ស្វែងរក
អ្វីជា គ.ជ.អ.ប.?
គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ត្រូវបានបង្កើតឡើងដោយព្រះរាជក្រឹត្យលេខ នស/រកត/១២០៨/១៤២៩ ចុះថ្ងៃទី៣១ ខែធ្នូ ឆ្នាំ២០០៨ ដើម្បីសម្របសម្រួលដឹកនាំការអនុវត្តច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ច្បាប់ស្ដីពីគ្រប់គ្រងរដ្ឋបាលឃុំ សង្កាត់ និងអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ។
គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិជាយន្តការអន្តរក្រសួងសម្រាប់ការលើកកម្ពស់ការអភិវឌ្ឍតាមបែបប្រជាធិបតេយ្យតាមរយៈកំណែទម្រង់វិមជ្ឈការ និង វិសហមជ្ឈការនៅក្នុងប្រទេសកម្ពុជា។
យោងអនុក្រឹត្យលេខ ១១១ អនក្រ.បក ចុះថ្ងៃទី២០ ខែកក្កដា ឆ្នាំ២០២០ ស្តីពីការរៀបចំ និងការប្រព្រឹត្តទៅនៃអនុគណៈកម្មាធិការរបស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ គ.ជ.អ.ប បានបង្កើតអនុគណៈកម្មាធិការចំនួន០៥គឺ៖ (១).អនុគណៈកម្មាធិការមុខងារ និងធនធាន (២).អនុគណៈកម្មាធិការសារពើពន្ធ និងហិរញ្ញវត្ថុ (៣).អនុគណៈកម្មាធិការបុគ្គលិករបស់រដ្ឋបាលថ្នាក់ក្រោមជាតិ (៤).អនុគណៈកម្មាធិការផែនការអភិវឌ្ឍន៍ថ្នាក់ក្រោមជាតិ និង(៥).អនុគណៈកម្មាធិការសេវាយុត្តិធម៌។
គ.ជ.អ.ប. ត្រូវមានលេខាធិការដ្ឋានមួយស្ថិតនៅក្នុងទីស្តីការក្រសួងមហាផ្ទៃ។ លេខាធិការដ្ឋាន គ.ជ.អ.ប. ត្រូវបំពេញរាល់កិច្ចការចាំបាច់នានា ដើម្បីធានាឱ្យ គ.ជ.អ.ប. បំពេញមុខងាររបស់ខ្លួនបានសមស្រប និងមានប្រសិទ្ធភាព ព្រមទាំងជួយជាជំនួយបច្ចេកទេស និងជាលេខាធិការដល់អនុគណៈកម្មាធិការនីមួយៗ។
គ.ជ.អ.ប. មានបេសកកម្មសំខាន់ៗ ដូចខាងក្រោម៖
– តាក់តែង និងអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិតាមរយៈច្បាប់ស្ដីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ច្បាប់ស្ដីពីការគ្រប់គ្រងរដ្ឋបាលឃុំ សង្កាត់ ច្បាប់ស្ដីពីប្រព័ន្ធ ហិរញ្ញវត្ថុសាធារណៈ និងច្បាប់ស្តីពីរបបហិរញ្ញវត្ថុ និងការគ្រប់គ្រងទ្រព្យសម្បត្តិរបស់រដ្ឋបាលថ្នាក់ក្រោមជាតិ។
– រៀបចំផែនការសកម្មភាព និងថវិកាប្រចាំឆ្នាំដោយផ្អែកលើកម្មវិធីជាតិ គ.ជ.អ.ប.។
– ពិនិត្យនិងធ្វើបច្ចុប្បន្នភាពលើកម្មវិធីជាតិពីដំណាក់កាលមួយទៅដំណាក់កាលមួយ។
– ពិគ្រោះ ពិភាក្សា សម្របសម្រួលជាមួយគ្រប់ក្រសួង ស្ថាប័នក្នុងការពិនិត្យមើលឡើងវិញនូវការទទួលខុសត្រូវ និងមុខងាររបស់ក្រសួង ស្ថាប័ន មន្ទីរ អង្គភាព និងអាជ្ញាធរគ្រប់លំដាប់ថ្នាក់ ដើម្បីកំណត់មុខងារ ការទទួលខុសត្រូវ សិទ្ធអំណាច និងគណនេយ្យភាពសម្រាប់ផ្ទេរដល់ក្រុមប្រឹក្សានានានៅថ្នាក់ក្រោមជាតិ រួមជាមួយនឹង៖
