ដំណើរបំពេញទស្សនកិច្ចសិក្សារបស់គណៈប្រតិភូកម្ពុជាទៅកាន់សាធារណរដ្ឋប្រជាមានិតចិន

០១ តុលា ២០២៦

សាធារណរដ្ឋប្រជាមានិតចិន ៖ ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពីឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញចូលរួមជាសមាជិកគណៈប្រតិភូកម្ពុជា បំពេញទស្សនកិច្ចសិក្សារយៈពេល ១០ថ្ងៃ ចាប់ពីថ្ងៃទី២១ ដល់ថ្ងៃទី៣០ ខែកញ្ញា ឆ្នាំ២០២៦ នៅទីក្រុងប៉េកាំង ខេត្តសានដុង និងតំបន់ស្វយ័តក្វាងស៊ី នៃសាធារណរដ្ឋប្រជាមានិតចិន ដឹកនាំដោយឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា។

ទស្សនកិច្ចសិក្សានេះ មានគោលបំណងសិក្សាស្វែងយល់អំពី ការរៀបចំស្ថាប័នបណ្តុះបណ្តាលមន្ត្រីរាជការ ការរៀបចំ និងការអនុវត្តគោលនយោបាយ ការអភិវឌ្ឍតំបន់សេដ្ឋកិច្ចពិសេស និងតំបន់អភិវឌ្ឍន៍សួនឧស្សាហកម្ម កំពង់ផែ ប្រព័ន្ធដឹកជញ្ជូន និងយន្តការទាក់ទាញការវិនិយោគ ព្រមទាំងមូលដ្ឋានគ្រឹះ នៃការអភិវឌ្ឍសេដ្ឋកិច្ចរបស់ប្រទេសចិន។

ក្នុងអំឡុងពេលនៃដំណើរទស្សនកិច្ច គណៈប្រតិភូកម្ពុជាបានជួបសម្តែងការគួរសម និងពិភាក្សាការងារជាមួយថ្នាក់ដឹកនាំនៃទីក្រុងប៉េកាំង ខេត្តសានដុង និងតំបន់ស្វយ័តក្វាងស៊ី ព្រមទាំងបានចូលរួមស្តាប់បទឧទ្ទេសនាម និងទស្សនកិច្ចនៅស្ថាប័នបណ្តុះបណ្តាលថ្នាក់ជាតិ និងថ្នាក់មូលដ្ឋាន។

ជាមួយគ្នានេះ គណៈប្រតិភូបានទស្សនកិច្ចនៅ សាកលវិទ្យាល័យកិច្ចការបរទេសចិន (China Foreign Affairs University) មជ្ឈមណ្ឌលសហប្រតិបត្តិការអនុវត្តបញ្ញាសិប្បនិម្មិតរវាងចិន និងអាស៊ាន ព្រែកជីកភីងលូ សារមន្ទីរជនជាតិក្វាងស៊ី សារមន្ទីរខុងជឺ និងទីតាំងសំខាន់ៗពាក់ព័ន្ធនឹងការអភិវឌ្ឍសេដ្ឋកិច្ច និងពាណិជ្ជកម្ម។

គណៈប្រតិភូក៏បានបន្តទស្សនកិច្ចទៅកាន់ សួនឧស្សាហកម្មចិន-ម៉ាឡេស៊ីឈីនចូវ ស្ថានីយ៍កុងតឺន័រផ្លូវដែក កំពង់ផែឆ្លាតវៃ ក្រុមហ៊ុន Shandong High-Speed Group និងតំបន់ពាណិជ្ជកម្មសេរីនៃទីក្រុងជីណាន ដើម្បីសិក្សាអំពីការរៀបចំ និងការគ្រប់គ្រងតំបន់សេដ្ឋកិច្ច ការតភ្ជាប់ហេដ្ឋារចនាសម្ព័ន្ធ ប្រព័ន្ធ ដឹកជញ្ជូន ការគ្រប់គ្រងភស្តុភារ និងការលើកកម្ពស់សកម្មភាពឧស្សាហកម្ម ពាណិជ្ជកម្ម និងវិនិយោគ។

បន្ថែមពីនេះ គណៈប្រតិភូបានស្តាប់បទឧទ្ទេសនាមស្តីពី ការរៀបចំ និងការអនុវត្តផែនការប្រាំឆ្នាំលើកទី១៥ របស់ប្រទេសចិន ព្រមទាំងទស្សនវិស័យនៃការអភិវឌ្ឍសេដ្ឋកិច្ចចិន ដើម្បីស្វែងយល់អំពីបទពិសោធន៍ក្នុងការរៀបចំផែនការអភិវឌ្ឍន៍រយៈពេលមធ្យម និងវែង យន្តការគ្រប់គ្រងគ្រោះមហន្តរាយ និងការផ្សព្វផ្សាយព័ត៌មានជូនប្រជាជនអំពីផលប៉ះពាល់ពីការប្រែប្រួលអាកាសធាតុ។

ដំណើរទស្សនកិច្ចសិក្សារយៈពេល ១០ថ្ងៃនេះ បានផ្តល់ឱកាសឱ្យគណៈប្រតិភូកម្ពុជាសិក្សាស្វែងយល់ និងផ្លាស់ប្តូរបទពិសោធន៍ថ្មីៗជាមួយភាគីចិន ពាក់ព័ន្ធនឹងការអភិវឌ្ឍគ្រឹះស្ថានបណ្តុះបណ្តាលមន្ត្រីសាធារណៈ ការរៀបចំគោលនយោបាយ ការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធ ការអភិវឌ្ឍប្រព័ន្ធឌីជីថល និងបញ្ញាសិប្បនិម្មិត ព្រមទាំងការទាក់ទាញការវិនិយោគ។

ជារួម ដំណើរទស្សនកិច្ចសិក្សានេះបានប្រព្រឹត្តទៅដោយជោគជ័យ ព្រមទាំងទទួលបានការស្វាគមន៍យ៉ាងកក់ក្តៅ និងការទទួលបដិសណ្ឋារកិច្ចយ៉ាងល្អប្រសើរពីសំណាក់មិត្តចិន។ ជាពិសេស ដំណើរទស្សនកិច្ចនេះ បានរួមចំណែកពង្រឹង ចំណងមិត្តភាព សាមគ្គីភាព និងកិច្ចសហប្រតិបត្តិការរវាងកម្ពុជា និងចិន ព្រមទាំងផ្តល់នូវទស្សនទាន និងបទពិសោធន៍ថ្មីៗសម្រាប់ជាប្រយោជន៍ដល់ការអភិវឌ្ឍ និងកិច្ចសហប្រតិបត្តិការនាពេលអនាគត។

Facebook Telegram 𝕏Twitter LinkedIn

បណ្ដុំរូបភាព

ព្រឹត្តិការណ៍ថ្មីៗ

វេទិកា សប្តាហ៍គាំពារសង្គមកម្ពុជា ឆ្នាំ២០២៦ ក្រោមមូលបទ «ប្រព័ន្ធគាំពារសង្គមក្នុងពេលពហុវិបត្តិ (Polycrisis) ក្នុងបរិបទកម្ពុជា និងតំបន់៖ នវានុវត្តន៍ កិច្ចសហប្រតិបត្តិការ ភាពធន់ និងចីរភាព»

០១ តុលា ២០២៦