ខេត្តព្រៃវែង៖ នៅព្រឹកថ្ងៃពុធ១០រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៩ ខែឧសភា ឆ្នាំ២០១៨នេះ ក្រុមការងារអនុវត្តគម្រោងជំនួយបច្ចេកទេសការបញ្ជ្រាបការប្រែប្រួលអាកាសធាតុទៅក្នុងផែនការអភិវឌ្ឍដល់រដ្ឋបាលថ្នាក់ស្រុក និងឃុំ (SPCR) នៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានរៀបចំវគ្គបណ្តុះបណ្តាលស្តីពី ការបញ្ជ្រាបភាពធន់នឹងការប្រែប្រួលអាកាសធាតុទៅក្នុងការរៀបចំផែនការ និងការអនុវត្តគម្រោងហេដ្ឋារចនាសម្ព័ន្ធដែលធន់នឹងការប្រែប្រួលអាកាសធាតុដល់រដ្ឋបាលថ្នាក់ក្រោមជាតិក្រោមមូលនិធិគាំទ្រពីធនាគារអភិវឌ្ឍន៍អាស៊ី (ADB)។
វគ្គបណ្តុះបណ្តាលនេះប្រព្រឹត្តឡើងរយៈពេលពីរថ្ងៃ នៅថ្ងៃពុធ១០រោច និងថ្ងៃព្រហស្បតិ៍១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៩ និង១០ ខែឧសភា ឆ្នាំ២០១៨ ដោយមានសមាសភាពរដ្ឋបាលថ្នាក់ក្រោមជាតិប្រមាណ ៣០រូបមកពី១២ខេត្តចូលរួមក្នុងនោះ រួមមាន៖ ខេត្តព្រះវិហារ សៀមរាប កំពង់ធំ រតនៈគិរី មណ្ឌលគិរី ស្ទឹងត្រែង ក្រចេះ កណ្តាល កំពង់ចាម ត្បូងឃ្មុំ ស្វាយរៀង និងខេត្តបាត់ដំបង។
ថ្លែងក្នុងពិធីបើកវគ្គបណ្តុះបណ្តាលពីខេត្តព្រៃវែង លោក ឡុង វិសិដ្ឋ អនុប្រធានអង្គភាពគ្រប់គ្រង និងគាំទ្រកម្មវិធីនៃលេខាធិការដ្ឋាន គ.ជ.អ.ប និងជានាយកសម្របសម្រួលគម្រោង SPCR បានមានប្រសាសន៍ស្វាគមន៍រដ្ឋបាលថ្នាក់ក្រោមជាតិទាំងអស់ដែលបានចូលរួមស្វែងយល់ និងបង្កើនការយល់ដឹងពាក់ព័ន្ធនឹងការប្រែប្រួលអាកាសធាតុទៅក្នុងការរៀបចំ និងការអនុវត្តគម្រោងវិនិយោគរបស់រដ្ឋបាលថ្នាក់ក្រោមជាតិក្នុងតំបន់ទីប្រជុំជន និងជនបទ។ តំណាងលេខាធិការដ្ឋាន គ.ជ.អ.ប បានបន្តមានប្រសាសន៍ថា បច្ចុប្បន្ននេះ ពិភពលោកកំពុងផ្តោតការយកចិត្តទុកដាក់នឹងការប្រែប្រួលអាកាសធាតុ ដោយគេបានរៀបចំ និងបញ្ចូលផែនការសកម្មភាពបញ្ជ្រាបភាពធន់នឹងការប្រែប្រួលអាកាសធាតុទៅក្នុងគម្រោងអភិវឌ្ឍន៍នានា ពិសេសគឺ ការប្រែប្រួលអាកាសធាតុដែលបង្កផលប៉ះពាល់ដល់ស្រ្តី និងកុមារ។
អនុប្រធានអង្គភាពគ្រប់គ្រង និងគាំទ្រកម្មវិធីនៃលេខាធិការដ្ឋាន គ.ជ.អ.ប សង្ឃឹមយ៉ាងមុតមាំថា សិក្ខាកាមទាំងអស់នឹងចែករំលែកបទពិសោធន៍ការងាររបស់ខ្លួនទៅវិញទៅមក និងស្វែងយល់ពីវគ្គបណ្តុះបណ្តាលបន្ថែម ដើម្បីយកចំណេះជំនាញទៅបណ្តុះបណ្តាលផ្សព្វផ្សាយបន្តក្នុងមូលដ្ឋានរៀងៗខ្លួន។
