អង្គសិក្ខាសាលានេះ ក៏មានការអញ្ជើញចូលរួមពីតំណាងអង្គការ UNDP ដឹកនាំដោយ លោក ឈុំ សុវណ្ណនី អ្នកវិភាគកម្មវិធីជាន់ខ្ពស់ នៃអង្គការ UNDP ប្រចាំកម្ពុជា ព្រមទាំងតំណាងរដ្ឋបាលថ្នាក់ក្រោមជាតិ មន្ទីរជំនាញពាក់ព័ន្ធ ដៃគូអភិវឌ្ឍន៍ អង្គការសង្គមស៊ីវិល និងតំណាងវិស័យឯកជន/ស្ថាប័នហិរញ្ញវត្ថុ មកពីខេត្តព្រះវិហារ ខេត្តពោធិ៍សាត់ ស្រុកជាំក្សាន្ត និងស្រុកបាកាន សរុបចំនួន ៤២ រូប។

សិក្ខាសាលានេះ រៀបចំឡើងក្រោមប្រកបដោយកិច្ចសហការរវាង លេខាធិការដ្ឋាន គ.ជ.អ.ប និងអង្គការ UNDP ក្នុងគោលបំណងពិភាក្សា ពិគ្រោះយោបល់ និងប្រមូលធាតុចូលពីភាគីពាក់ព័ន្ធ ដើម្បីរៀបចំសំណើគម្រោងដែលមានលក្ខណៈត្រៀមរួចរាល់សម្រាប់ការវិនិយោគ សំដៅឆ្លើយតបទៅនឹងការប្រែប្រួលអាកាសធាតុនៅថ្នាក់ស្រុក ដោយផ្អែកលើភស្តុតាងជាក់ស្តែង និងការចូលរួមពីគ្រប់ភាគីពាក់ព័ន្ធ។ លទ្ធផលនៃសិក្ខាសាលានេះ នឹងត្រូវចងក្រងជាមេរៀន និងបទពិសោធន៍ ក្នុងការពង្រឹងសមត្ថភាពដល់រដ្ឋបាលថ្នាក់ក្រោមជាតិ លើការរៀបចំសំណើគម្រោងវិនិយោគបន្ស៊ាំនឹងការប្រែប្រួលអាកាសធាតុ ឱ្យស្របតាមតម្រូវការអាទិភាពនៃការអភិវឌ្ឍនៅមូលដ្ឋាន។

សិក្ខាសាលាពិគ្រោះយោបល់នេះ បានបិទបញ្ចប់ទៅវិញក្រោមអធិបតីភាពរបស់ លោកស្រី Petra Pontier មន្ត្រីគោលនយោបាយបរិស្ថាន និងការប្រែប្រួលអាកាសធាតុ នៃអង្គការ UNDP ប្រចាំប្រទេសកម្ពុជា។ អង្គសិក្ខាសាលាសម្រេចបាននូវលទ្ធផលសំខាន់ៗ រួមមាន៖ ការកំណត់បញ្ជីសកម្មភាពវិនិយោគអាទិភាព និងការកំណត់ជំហានបន្តច្បាស់លាស់ សម្រាប់ការកៀរគរប្រភពហិរញ្ញប្បទានសក្តានុពលនានា ដូចជា មូលនិធិបន្ស៊ាំនឹងអាកាសធាតុ (AF), មូលនិធិ LDCF និង SCCF ដើម្បីគាំទ្រដល់ការអនុវត្តគម្រោងឱ្យមានប្រសិទ្ធភាព និងចីរភាព ស្របតាមផែនការជាតិឆ្លើយតបនឹងការប្រែប្រួលអាកាសធាតុ (NDC 3.0) របស់កម្ពុជា៕