គម្រោង SCALED ត្រូវបានរៀបចំឡើងស្របតាមទិសដៅយុទ្ធសាស្ត្ររបស់រាជរដ្ឋាភិបាល និងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ដោយគ្រោងអនុវត្តរយៈពេល ៥ឆ្នាំ ចាប់ពីឆ្នាំ២០២៧ ដល់ឆ្នាំ២០៣១ និងកំពុងស្នើសុំឥណទានពីសមាគមអភិវឌ្ឍន៍អន្តរជាតិ (IDA) ក្នុងទំហំប្រមាណពី ៨០ ទៅ ១០០លានដុល្លារអាមេរិក។ គម្រោងនេះរំពឹងផ្តោតជាសំខាន់លើការអភិវឌ្ឍហេដ្ឋារចនាសម្ព័ន្ធសេដ្ឋកិច្ចមូលដ្ឋានដែលមានភាពធន់នឹងការប្រែប្រួលអាកាសធាតុ ការពង្រឹងប្រព័ន្ធភាពធន់ និងសមត្ថភាពរបស់រដ្ឋបាលថ្នាក់ក្រោមជាតិ ព្រមទាំងការលើកកម្ពស់ការចូលរួមរបស់ប្រជាពលរដ្ឋ គណនេយ្យភាពសង្គម និងការផ្តល់សេវាសាធារណៈប្រកបដោយបរិយាបន្ន។

ក្នុងកិច្ចប្រជុំ ភាគីទាំងពីរបានពិនិត្យ និងផ្លាស់ប្តូរយោបល់លើទិសដៅ និងចំណុចគន្លឹះសម្រាប់បន្តការរៀបចំគម្រោង ដោយផ្តោតលើការកំណត់ឱ្យកាន់តែច្បាស់នូវ គោលបំណងអភិវឌ្ឍន៍គម្រោង និងទ្រឹស្តីនៃការផ្លាស់ប្តូរ (Theory of Change) ការកែលម្អសមាសភាគគម្រោងទាំង៤ ការកំណត់តំបន់គោលដៅ និងក្របខ័ណ្ឌលទ្ធផល ព្រមទាំងការរៀបចំស្ថាប័ន និងយន្តការអនុវត្ត។ ជាពិសេស កិច្ចប្រជុំបានផ្តោតការយកចិត្តទុកដាក់លើ យន្តការលំហូរថវិកាសម្រាប់ការវិនិយោគនៅរដ្ឋបាលថ្នាក់ក្រោមជាតិ ដែលជាចំណុចអាទិភាពសំខាន់សម្រាប់ការរៀបចំគម្រោង រួមជាមួយការគ្រប់គ្រងហិរញ្ញវត្ថុ កិច្ចលទ្ធកម្ម កិច្ចគាំពារបរិស្ថាន និងសង្គម និងយន្តការសម្របសម្រួលរវាងក្រសួង ស្ថាប័នពាក់ព័ន្ធ។

ជាលទ្ធផលភាគីទាំងពីរបានកំណត់ទិសដៅឱ្យក្រុមការងារបន្តពិភាក្សាលម្អិតលើផ្នែកបច្ចេកទេសតាមសមាសភាគនីមួយៗ និងជាមួយក្រសួង ស្ថាប័នពាក់ព័ន្ធ ដើម្បីធ្វើឱ្យការរៀបចំគម្រោងកាន់តែច្បាស់លាស់ និងអាចអនុវត្តបានជាក់ស្តែង។ លទ្ធផលនៃកិច្ចពិភាក្សាទាំងនេះនឹងត្រូវបូកសរុបក្នុងកិច្ចប្រជុំបិទបេសកកម្មនៅថ្ងៃទី២៥ ខែកញ្ញា ឆ្នាំ២០២៦ និងកំណត់ផែនការសកម្មភាពបន្ត ដើម្បីជំរុញការរៀបចំគម្រោងឆ្ពោះទៅដំណាក់កាលវាយតម្លៃ ដែលគ្រោងធ្វើនៅខែមីនា ឆ្នាំ២០២៧។