- ការផ្ទេរធនធាន ៖ ចំណូល ហិរញ្ញវត្ថុ បុគ្គលិក ទ្រព្យសម្បត្តិ និងសមត្ថភាព ដើម្បីគ្រប់គ្រង និងអនុវត្តមុខងារនីមួយៗ
- ការផ្ដល់លទ្ធភាព និងអំណាច ដើម្បីទទួលបានធនធានចាំបាច់រួមមានចំណូលហិរញ្ញវត្ថុ បុគ្គលិក ទ្រព្យសម្បត្តិ និងសមត្ថភាពសម្រាប់គ្រប់គ្រង និងអនុវត្តមុខងារនីមួយៗនោះ
- ការផ្ដល់អំណាច និងភារកិច្ច ដើម្បីគ្រប់គ្រង និងអនុវត្តរាល់មុខងាររបស់ខ្លួនតាមគោលការណ៍ស្វ័យភាពមូលដ្ឋាន និងគណនេយ្យភាពនៅមូលដ្ឋានក្នុងកម្រិតជាអតិបរមា។
– ផ្ដល់អនុសាសន៍ជូនរាជរដ្ឋាភិបាល ឬក្រសួង ស្ថាប័នណាមួយអំពីការតាក់តែង ឬការធ្វើវិសោធនកម្មច្បាប់ ឬលិខិតបទដ្ឋាននានា ដើម្បីអោយស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ច្បាប់ស្ដីពីការ គ្រប់គ្រងរដ្ឋបាលឃុំ សង្កាត់ និងគោលនយោបាយកំណែទម្រង់វិមជ្ឈការ និងវិសហមជ្ឈការ។
– ពិគ្រោះយោបល់ ពិភាក្សា និងសម្របសម្រួលជាមួយក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័នពាក់ព័ន្ធនានាតាមការចាំបាច់ ដើម្បីរៀបចំអោយមានរបបហិរញ្ញវត្ថុ និងទ្រព្យសម្បត្តិរបស់រដ្ឋបាលថ្នាក់ក្រោមជាតិ រួមទាំងការ រៀបចំបទដ្ឋាន នីតិវិធីនៃការរៀបចំ ការអនុម័ត និងការអនុវត្តថវិការបស់រដ្ឋបាលថ្នាក់ក្រោមជាតិ ការរៀបចំប្រភពចំណូល រួមមាន ចំណូលពីថ្នាក់ជាតិ និងចំណូលនៅមូលដ្ឋាន ការផ្ទេរឧបត្ថម្ភថវិកា រួមមាន មូលនិធិផ្ទេរមានភ្ជាប់ លក្ខខណ្ឌ និងមូលនិធិផ្ទេរគ្មានភ្ជាប់លក្ខខណ្ឌពីថ្នាក់ជាតិទៅរដ្ឋបាលថ្នាក់ក្រោមជាតិ ការផ្ទេរទ្រព្យសម្បត្តិរដ្ឋ ការចាត់ចែង ការគ្រប់គ្រង ការប្រើប្រាស់ទ្រព្យសម្បត្តិរដ្ឋដែលប្រគល់ឱ្យរដ្ឋបាលថ្នាក់ក្រោមជាតិ និងទ្រព្យសម្បត្តិដែល រដ្ឋបាលថ្នាក់ក្រោមជាតិរកបានដោយខ្លួនឯង ដោយមានផែនការជាជំហានៗ មានសនិទានភាព មានការសម្របសម្រួល មានការពិគ្រោះយោបល់ មានតម្លាភាព និងគណនេយ្យភាព។
– សហការជាមួយក្រសួង ស្ថាប័ន ដើម្បីកំណត់គោលនយោបាយយុទ្ធសាស្ត្រសម្រាប់ការពិនិត្យ និងការកែសម្រួលឡើងវិញនូវការរៀបចំបុគ្គលិក ស្របពេលជាមួយនឹងការផ្ទេរមុខងារ និងការទទួលខុសត្រូវ ក្នុងគោលបំណងបង្កើត ឱ្យមានក្របខ័ណ្ឌបុគ្គលិករបស់រដ្ឋបាលថ្នាក់ក្រោមជាតិ។ ទៅតាមរបៀបរបបដែលមានផែនការ មានកម្មវិធី មានសនិទានភាព មានការពិគ្រោះយោបល់ និងមានតម្លាភាព។
