កំពង់ចាម ១៨ ធ្នូ ២០១៣ ៖ លេខាធិការដ្ឋាន គ.ជ.អ.ប សហការជាមួយក្រសួងមហាផ្ទៃ
កាលពីថ្ងៃទី១៦-១៧ ខែធ្នូ ឆ្នាំ២០១៣ បានបើកវគ្គបណ្ដុះបណ្ដាលរំលឹកឡើងវិញស្ដីពី
គោលនយោបាយកិច្ចការពារសុវត្ថិភាពបរិស្ថានដីធ្លី និងជនជាតិដើមភាគតិចសម្រាប់គម្រោង
មូលនិធិឃុំ សង្កាត់…
កំពង់ចាម ១៨ ធ្នូ ២០១៣៖ លេខាធិការដ្ឋាន គ.ជ.អ.ប សហការជាមួយ
ក្រសួងមហាផ្ទៃ កាលពីថ្ងៃទី១៦-១៧ ខែធ្នូ ឆ្នាំ២០១៣ បានបើកវគ្គបណ្ដុះបណ្ដាល
រំលឹកឡើងវិញស្ដីពីគោលនយោបាយកិច្ចការពារសុវត្ថិភាពបរិស្ថានដីធ្លី និងជនជាតិ
ដើមភាគតិចសម្រាប់គម្រោងមូលនិធិឃុំ សង្កាត់ នៅសណ្ឋាគារភ្នំប្រុស
ខេត្តកំពង់ចាម។
សមាសភាពចូលរួមក្នុងវគ្គបណ្ដុះបណ្ដាលនេះគឺជាមន្ត្រីបង្គោលកិច្ចការពារ
សុវត្ថិភាពសម្រាប់គម្រោងមូលនិធិឃុំ សង្កាត់ទាំង២៣ខេត្ត ដែលជាមន្ត្រីនៃទីចាត់ការផែនការ និងវិនិយោគ ទីចាត់ការធនធានមនុស្ស និងមន្ទីរបរិស្ថាន និងអ្នកពាក់ព័ន្ធនានា សរុបចំនួន៧១នាក់ (ស្រី០៩រូប)។
វគ្គបណ្ដុះបណ្ដាលនេះត្រូវបានរៀបចំដើម្បីពង្រឹងសមត្ថភាពដល់មន្ត្រីអនុវត្តទាំងអស់ក្នុងការបំពេញឯកសារនិងពង្រឹងការអនុវត្តឱ្យស្របតាម
សៀវភៅណែនាំស្ដីពីការអនុវត្តគម្រោងមូលនិធិឃុំ សង្កាត់ (PIM) និងលិខិតបទដ្ឋានគតិយុត្តិនានាដែលមានជាធរមាន។
លោក ខោល យុទ្ធលី អនុប្រធាននាយកដ្ឋានរដ្ឋបាលមូលដ្ឋាននៃក្រសួងមហាផ្ទៃ និងជាប្រធានក្រុមការងារសុវត្ថិភាពបរិស្ថាន ដីធ្លី
និងជនជាតិដើមភាគតិច បានលើកឡើងពីលទ្ធផលនៃការអនុវត្តកិច្ចការពារសុវត្ថិភាពគម្រោងមូលនិធិឃុំ សង្កាត់ឆ្នាំ២០១៣ និងបញ្ហាប្រឈម
នានាដែលកើតមានដែលត្រូវខិតខំសហការគ្នាដោះស្រាយឱ្យមានប្រសិទ្ធភាពខ្ពស់។
ប្រធានបទសំខាន់ៗក្នុងវគ្គបណ្ដុះបណ្ដាលរួមមាន៖ (១). គោលការណ៍ណែនាំស្ដីពីសុវត្ថិភាពបរិស្ថាន និងបទពិសោធន៍ការអនុវត្តគម្រោងឆ្នាំ២០១៣ (២). គោលការណ៍ណែនាំស្ដីពីសុវត្ថិភាពដីធ្លី (៣). គោលការណ៍ណែនាំស្ដីពីសុវត្ថិភាពបរិស្ថាន និងបទពិសោធន៍ការអនុវត្តគម្រោងឆ្នាំ២០១២ (៤). គោលការណ៍ណែនាំស្ដីពីសុវត្ថិភាពជនជាតិដើមភាគតិច និងបទពិសោធន៍ការអនុវត្តគម្រោងឆ្នាំ២០១៣។
អ្នកសម្របសម្រួលវគ្គបណ្ដុះបណ្ដាលបានណែនាំបន្ថែមពីទម្រង់នានាសម្រាប់អនុវត្តមូលនិធិឃុំ សង្កាត់ និងបានឆ្លើយបំភ្លឺរាល់ចម្ងល់នានាដែល
បានលើកឡើងអំពីរបៀបធ្វើលទ្ធកម្មដីធ្លី របៀបទូទាត់សំណង និងការដកថវិកាសម្រាប់ទូទាត់សំណងជាដើម សំដៅឱ្យកាអនុវត្តគម្រោង
មូលនិធិឃុំ សង្កាត់មានប្រសិទ្ធភាព និងប្រសើរជាងមុន។
តាមរយៈលទ្ធផលនៃការវាយតម្លៃមុនវគ្គ និងក្រោមវគ្គបណ្ដុះបណ្ដាលរំលឹកឡើងវិញបានបង្ហាញថា ចំណេះដឹងរបស់សិក្ខាកាមមានការកើន
ឡើងខ្ពស់ដោយសិក្ខាកាមដែលទទួលបានពិន្ទុល្អណាស់មានចំនួន៧០% ល្អបង្គួរមានចំនួន១៧% ល្អមានចំនួន១២% និងមធ្យមមាន
ចំនួន១%។
គួរបញ្ជាក់ថា គិតត្រឹមថ្ងៃទី១៦ ខែធ្នូ ឆ្នាំ២០១៣ ក្នុងចំណោមខេត្តទាំង២៣ដែលមានឃុំ សង្កាត់សរុប១.៥៣៧ បានអនុវត្តគម្រោងសរុប
ចំនួន១.៦៩១គម្រោង ហើយគម្រោងដែលធ្វើការសិក្សាបរិស្ថានមានចំនួន៦៩៧គម្រោង ធ្វើការសិក្សាដីធ្លីមានចំនួន៧៥១គម្រោង ធ្វើការសិក្សា
ជនជាតិដើមភាគតិចមានចំនួន១០៣គម្រោង ស្ថិតក្នុងបញ្ជីឃ្លាំមើលបរិស្ថានមានចំនួន៥៨៧គម្រោង និងគម្រោងស្ថិតក្នុងបញ្ជីឃ្លាំមើល
ជនជាតិមានចំនួន១០៣គម្រោង៕