នាព្រឹកថ្ងៃ ចន្ទ ៧រោច ខែស្រាពណ៍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី៣០ ខែសីហា ឆ្នាំ២០២១ លេខាធិការដ្ឋាន គ.ជ.អ.ប. បានរៀបចំវគ្គបណ្តុះបណ្តាលគ្រូបង្គោលថ្នាក់ខេត្ត ក្រុង ស្រុកគោលដៅថ្មី ស្តីពីការអនុវត្តផែនការយុទ្ធសាស្ត្រគណនេយ្យភាពសង្គមដល់ខេត្តកណ្តាល និងខេត្តកែប តាមប្រព័ន្ធ Zoom ដែលទទួលបានការគាំទ្រពីធនាគារពិភពលោក(WB) ដើម្បីអភិវឌ្ឍសមត្ថភាព ផ្តល់ចំណេះដឹង ជំនាញបច្ចេកទេសដល់មន្រ្តីបង្គោលគណនេយ្យភាពសង្គមថ្នាក់ខេត្ត ក្រុង ស្រុក និងអ្នកពាក់ព័ន្ធ ក្នុងការអនុវត្តការងារគណនេយ្យភាពសង្គម និងដើម្បីយកចំណេះដឹង ជំនាញនេះ ធ្វើការបណ្តុះបណ្តាលបន្តទៅដល់អង្គភាពផ្តល់សេវាទាំងបី (រដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាព)។
វគ្គបណ្តុះបណ្តាលនេះ មានការអញ្ចើញចូលរួមជាអធិបតី ឯកឧត្តម គីម រិទ្ធី អភិបាលរង នៃគណៈ អភិបាលខេត្តកណ្តាល និងជាប្រធានក្រុមការងារ I-SAF ថ្នាក់ខេត្ត ឯកឧត្តម អ៊ុក ថា អភិបាលរងនៃគណៈអភិបាលខេត្តកែប និងជាប្រធានក្រុមការងារ I-SAF ថ្នាក់ខេត្ត លោក ជេដ្ឋ គឹមជុង ប្រធានសម្របសម្រួលគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ ជាតំណាងឯកឧត្តមប្រធានលេខាធិការដ្ឋាន គ.ជ.អ.ប. និងលោក លោកស្រី តំណាងក្រសួងអប់រំ យុវជន និងកីឡា មន្ត្រីបង្គោលខេត្ត ក្រុង ស្រុកនៃខេត្តកណ្តាល និងខេត្តកែប តំណាងអង្គការទស្សនៈពិភពលោក (WVI-C) តំណាងអង្គការ FHI360 អង្គការ CCSP អង្គការ NAS អង្គការ API អង្គការសុវណ្ណភូមិ ព្រមទាំងអ្នកពាក់ព័ន្ធដ៏ទៃទៀត ប្រមាណជា ៨៣រូប។
សូមបញ្ជាក់ថា វគ្គបណ្តុះបណ្តាលគ្រូបង្គោលនេះ ត្រូវបានរៀបចំរយៈពេល០៣ថ្ងៃ ដែលផ្តោតលើមេរៀនសំខាន់ៗដូចខាង៖
- មេរៀនទី១៖ ផែនការយុទ្ធសាស្ត្រគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ
- មេរៀនទី២៖ ផែនការអនុវត្តគណនេយ្យភាពសង្គម
- មេរៀនទី៣៖ តួនាទី និងភារកិច្ចផ្នែកផ្គត់ផ្គង់
- មេរៀនទី៤៖ តួនាទី និងភារកិច្ចផ្នែកតម្រូវការ
- មេរៀនទី៥៖ កញ្ចប់ព័ត៌មានសម្រាប់ប្រជាពលរដ្ឋ
- មេរៀនទី៦៖ ប្រព័ន្ធទិន្នន័យគណនេយ្យភាពសង្គម
- មេរៀនទី៧៖ ដំណើរការត្រួតពិនិត្យតាមដានដោយប្រជាពលរដ្ឋ
- មេរៀនទី៨៖ ការគាំទ្រ និងការតាមដានការអនុវត្តផែនការសកម្មភាពរួមស្តីពីការងារគណនេយ្យភាពសង្គមដោយគណៈកម្មាធិការ JAAP
- មេរៀនទី៩៖ ការប្តេជ្ញាចិត្តផ្នែកបរិស្ថាន និងសង្គម
- មេរៀនទី១០៖ នីតិវិធីហិរញ្ញវត្ថុនៃគម្រោង ISAF
- ការរៀបចំផែនការសម្រាប់ការអនុវត្ត៕
