កិច្ចប្រជុំលើកទី១៩ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.)

សុន្ទរកថាបើក

សម្តេចក្រឡាហោម​ ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ

និងជាប្រធាន គ.ជ.អ.ប

ក្នុងកិច្ចប្រជុំលើកទី១៩ របស់ គ.ជ.អ.ប

ថ្ងៃទី២១ ខែតុលា ឆ្នាំ២០២១

ឯកឧត្ដម លោក​ជំទាវសមាជិក សមាជិកា គ.ជ.អ.ប.

ឯកឧត្តម លោកជំទាវតំណាងក្រសួង ស្ថាប័នពាក់ព័ន្ធ

ឯកឧត្ដម លោកជំទាវប្រធានក្រុមប្រឹក្សា និងអភិបាលរាជធានី ខេត្ត

ឯកឧត្តម លោកជំទាវ អស់លោក លោកស្រីទាំងអស់ជាទីមេត្រី!

ជាបឋម ខ្ញុំសូមថ្លែង​អំណរគុណ និង​​ស្វាគមន៍​យ៉ាង​កក់​ក្ដៅចំពោះឯកឧត្ដម លោក​ជំទាវ​សមាជិក សមាជិកា គ.ជ.អ.ប ​​ឯកឧត្ដម លោកជំទាវ អស់​​​លោក លោក​ស្រីដែលបាន​អញ្ជើញ​ចូលរួម​កិច្ច​ប្រជុំ​លើក​ទី១៩ របស់ គ.ជ.អ.ប តាមរយៈ​ប្រព័ន្ធ​បញ្ជូនរូបភាពនិងសំឡេង​ពី​ចម្ងាយ​នា​ពេល​នេះ។

​ឆ្លៀតក្នុងឱកាសនេះ ខ្ញុំសូមថ្លែងអំណរគុណ និងវាយតម្លៃខ្ពស់ចំពោះ​ឯកឧត្ដម លោក​ជំទាវ អស់​​​លោក លោក​ស្រីដែល​បានគាំទ្រ និងចូលរួមក្នុងកិច្ចដំណើរការកំណែ​ទម្រង់​វិមជ្ឈការ និង​វិសហមជ្ឈការ​​ដ៏​មាន​សារៈសំខាន់នេះ តាម​តួនាទី និងការទទួលខុសត្រូវរបស់ខ្លួន។

បើទោះបីប្រទេសយើងក៏ដូចជាបណ្តាប្រទេសនានានៅលើពិភពលោកបាន​ និង​កំពុងជួប​ស្ថាន​​ភាព​​លំបាកដោយសារការឆ្លងរាលដាលនៃជំងឺកូវីដ-១៩ ​ដែលបានអូសបន្លាយ​ពេលវេលា​តាំង ពី​ដើម​ឆ្នាំ២០២០រហូតមកដល់ពេលនេះ​ក៏ដោយ ក៏យើងនៅតែបន្ត​រួមសហការគ្នាក្នុងការរៀបចំ និង​អនុវត្តកិច្ចការ​ជា​អាទិភាព និងចាំបាច់នានា ដើម្បីធានាដល់ការការពារទប់ស្កាត់​ការឆ្លង​រាល​ដាលនៃ​ជំងឺដ៏កាចសាហាវនេះផង ព្រមទាំងរក្សាបាននូវនិរន្តរភាពនៃការបំពេញ​ការងារតាម​វិស័យ​ជំនាញនានាដោយផ្សារភ្ជាប់ជាមួយនឹងការជំរុញកិច្ចដំណើរការកំណែ​ទម្រង់​​នានាផងដែរ។