ឱកាសនេះដែរ លោក អ៊ុយ សាគុណ នាយករដ្ឋបាលសាលាខេត្តព្រៃវែងបានសម្តែងការរីករាយ និងស្វាគមន៍ដែលក្រុមការងារលេខាធិការដ្ឋាន គ.ជ.អ.ប ជ្រើសរើសខេត្តព្រៃវែងជាទីតាំងអនុវត្ត បណ្តុះបណ្តាល និងផ្សព្វផ្សាយគម្រោងបន្តទៅថ្នាក់មូលដ្ឋាន។ លោកបានមានប្រសាសន៍ថា វគ្គបណ្តុះបណ្តាលនេះពិតជាមានសារៈសំខាន់ណាស់ ដោយសាររដ្ឋបាលថ្នាក់ក្រោមជាតិអាចបង្កើនការយល់ដឹងពាក់ព័ន្ធនឹងការប្រែប្រួលអាកាសធាតុទៅក្នុងការរៀបចំ និងការអនុវត្តគម្រោងវិនិយោគរបស់ខ្លួន ដើម្បីឆ្លើយតបនឹងបញ្ហាប្រឈមរបស់ប្រជាពលរដ្ឋក្នុងមូលដ្ឋាន។ លោកនាយករដ្ឋបាលសាលាខេត្តព្រៃវែងជឿជាក់យ៉ាងមុតមាំថា វគ្គបណ្តុះបណ្តាលនេះនឹងក្លាយជាមេរៀនមូលដ្ឋានគ្រឹះដ៏រឹងមាំឱ្យរដ្ឋបាលថ្នាក់ក្រោមជាតិមានធនធានសមត្ថភាព ដើម្បីបន្តអនុវត្តនិងផ្សព្វផ្សាយក្នុងថ្នាក់មូលដ្ឋានរបស់ខ្លួន។
ក្នុងវគ្គបណ្តុះបណ្តាលនេះ រដ្ឋបាលថ្នាក់ក្រោមជាតិដែលជាគ្រូបង្គោលបានស្វែងយល់មេរៀនសំខាន់ៗពីអ្នកជំនាញបន្ស៊ាំនឹងការប្រែប្រួលអាកាសធាតុនៃលេខាធិការដ្ឋាន គ.ជ.អ.ប ក្នុងនោះ រួមមាន៖ លក្ខណៈវិនិច្ឆ័យទូទៅសម្រាប់គម្រោងហេដ្ឋារចនាសម្ព័ន្ធជនបទដែលធន់នឹងអាកាសធាតុ, មូលនិធិបន្ស៊ាំនឹងការប្រែប្រួលអាកាសធាតុ, ការសិក្សាបច្ចេកទេសក្នុងការរៀបចំគម្រោងហេដ្ឋារចនាសម្ព័ន្ធបន្ស៊ាំនឹងការប្រែប្រួលអាកាសធាតុ, ដំណើរការរៀបចំ និងការពិនិត្យបច្ចេកទេសគម្រោង, គោលការណ៍ណែនាំស្តីពីការវិភាគផលប៉ះពាល់បរិស្ថានគម្រោង, នីតិវិធីលទ្ធកម្ម និងការអនុវត្តគម្រោងឃុំ សង្កាត់ ក្រុង ស្រុក និងឧបករណ៍ជ្រើសរើសគម្រោងទាក់ទង និងហានិភ័យអាកាសធាតុ។ សូមបញ្ជាក់ថា នេះជាវគ្គបណ្តុះបណ្តាលលើកទីបីហើយដែលក្រុមការងារអនុវត្តគម្រោង SPCR បានរៀបចំវគ្គបណ្តុះបណ្តាលក្រោមមូលនិធិគាំទ្រពី ADB។ កន្លងទៅ ក្រុមការងារ SPCR បានរៀបចំវគ្គបណ្តុះបណ្តាលស្តីពី ការបញ្ជ្រាបការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយទៅក្នុងដំណើរការកសាងផែនការអភិវឌ្ឍន៍៥ឆ្នាំនិងកម្មវិធីវិនិយោគ៣ឆ្នាំរំកិលដល់រដ្ឋបាលថ្នាក់ក្រោមជាតិផងដែរ ដើម្បីឱ្យរដ្ឋបាលថ្នាក់ក្រោមជាតិមានសមត្ថភាពអនុវត្តគម្រោងដោយខ្លួនឯងផ្ទាល់៕