– កំណត់អំពីប្រភេទបុគ្គលិកសម្រាប់ប្រភេទក្រុមប្រឹក្សានីមួយៗ និងកំណត់អំពីរបៀបរបប និងមធ្យោបាយក្នុងការកែសម្រួលឡើងវិញនូវការរៀបចំបុគ្គលិក ដោយធានាមិនឱ្យមានការបង្កើនចំនួនបុគ្គលិកសាធារណៈ។
– ធានាឱ្យមានការសម្របសម្រួល និងពិគ្រោះយោបល់អំពីគោលនយោបាយ យុទ្ធសាស្ត្រ និងកម្មវិធីកំណែទម្រង់នានាដែលអនុវត្តដោយក្រសួង ស្ថាប័នពាក់ព័ន្ធនានា ដើម្បីមានសង្គតិភាពជាមួយច្បាប់ស្ដីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ច្បាប់ស្ដីពីការគ្រប់គ្រងរដ្ឋបាលឃុំ សង្កាត់ និងគោលនយោបាយវិមជ្ឈការ និងវិសហមជ្ឈការ ព្រមទាំងកម្មវិធីជាតិ។
– សិក្សាស្រាវជ្រាវ និងកំណត់ឡើងវិញនូវព្រំប្រទល់សម្រាប់រដ្ឋបាលថ្នាក់ក្រោមជាតិតាមការចាំបាច់។
– សិក្សាស្រាវជ្រាវអំពីកំណើនទីក្រុង និងនគរូបនីយកម្ម សម្រាប់ជាមូលដ្ឋានក្នុងការបង្កើតនូវគោលនយោបាយ រចនាសម្ព័ន្ធ និងយុទ្ធសាស្ត្រគ្រប់គ្រងទីក្រុងឱ្យបានសមស្រប។
– រៀបចំគោលនយោបាយ យុទ្ធសាស្ត្រ ផែនការ សម្រាប់ការកសាងសមត្ថភាពក្រុមប្រឹក្សា និងរដ្ឋបាលរបស់ក្រុមប្រឹក្សានៅថ្នាក់ក្រោមជាតិ។
– សហការ សិក្សាស្រាវជ្រាវ និងផ្ដល់អនុសាសន៍ជូនរាជរដ្ឋាភិបាល ក្នុងការបង្កើតនូវមូលនិធិសម្រាប់កំណែទម្រង់វិមជ្ឈការ និងវិសហមជ្ឈការដ៏សមស្របមួយ ដើម្បីប្រមូលផ្ដុំប្រភពធនធានពីដៃគូអភិវឌ្ឍន៍នានាសម្រាប់តម្រូវការផ្នែក បុគ្គលិក និងកិច្ចសហប្រតិបត្តិការ ការអភិវឌ្ឍ ការគាំទ្រផ្នែកបច្ចេកទេស និងតម្រូវការចាំបាច់នានានៅថ្នាក់ក្រោមជាតិ ព្រមទាំងការផ្ដល់ជំនួយបច្ចេកទេសដល់ក្រសួង ស្ថាប័នពាក់ព័ន្ធនានា។
– ស្រាវជ្រាវ និងរៀបចំនូវកិច្ចព្រមព្រៀងរវាងរាជរដ្ឋាភិបាល និងដៃគូអភិវឌ្ឍន៍សម្រាប់គាំទ្រដល់កំណែទម្រង់វិមជ្ឈការ និងវិសហមជ្ឈការ ដើម្បីធានាឱ្យមាននូវការតម្រឹម និងសុខដុមនីយកម្មក្នុងការប្រើប្រាស់ជំនួយ។
– បង្កើតវេទិកាដ៏សមស្របមួយរវាងរាជរដ្ឋាភិបាល និងដៃគូអភិវឌ្ឍន៍នានាសម្រាប់សម្របសម្រួលកិច្ចសហប្រតិបត្តិការ និងគាំទ្រដល់កំណែទម្រង់វិមជ្ឈការ និងវិសហមជ្ឈការ។
– ធានាឱ្យមានការផ្ទេរសិទ្ធិ និងការទទួលខុសត្រូវពីរដ្ឋបាលខេត្ត ក្រុង ស្រុក ខណ្ឌបច្ចុប្បន្ន ទៅឱ្យរដ្ឋបាលរាជធានី ខេត្ត ក្រុង ស្រុក ខណ្ឌដែលបានបង្កើត ស្របតាមច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។
– ធ្វើសេចក្ដីរាយការណ៍ជូនរាជរដ្ឋាភិបាលប្រចាំឆ្នាំអំពីការអនុវត្តច្បាប់ស្ដីពីគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ច្បាប់ស្ដីពីការគ្រប់គ្រងរដ្ឋបាលឃុំ សង្កាត់ និងគោលនយោបាយវិមជ្ឈការ និងវិសហមជ្ឈការ។