ការកោះប្រជុំលើកទី១៩របស់ គ.ជ.អ.ប.នាពេលនេះ គឺក្នុង​គោល​បំណង​ពិនិត្យឡើង​វិញ​នូវ​វឌ្ឍនភាព និងបញ្ហាប្រឈមនានានៃការអនុវត្តកម្មវិធី​កំណែ​ទម្រង់​វិមជ្ឈការ និង​វិស​ហ​មជ្ឈ​ការ​ក្នុងអំឡុងឆ្នាំ២០២០ ​និងក្នុងឆមាសទី១ឆ្នាំ២០២១នេះ ​ជា​ពិសេស​ការពិនិត្យលើសេចក្តីព្រាង​ឯកសារកម្មវិធីជាតិសម្រាប់ការអភិវឌ្ឍ​តាម​បែបប្រជាធិប​​តេយ្យនៅ​ថ្នាក់​ក្រោមជាតិដំណាក់​កាល​ទី២ សម្រាប់អនុវត្តពីឆ្នាំ២០២០ដល់ឆ្នាំ២០៣០ ដែលគ្រោងនឹង​ដាក់​ជូនប្រមុខរាជរដ្ឋាភិបាលពិនិត្យ និងសម្រេចនាដើមខែវិច្ឆិកាខាងមុខនេះ។

ឆ្លៀតក្នុងឱកាសនៃការជួបជុំគ្នានាពេលនេះ ខ្ញុំសូមរំលឹកឡើងវិញថា យើងបានអនុវត្ត​បញ្ចប់​កម្មវិធីជាតិ​រយៈ​ពេល​​១០​ឆ្នាំ​ដំណាក់​កាលទី១(២០១០-២០២០)ដោយសម្រេចបាន​នូវ​សមិទ្ធ​ផល​ ធំៗជាច្រើន​ពាក់ព័ន្ធនឹងការ​រៀបចំ និងដាក់ឱ្យ​ដំណើរការស្ថាប័ន​រដ្ឋបាលថ្នាក់ក្រោមជាតិស្រប​តាម​គោលការណ៍​នៃ​ការ​អភិវឌ្ឍ​តាម​បែប​ប្រជា​ធិប​តេយ្យ រួមជាមួយ​ការផ្ទេរមុខងារ និងធនធានចាំបាច់​នានាទៅឱ្យរដ្ឋបាលថ្នាក់ក្រោមជាតិទាំងនេះ ​ដើម្បីធានាដល់​ការលើកកម្ពស់ប្រសិទ្ធភាព និង​គុណភាព​នៃការអភិវឌ្ឍមូលដ្ឋាន និងការផ្តល់សេវាសាធារណៈចាំបាច់នានាជូនប្រជាពលរដ្ឋ។

នាចុង​ឆ្នាំ២០១៩ ​រាជរដ្ឋាភិបាលបានរៀបចំឡើងវិញនូវ​រចនា​​សម្ព័ន្ធ​​រដ្ឋបាលថ្នាក់ក្រុង ស្រុក ខណ្ឌ ដោយបានធ្វើសមាហរណកម្មការិយាល័យជំនាញនានា​ទៅក្នុង​រចនា​សម្ព័ន្ធ​គ្រប់​គ្រង​របស់​រដ្ឋបាល​ក្រុង ស្រុក ខណ្ឌ ក្នុងគោលបំណងរៀបចំឱ្យរដ្ឋបាលថ្នាក់នេះ​ក្លាយជា​រដ្ឋបាល​​មូលដ្ឋាន ដែលមានតួនាទីសំខាន់ក្នុងការសហការជាមួយ​រដ្ឋបាល​ឃុំ សង្កាត់ក្នុងការ​ផ្តល់​សេវា​ចាំបាច់​​នានា​ជូនប្រជាពលរដ្ឋដោយផ្ទាល់។ តាមរយៈការរៀបចំឡើងវិញនូវរចនាសម្ព័ន្ធ​​រដ្ឋបាល ក្រុង ស្រុក ខណ្ឌនេះ មានមុខងារ​តាមវិស័យជំនាញនានាមួយចំនួន​ក៏​ត្រូវ​បាន​ផ្ទេរទៅ​ឱ្យ​រដ្ឋបាល​ក្រុង ស្រុក ខណ្ឌផងដែរ។ ក្នុងនោះក៏មានមុខងារផ្តល់សេវាក្នុងវិស័យអប់រំចាប់​ពីសាលាបឋម​សិក្សា​ចុះ​ក្រោម​ត្រូវបានប្រគល់ទៅឱ្យរដ្ឋបាលក្រុង ស្រុកទាំង១៤នៃខេត្តបាត់ដំបង​សម្រាប់​អនុវត្ត​ជា​ជំហាន​ដំបូង ដើម្បីធ្វើជាមូលដ្ឋានក្នុងការពង្រីកការប្រគល់មុខងារក្នុងវិស័យអប់រំនេះ​ទៅ​ឱ្យ​រដ្ឋបាល​ក្រុង ស្រុក ខណ្ឌផ្សេងទៀតទូទាំងប្រទេសនាពេលបន្តបន្ទាប់។ ស្របពេលជាមួយគ្នានេះ ​​មុខងារគ្រប់គ្រង​និងផ្តល់​សេវា​សុខាភិបាល រួមមានមន្ទីរសុខាភិបាល មន្ទីរពេទ្យបង្អែក មណ្ឌលសុខភាព និង​ប៉ុស្តិ៍​សុខភាពទាំងអស់ក៏ត្រូវបានផ្ទេរ​ទៅឱ្យ​ស្ថិតក្រោមការ​ទទួល​ខុស​ត្រូវរបស់​រដ្ឋបាល​​រាជធានី ខេត្ត​ផង​​ដែរ។

