សូមស្វាគមន៍ចំពោះការចូលទស្សនាគេហទំព័រ គ.ជ.អ.ប.!
ដើម្បីឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់ រាជរដ្ឋាភិបាលបានដាក់ចេញនូវក្របខណ្ឌនយោបាយយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព។ រាជរដ្ឋាភិបាលបានកំណត់យកអាទិភាពគន្លឹះ ៥៖ “មនុស្ស ផ្លូវ ទឹក ភ្លើង និងបច្ចេកវិទ្យា” ជាមួយនឹងរចនាសម្ព័ន្ធនៃយុទ្ធសាស្ត្របញ្ចកោណ ដំណាក់កាលទី១ មាន៖ (១) ស្នូលនៃយុទ្ធសាស្ត្រ គឺការកែទម្រង់ និងការពង្រឹងអភិបាលកិច្ច (២) បរិស្ថានគ្របដណ្តប់ សម្រាប់ធានាបរិយាកាសអំណោយផលដល់ការអនុវត្តយុទ្ធសាស្ត្រទាំងមូល និង(៣) បញ្ចកោណយុទ្ធសាស្ត្រទាំង៥ សម្រាប់ជំរុញកំណើនសេដ្ឋកិច្ចនិងវឌ្ឍនភាពសង្គម។
ទន្ទឹមនឹងស្នូលនៃយុទ្ធសាស្ត្របញ្ចកោណខាងលើ កំណែទម្រង់វិមជ្ឈការ និងវិសហមជ្ឈការ ឬហៅថាកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិគឺជាកំណែទម្រង់អភិបាលកិច្ចដ៏មានសារៈ សំខាន់មួយរបស់រាជរដ្ឋាភិបាលដែលផ្តោតលើការរៀបចំឡើងវិញនូវរចនាសម្ព័ន្ធ និងប្រព័ន្ធគ្រប់គ្រងរដ្ឋបាលសាធារណៈនៅថ្នាក់ក្រោមជាតិដោយឈរលើគោលការណ៍គន្លឹះនានានៃអភិបាលកិច្ចល្អ។
កំណែទម្រង់អភិបាលកិច្ចគឺជាកិច្ចការដ៏មានសារៈសំខាន់ក្នុងការជំរុញការអភិវឌ្ឍសេដ្ឋកិច្ច និងសង្គម ដែលបាននិងកំពុងធ្វើទំនើបកម្មយ៉ាងទូលំទូលាយ និងស៊ីជម្រៅនូវប្រព័ន្ធអភិបាលកិច្ចតាមរយៈចក្ខុវិស័យនិងយុទ្ធសាស្ត្រស្តីពី សុខដុមនីយកម្មកិច្ចការកែទម្រង់គន្លឹះនៃរាជរដ្ឋាភិបាលរួមមាន កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ កម្មវិធីជាតិកែទម្រង់រដ្ឋបាលសាធារណៈ កម្មវិធីកែទម្រង់ប្រព័ន្ធយុត្តិធម៌ កម្មវិធីកែទម្រង់ច្បាប់ និងកម្មវិធីកែទម្រង់តាមវិស័យនានា។
ក្នុងគោលបំណងជំរុញការអនុវត្តកំណែទម្រង់វិមជ្ឈការ និងវិសហមជ្ឈការឱ្យកាន់តែស៊ីជម្រៅបន្ថែមទៀត រាជរដ្ឋាភិបាលដែលមានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ជាសេនាធិការបានសម្រេចរៀបចំនិងដាក់ឱ្យអនុវត្តនូវកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅ ថ្នាក់ក្រោមជាតិដំណាក់កាលទី១ (កជទី១) រយៈពេល១០ឆ្នាំ ចាប់ពីឆ្នាំ ២០១០-២០២០ និងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (កជទី២) រយៈពេល១០ឆ្នាំ ចាប់ពីឆ្នាំ២០២១-២០៣០ សំដៅបន្តពង្រឹងស្ថាប័នរដ្ឋបាលថ្នាក់ក្រោមជាតិឱ្យកាន់តែមានសក្តានុពលក្នុងការចូលរួមចំណែកសម្រេចបាននូវចក្ខុវិស័យរបស់រាជរដ្ឋាភិបាល ពោលគឺការប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។
ក្នុងនាមជាសេនាធិការជូនរាជរដ្ឋាភិបាលកម្ពុជាដើម្បីរួមចំណែកសម្រេចបានគោលដៅខាងលើ គ.ជ.អ.ប. បាននិងកំពុងបន្តបេសកកម្មការងារយ៉ាងស្វាហាប់ ហ្មត់ចត់ និងស្មារតីទទួលខុសត្រូវខ្ពស់ស្របតាមតួនាទី ភារកិច្ចរបស់ខ្លួនក្នុងការសម្របសម្រួល និងដឹកនាំអនុវត្តច្បាប់ស្ដីពីការគ្រប់គ្រងរដ្ឋបាលឃុំ សង្កាត់ និងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ ដែលផ្តោតជាពិសេសលើការរៀបចំឡើងវិញនូវរចនាសម្ព័ន្ធ ប្រព័ន្ធគ្រប់គ្រងរដ្ឋបាលថ្នាក់ក្រោមជាតិ ស្របតាមគោលការណ៍នៃរដ្ឋបាលឯកភាព និងគោលការណ៍អភិវឌ្ឍន៍តាមបែបប្រជាធិបតេយ្យ តាមរយៈការផ្ទេរមុខងារ ធនធាន សិទ្ធិអំណាច និងការទទួលខុសត្រូវទៅឱ្យរដ្ឋបាលថ្នាក់ក្រោមជាតិក្នុងការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន ឆ្លើយតបទៅនឹងតម្រូវការរបស់ប្រជាពលរដ្ឋក្នុងដែនសមត្ថកិច្ចនៃរដ្ឋបាលថ្នាក់ក្រោមជាតិនីមួយៗ ប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម។
ក្នុងន័យនេះ ក្នុងនាម គ.ជ.អ.ប. ខ្ញុំសូមលើកទឹកចិត្តដល់សាធារណជន និងមិត្តអ្នកអានចូលទស្សនា និងស្វែងរកព័ត៌មានតាមរយៈគេហទំព័រនេះអំពីគោលនយោបាយ ច្បាប់ លិខិតបទដ្ឋានគតិយុត្ត កម្មវិធីជាតិ របាយការណ៍សិក្សា ឯកសារពាក់ព័ន្ធនឹងកំណែទម្រង់នានា ក៏ដូចជាព័ត៌មានទាន់ហេតុការណ៍បម្រើដល់ការបំពេញបន្ថែមពុទ្ធិរបស់មិត្តអ្នកអាននិងសូមស្វាគមន៍ចំពោះការផ្ដល់ជាមតិយោបល់ផងដែរ។ ជាទីបញ្ចប់ ខ្ញុំសូមគោរពជូនពរអ្នកអាន និងប្រជាពលរដ្ឋទូទាំងប្រទេសសមប្រកបនឹងពុទ្ធពរទាំងបួនប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕
សូមអរគុណ!
ស្ថិតក្នុងបរិវេណក្រសួងមហាផ្ទៃ អគារ (V) មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា
(+855) 78 575 775
info@ncdd.gov.kh
