍អំពីនិរន្តរភាព ប្រែក្លាយពីឧបករណ៍ឆ្លើយតបនឹងយេនឌ័រ និងបរិយាបន្នសង្គម ទៅជាការអនុវត្តជាក់ស្តែង  នៃការបញ្ជ្រាបយេនឌ័រ និងបរិយាបន្នសង្គមក្នុងមូលនិធិអាកាសធាតុសម្រាប់រដ្ឋបាលថ្នាក់ក្រោមជាតិ៕

Facebook Telegram 𝕏Twitter LinkedIn