ភ្នំពេញ ១៩ វិច្ឆិកា ២០១៥៖ រដ្ឋបាលថ្នាក់ក្រោមជាតិ នឹងមានប្រព័ន្ធគ្រប់គ្រងបុគ្គលិកមួយដែលផ្ដល់សិទ្ធអំណាចដល់ក្រុមប្រឹក្សាក្នុងការគ្រប់គ្រង ចាត់ចែង និងជ្រើសរើសបុគ្គលិក នៅពេលដែលមុខងារត្រូវបានផ្ទេរយ៉ាងពេញលេញដល់រដ្ឋបាលថ្នាក់ក្រោមជាតិ។
ភ្នំពេញ ១៩ វិច្ឆិកា ២០១៥៖ រដ្ឋបាលថ្នាក់ក្រោមជាតិ នឹងមានប្រព័ន្ធគ្រប់គ្រងបុគ្គលិកមួយដែលផ្ដល់សិទ្ធអំណាចដល់ ក្រុមប្រឹក្សាក្នុងការគ្រប់គ្រង ចាត់ចែង និងជ្រើសរើសបុគ្គលិក នៅពេលដែលមុខងារត្រូវបានផ្ទេរយ៉ាងពេញលេញដល់រដ្ឋបាលថ្នាក់ក្រោមជាតិ។
នេះជាការលើកឡើងរបស់ឯកឧត្ដម ង៉ាន់ ចំរើន អនុរដ្ឋលេខាធិការក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋាន គ.ជ.អ.ប ក្នុងសិក្ខាសាលាចែករំលែកបទពិសោធន៍ស្ដីពីការផ្ទេរមុខងារ និងធនធានពីក្រសួង ស្ថាប័នថ្នាក់ជាតិទៅរដ្ឋបាលថ្នាក់ក្រោមជាតិ កាលពីថ្ងៃទី១៩ ខែវិច្ឆិកា ឆ្នា២០១៥។
ឯកឧត្ដម បានបន្ថែមថា នៅពេលដែលព្រះរាជក្រឹត្យស្ដីពីលក្ខន្តិកៈដោយឡែកសម្រាប់បុគ្គលិករដ្ឋបាលថ្នាក់ក្រោមជាតិត្រូវបានអនុម័ត គឺនឹងក្លាយជាប្រព័ន្ធមួយសម្រាប់គ្រប់គ្រងមន្ត្រីរាជការនៅរដ្ឋបាលថ្នាក់ក្រោមជាតិ ដើម្បីធានាថានៅពេលដែលមុខងារ និងធនធានត្រូវបានផ្ទេរដល់រដ្ឋបាលថ្នាក់ក្រោមជាតិ ធនធានមនុស្សដែលជាមន្ត្រីដែលត្រូវបានផ្ទេរ គឺមិនមានការបាត់បងផលប្រយោជន៍រួមទាំងតួនាទី ឋានៈជាដើម។
ចំពោះដំណើរការនៃការផ្ទេរមុខងារ ឯកឧត្ដម បានបញ្ជាក់ថា កន្លងមកក្រសួងអភិវឌ្ឍន៍ជនបទ និងក្រសួងសុខាភិបាល បាននិងកំពុងអនុវត្តការផ្ទេរមុខងារសាកល្បងចំនួន០៣ (ការជួសជុល ថែទាំប្រព័ន្ធផ្គត់ផ្គង់ទឹកស្អាតជនបទ ការផ្ដល់សេវាអនាម័យជនបទ និងការគ្រប់គ្រងថែទាំមណ្ឌលសុខភាព) ដល់ក្រុង ស្រុកគោលដៅ។ ដោយឡែកក្រសួងបរិស្ថានបានសម្រេចផ្ទេរមុខងារគ្រប់គ្រងសំរាម សំណល់រឹងទីប្រជុំជនពីរាជធានី ខេត្តដល់ក្រុង ស្រុកទូទាំងប្រទេស។
ក្នុងឱកាសនោះដែរ ឯកឧត្ដម ង៉ាន់ ចំរើន ក៏បានមានប្រសាសន៍រំលឹកដល់ក្រសួង ស្ថាប័នដែលទើបចាប់ផ្ដើមរៀបចំបញ្ជីវិភាគមុខងារ ត្រូវពិនិត្យលើតែមុខងារណាដែលជាអាទិភាពហើយគិតថារដ្ឋបាលក្រុង ស្រុកអាចអនុវត្តបាន។
គួរបញ្ជក់ថា សិក្ខាសាលាចែករំលែកបទពិសោធន៍ស្ដីពីការផ្ទេរមុខងារ និងធនធានពីក្រសួង ស្ថាប័នថ្នាក់ជាតិទៅរដ្ឋបាលថ្នាក់ក្រោមជាតិ ត្រូវបានរៀបចំឡើងដោយលេខាធិការដ្ឋាន គ.ជ.អ.ប ក្រោមកិច្ចសហការជាមួយកម្មវិធី EU SPACE (GIZ) ដោយបានអញ្ជើញទីប្រឹក្សាអន្តរជាតិលើផ្នែកផ្ទេរមុខងារដើម្បីចែករំលែកបទពិសោធន៍ជូនដល់ថ្នាក់ដឹកនាំក្រសួង ស្ថាប័នអាទិភាពចំនួន១៤ និងអ្នកពាក់ព័ន្ធនានា៕ NCDDS