កំពង់ឆ្នាំង ០៤ មីនា ២០១៤៖ កាលពីព្រឹកថ្ងៃទី ៤ ខែមីនា ឆ្នាំ២០១៤ ឯកឧត្ដម អ៊ុន សំអុល អភិបាលរងខេត្ត បានអញ្ជើញជាអធិបតីក្នុងកិច្ចប្រជុំផ្សព្វផ្សាយផែនការសកម្មភាព និងថវិកាឆ្នាំ ២០១៤…
កំពង់ឆ្នាំង ០៤ មីនា ២០១៤៖ កាលពីព្រឹកថ្ងៃទី ៤ ខែមីនា ឆ្នាំ២០១៤ ឯកឧត្ដម អ៊ុន សំអុល អភិបាលរងខេត្ត បានអញ្ជើញជាអធិបតីក្នុងកិច្ចប្រជុំ
ផ្សព្វផ្សាយផែនការសកម្មភាព និងថវិកាឆ្នាំ ២០១៤ សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយមានការចូលរួមពី ប្រធាន
មន្ទីរ អង្គភាពពាក់ព័ន្ធក្នុងខេត្ត នាយកទីចាត់ការទាំង៥របស់សាលាខេត្ត អភិបាលក្រុងស្រុក ប្រធានការិយាល័យរដ្ឋបាលនិងហិរញ្ញវត្ថុក្រុងស្រុក
ទីប្រឹក្សាក្រុងស្រុក សរុប ៦០នាក់។
ឯកឧត្ដម អ៊ុន សំអុល អភិបាលរងខេត្ត បានមានប្រសាសន៍បើកកិច្ចប្រជុំដោយសង្កត់ធ្ងន់អំពីកិច្ចប្រឹងប្រែងរបស់រាជរដ្ឋាភិបាលក្នុងការធ្វើកំណែ
ទម្រង់រដ្ឋបាលសាធារណៈ ដែលមានអភិបាលកិច្ចល្អជាស្នូល ដែលបានដាក់ចេញតាមរយៈយុទ្ធសាស្ត្រចតុកោណដំណាក់ទី៣ កម្មវិធីជាតិសម្រាប់
ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងផែនការអនុវត្តរយៈពេល៣ឆ្នាំដំបូង (ផអ៣)។ ក្នុងរយៈពេលកន្លងមក ផ.អ៣
បានដំណើរការសកម្មភាពរបស់ខ្លួន ទទួលបានលទ្ធផលគួរជាទីមោទនៈ។ សមត្ថភាពស្ថាប័ន មន្ត្រីរាជការក្នុងរចនាសម្ព័ន្ធខេត្ត ក្រុង ស្រុក ឃុំ សង្កាត់ ត្រូវបានលើកកម្ពស់ គម្រោងអភិវឌ្ឍន៍នៅមូលដ្ឋានក៏បាននឹងកំពុងដំណើរការយ៉ាងសកម្ម ឆ្លើយតបតាមតម្រូវការរបស់ប្រជាពលរដ្ឋ។
បន្តមក លោក អ៊ុក កីឡា នាយករងរដ្ឋបាលសាលាខេត្ត និងជាប្រធានគម្រោង ផ.អ៣ បានធ្វើបទបង្ហាញអំពីសេចក្ដីសម្រេចរួមក្នុងការអនុវត្ត
ផែនការសកម្មភាព និងថវិកាឆ្នាំ២០១៤ របស់ខេត្ត និង ក្រុង ស្រុក។ លោក អ៊ុយ រម្យនា ទីប្រឹក្សាគ្រប់គ្រងកម្មវិធីជាតិប្រចាំខេត្តកំពង់ឆ្នាំង
ក៏បានចូលរួមមានមតិ និងធ្វើបទបង្ហាញអំពីផែនការសកម្មភាព និងថវិកាលម្អិតផងដែរ៕
ដកស្រង់ចេញពីគេហទំព័ររដ្ឋបាលខេត្តកំពង់ឆ្នាំង។