កិច្ចការទាំងនេះត្រូវបានរៀបចំ និងដាក់ឱ្យអនុវត្តក្នុងអំឡុង​ពេលនៃការចាប់ផ្តើមឆ្លង​រាល​ដាល​នៃ​ជំងឺ​កូវីដ-១៩ ដែលជាឧបសគ្គដ៏ចម្បងក្នុងការគាំទ្រ តាមដាន ត្រួតពិនិត្យពីថ្នាក់ជាតិ​លើ​ការ​អនុវត្ត​មុខងារ​ទាំង​នេះ។ យើងបានលើកយកបញ្ហាទាំងនេះមកពិនិត្យ ពិភាក្សានៅក្នុងកិច្ច​ប្រជុំលើក​ទី​១៨​របស់ គ.ជ.អ.ប. នា​ថ្ងៃ​ទី១៧ ខែមិថុនា ឆ្នាំ២០២០ម្តងរួចមកហើយ ក៏ប៉ុន្តែដើម្បី​ធានាដល់​ការបន្ត​ជំរុញ និងដោះ​ស្រាយ​បញ្ហា​ប្រឈ​ម​នានា​ឱ្យបានទាន់ពេលវេលា យើងចាំបាច់​ត្រូវ​មាន​ការ​ពិនិត្យ និងពិភាក្សាលើ​បញ្ហា​ទាំង​នេះនៅក្នុងកិច្ចប្រជុំ​នាពេលនេះ​បន្ថែមទៀត។

ឯកឧត្ដម លោក​ជំទាវ អស់លោក លោកស្រី!

ក្នុងគោលបំណងជំរុញការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈ​ការ​​ ឱ្យ​កាន់​​តែ​ស៊ីជម្រៅ រាជរដ្ឋាភិបាលបានសម្រេចឱ្យរៀបចំកម្មវិធីជាតិដំណាក់កាលទី២​សម្រាប់​រយៈពេល​១០​ឆ្នាំ​​បន្ថែមទៀត គឺចាប់ពីឆ្នាំ២០២១ដល់ឆ្នាំ២០៣០ សំដៅបន្តពង្រឹងស្ថាប័ន​រដ្ឋបាល​ ថ្នាក់ក្រោមជាតិ​ឱ្យ​កាន់តែមានសក្តានុពលក្នុងការចូលរួមចំណែកសម្រេចបាននូវ​ចក្ខុវិស័យ​​របស់​រាជរដ្ឋាភិបាល នោះគឺការស្តារស្ថានភាពសេដ្ឋកិច្ចជាតិក្រោយវិបត្តិកូវីដ-១៩ និងការ​បន្ត​ជំរុញ​កម្ពុជាឱ្យក្លាយទៅជា​ប្រទេស​ដែល​មានចំណូលមធ្យមកម្រិត​ខ្ពស់​នាពេលឆាប់ៗខាងមុខនេះ។

