ភ្នំពេញ ១១ មេសា ២០១៤៖ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី ឆស័ក ពុទ្ធសករាជ ២៥៥៨ ដែលនឹងឈានចូលមកដល់នៅវេលាម៉ោង៨និង០៧ព្រឹកថ្ងៃទី១៤ ខែមេសា ឆ្នាំ២០១៤ ខាងមុខនេះលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោកស្រី ញ៉ែម សាខន ស ខេង ព្រមទាំងមន្ត្រីនគរបាលជាតិជាន់ខ្ពស់ អគ្គស្នងការ អគ្គស្នងការរង…
ភ្នំពេញ ១១ មេសា ២០១៤៖ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី ឆស័ក ពុទ្ធសករាជ ២៥៥៨ ដែលនឹងឈានចូលមកដល់នៅ
វេលាម៉ោង៨និង០៧ព្រឹកថ្ងៃទី១៤ ខែមេសា ឆ្នាំ២០១៤ ខាងមុខនេះលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោកស្រី
ញ៉ែម សាខន ស ខេង ព្រមទាំងមន្ត្រីនគរបាលជាតិជាន់ខ្ពស់ អគ្គស្នងការ អគ្គស្នងការរង ប្រធាននាយកដ្ឋាន អនុប្រធាននាយកដ្ឋាននិងមន្ត្រីរាជការ
ចំណុះឲ្យក្រសួងមហាផ្ទៃទាំងអស់បានរៀបចំពិធីសូត្រមន្តចម្រើនព្រះបរិត្ត រាប់បាត្រប្រគេនព្រះសង្ឃ១០១អង្គ ហើយពិធីនេះបានប្រព្រឹត្តធ្វើឡើង
នៅទីស្តីការក្រសួងកាលពីព្រឹក ថ្ងៃទី១០ ខែមេសា ឆ្នាំ២០១៤។
ជារៀងរាល់ឆ្នាំក្រសួងមហាផ្ទៃតែងតែរៀបចំពិធីសូត្រមន្តចម្រើនព្រះបរិត្ត និងរាប់បាត្រប្រគេនព្រះសង្ឃទៅតាមគន្លងប្រពៃណី ព្រះពុទ្ធសាសនា និង
ទំនៀមទម្លាប់ខ្មែរបុរាណនៅមុនពេលពិធីបុណ្យចូលឆ្នាំមកដល់ ដើម្បីឧទ្ទិសមគ្គផល និងកុសលផលបុណ្យជូនដល់ដួងវិញ្ញាណក្ខន្ធបុព្វការីជនមាន
មាតាបិតា ជីដូនជីតា និងញាតិកាទាំង៧សន្តាន ព្រមទាំងវីរយុទ្ធជនយុទ្ធនារីអ្នកស្នេហាជាតិទាំងអស់ដែលបានធ្វើ មរណកាលទៅកាន់លោកខាងមុខ
ក្នុងបុព្វហេតុជាតិទឹកដីមាតុភូមិសូមឲ្យ ទទួលបាននូវសុគតិភពកុំបីឃ្លៀងឃ្លាតឡើយ។
បន្ទាប់ ពីពិធីសូត្រមន្តចម្រើនព្រះបរិត្តលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនឹងលោកស្រី ញ៉ែម សាខន ស ខេង ព្រមទាំងមន្ត្រី
ក្រោមឱវាទក្រសួងទាំងអស់បានអញ្ជើញរាប់បាត្រប្រគេន ទេយ្យវត្ថុ និងបច្ច័យដល់ព្រះសង្ឃ១០១អង្គតាមគន្លងប្រពៃណីព្រះពុទ្ធសាសនា។
ក្នុងនោះក៏មានការសម្តែងរបាំត្រុដិផងដែរ ជូនដល់ថ្នាក់ដឹកក្រសួងទស្សនាដែលជារបាំប្រពៃណីចូលឆ្នាំខ្មែរ ហើយរបាំត្រុដិនេះគឺជារបាំមួយដែលមាន
វ័យចំណាស់ជារបាំវប្បធម៌ខ្មែរ ដែលបានរក្សាតាំងពីបុរាណកាល ហើយគេតែងតែឃើញរបាំត្រុដិនេះគេយកមកសម្តែងនៅក្នុងពិធីបុណ្យធំៗ
របស់ខ្មែរយើងដើម្បីបណ្តេញឧបទ្រពចង្រៃដែលកើតមាននៅឆ្នាំចាស់ឲ្យ ចៀសចាកចេញឆ្ងាយ ព្រមទាំងទទួលបានមកវិញនូវសិរីសួស្ដីជ័យមង្គល
និងវិបុលសុខគ្រប់ប្រការសម្រាប់ឆ្នាំថ្មី៕
អត្ថបទដកស្រង់ចេញពីគេហទំព័រអគ្គនាយកដ្ឋានវិទ្យុ និងទូរទស្សន៍បាយ័ន