កិច្ចប្រជុំនេះរៀបចំឡើងដើម្បីពិនិត្យ ពិគ្រោះយោបល់ និងប្រមូលធាតុចូលបន្ថែមលើ "ផែនការអនុវត្តគណនេយ្យភាពសង្គម ដំណាក់កាលទី៣"។ គោលបំណងសំខាន់ គឺធានាឱ្យផែនការនេះមានភាពគ្រប់ជ្រុងជ្រោយ មាននិរន្តរភាព និងជំរុញឱ្យក្រសួង ស្ថាប័ន រដ្ឋបាលថ្នាក់ក្រោមជាតិ ព្រមទាំងអ្នកពាក់ព័ន្ធទាំងអស់ ចូលរួមអនុវត្តប្រកបដោយស្មារតីម្ចាស់ការ និងការទទួលខុសត្រូវខ្ពស់។

ថ្លែងក្នុងមតិបើកកិច្ចប្រជុំ ឯកឧត្តម ម៉ាអុន ម៉ាអូណាត បានសម្ដែងការកោតសរសើរ និងវាយតម្លៃខ្ពស់ ចំពោះឯកឧត្តម លោក លោកស្រីទាំងអស់ក្នុងការសហការ សម្របសម្រួល និងគាំទ្រដល់ការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ ជាពិសេសការអនុវត្តការងារគណនេយ្យភាពសង្គម ក្នុងគោលដៅដើម្បីលើកកម្ពស់ប្រជាធិបតេយ្យ និងអភិបាលកិច្ចនៅប្រទេសកម្ពុជា ដែលធានាដល់ការជំរុញការអភិវឌ្ឍសង្គម-សេដ្ឋកិច្ចកម្ពុជា ជាពិសេសរួមចំណែកធ្វើឱ្យប្រសើរឡើងនូវការផ្តល់សេវាសាធារណៈនៅមូលដ្ឋាន ប្រកបដោយប្រសិទ្ធភាព តម្លាភាព គណនេយ្យភាព បរិយាប័ន្ន និងសមធម៌សង្គម ដើម្បីផលប្រយោជន៍រួម និងសុខុមាលភាពរបស់ប្រជាពលរដ្ឋ ជាពិសេសស្រ្តី កុមារ និងក្រុមជនងាយរងគ្រោះនានា។

ដោយផ្អែកតាមផែនការអនុវត្តរយៈពេល៥ឆ្នាំ ដំណាក់កាលទី២ (ផអ៥ទី២) នៃកម្មវិធីជាតិដំណាក់កាលទី២ (កជទី២) បានតម្រូវឱ្យ គ.ជ.អ.ប. ត្រូវរៀបចំផែនការអនុវត្តគណនេយ្យភាពសង្គម ដំណាក់កាលទី៣ (ISAF-III) ដែលត្រូវអនុវត្តពីឆ្នាំ ២០២៦ ដល់ឆ្នាំ២០៣០ ស្របតាមក្របខ័ណ្ឌពេលវេលាជាមួយនឹងផអ៥ទី២ នៃ កជទី២ ដើម្បីបន្តពីផែនការអនុវត្តគណនេយ្យភាពសង្គមដំណាក់កាលទី ២ (ISAF-II) ត្រូវបានអនុវត្តបញ្ចប់នៅចុងឆ្នាំ២០២៥ កន្លងទៅ។

គួរជម្រាបជូនផងដែរថា សេចក្ដីព្រាងផែនការអនុវត្តគណនេយ្យភាពសង្គម ដំណាក់កាលទី៣ (២០២៦ - ២០៣០) ដែលរៀបចំឡើងដោយលេខាធិការដ្ឋាន គ.ជ.អ.ប. នេះក៏ទទួលបានការគាំទ្រថវិកាពីរដ្ឋាភិបាលអូស្ត្រាលី តាមរយៈមូលនិធិបរធនបាលកិច្ច (Trust Fund) ដែលសម្របសម្រួលដោយធនាគារពិភពលោក។ ផែនការអនុវត្តគណនេយ្យភាពសង្គម ដំណាក់កាលទី៣ (២០២៦ - ២០៣០)នេះ នឹងផ្ដោតសំខាន់ទៅលើគោលការណ៍គន្លឹះមួយចំនួនរួមមាន៖ ១). ធានានិរន្តរភាពការងារគណនេយ្យភាពសង្គម ២). ធានាអព្យាក្រឹត្យភាពផ្នែកតម្រូវការឱ្យបានក្នុងកម្រិតអតិបរមា ៣). ពង្រឹងការអនុវត្តគណនេយ្យភាពសង្គម នៅតាមឃុំ សង្កាត់ និងក្រុង ស្រុក ខណ្ឌគោលដៅបច្ចុប្បន្ន ៤). ពង្រីកការអនុវត្តគណនេយ្យភាពសង្គម នៅតាមមូលដ្ឋានរដ្ឋបាលទូទាំងប្រទេស ៥). ពង្រីកវិសាលភាពគ្របដណ្ដប់លើប្រភេទសេវាសាធារណៈបន្ថែម និង ៦). ក្រសួង ស្ថាប័នថ្នាក់ជាតិ និងថ្នាក់រាជធានី ខេត្តដើរតួនាទីជាស្ថាប័នគាំទ្រ រីឯរដ្ឋបាលមូលដ្ឋានមានតួនាទីជាស្ថាប័នអនុវត្ត។

នាឱកាសនៃសិក្ខាសាលានេះផងដែរ ក៏មានការធ្វើបទបង្ហាញដោយទីប្រឹក្សាបច្ចេកទេស ទៅលើសេចក្តីព្រាងផែនការអនុវត្តគណនេយ្យភាពសង្គម ដំណាក់កាលទី៣ (២០២៦ - ២០៣០) ក៏ដូចជាសកម្មភាព ពិភាក្សា និងពិគ្រោះយោបល់ផ្ដល់នូវធាតុចូលបន្ថែម ទៅលើសេចក្ដីព្រាងផែនការអនុវត្ត សំដៅធ្វើយ៉ាងណាធានាបាននូវសនិទានភាព និងអាចយកទៅអនុវត្តបានប្រកបដោយប្រសិទ្ធភាព។

កិច្ចប្រជុំបច្ចេកទេសនេះ ក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី ដែលជាសមាជិក សមាជិកាក្រុមការងារបច្ចេកទេសគណនេយ្យភាពសង្គម តំណាងលេខាធិការដ្ឋាន គ.ជ.អ.ប. តំណាងធនាគារពិភពលោក GIZ ក្រសួងមហាផ្ទៃ ក្រសួងផែនការ ក្រសួងសេដ្ឋកិច្ច និងហិរញ្ញវត្ថុ ក្រសួងសុខាភិបាល ក្រសួងអប់រំ យុវជន និងកីឡា សាលាជាតិរដ្ឋបាលមូលដ្ឋាន រដ្ឋបាលខេត្ត កំពង់ចាម តាកែវ កំពង់ឆ្នាំង អង្គការទស្សនៈពិភពលោកអន្តរជាតិប្រចាំកម្ពុជា អង្គការវិទ្យាស្ថានតស៊ូមតិ និងគោលនយោបាយ និងអ្នកពាក់ព័ន្ធសរុបចំនួន ៦៣រូប (ស្រី ៩រូប)៕