ពាក់ព័ន្ធនឹងកិច្ចការនេះ ខ្ញុំសូមជម្រាបជូន​អង្គ​ប្រជុំជ្រាបថា ការរៀបចំតាក់តែង​កម្មវិធីជាតិ​ដំណាក់កាលទី២នេះ បានចាប់ផ្តើមដោយការរៀបចំជាឯកសារទស្សនទានមួយយ៉ាង​ច្បាស់​លាស់ ដែល​កំណត់​នូវ​ចក្ខុវិស័យ និងសមិទ្ធផលរំពឹងទុកសំខាន់ៗនៃកំណែទម្រង់រដ្ឋបាលថ្នាក់ក្រោមជាតិ ដើម្បី​ធ្វើជា​ការតម្រង់ទិសក្នុងការរៀបចំតាក់តែងឯកសារលម្អិតនៃកម្មវិធីជាតិដំណាក់កាលទី២។

ផ្អែកលើឯកសារទស្សនទានដែលបានពិនិត្យ និងឯកភាពពីប្រមុខរាជរដ្ឋាភិបាលនា​ខែធ្នូ ឆ្នាំ២០២០ លេខាធិការដ្ឋាន គ.ជ.អ.ប. បានខិតខំសម្របសម្រួលកិច្ចដំណើរការរៀបចំតាត់តែង​សេចក្តីព្រាង​លម្អិតនៃឯកសារកម្មវិធីជាតិនេះ ដោយបានធ្វើការសិក្សា និងពិគ្រោះយោបល់ក្នុង​កម្រិត​បច្ចេកទេសជាបន្តបន្ទាប់ជាមួយក្រសួង ស្ថាប័នថ្នាក់ជាតិ រដ្ឋបាលថ្នាក់ក្រោមជាតិ ដៃគូ​អភិវឌ្ឍន៍ និងអង្គការសង្គមស៊ីវិលពាក់ព័ន្ធនានារហូតដល់​បានរៀបចំបញ្ចប់ជាសេចក្តីព្រាងលម្អិត​​នៃឯកសារកម្មវិធី​ជាតិដំណាក់កាលទី២ ដើម្បីដាក់ជូនកិច្ចប្រជុំ គ.ជ.អ.ប.ពិនិត្យ និងពិភាក្សា​​នា​ពេលនេះ។

អាស្រ័យហេតុនេះ ក្នុងកិច្ចប្រជុំលើកនេះ ខ្ញុំសូមស្នើនូវ​របៀបវារៈដូច​ខាង​​ក្រោម៖

១.​ ការពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំលើកទី១៨របស់ គ.ជ.អ.ប.

២. សេចក្តីរាយការណ៍អំពីវឌ្ឍនភាព និងបញ្ហាប្រឈមនៃការអនុវត្តកម្មវិធីកំណែ​ទម្រង់​​វិមជ្ឈការ និងវិសហមជ្ឈការសម្រាប់ឆ្នាំ២០២០ និងឆមាសទី១ឆ្នាំ២០២១

៣. ការពិនិត្យពិភាក្សាលើសេចក្តីព្រាងឯកសារកម្មវិធីជាតិស្តីពីការអភិវឌ្ឍតាមបែបប្រជា​ធិប តេយ្យនៅថ្នាក់ក្រោមជាតិដំណាក់កាលទី២ (២០២១-២០៣០)

៤. បញ្ហាផ្សេងៗ៖

  • សេចក្តីរាយការណ៍អំពីលទ្ធផលនៃការកែសម្រួលសេចក្តីណែនាំស្តីពីគោលការណ៍ និងនីតិវិធីនៃការគ្រប់គ្រងបុគ្គលិករដ្ឋបាលថ្នាក់ក្រោមជាតិ។

ខ្ញុំសូមបញ្ចប់នូវមតិបើកកិច្ចប្រជុំរបស់យើង និងសូមស្នើឯកឧត្ដម លោក​ជំទាវ សមាជិក សមាជិកា​នៃ គ.ជ.អ.ប ផ្តល់យោបល់ទៅលើរបៀបវារៈខាងលើនេះ។

សូមអរគុណ!

ព័ត៌មានថ្មីៗ + បង្ហាញព័ត៌មានទាំងអស់