ភ្នំពេញ ២៤ កុម្ភៈ ២០១៧៖ សម្ដេចតេជោ ហ៊ុន សែន នាយករដ្ឋមន្ត្រីបានបន្តជំរុញឱ្យក្រសួង ស្ថាប័នថ្នាក់ជាតិទាំងអស់ត្រូវបន្តខិតខំផ្ទេរមុខងារ និងធនធានសមស្របទៅឱ្យរដ្ឋបាលថ្នាក់ក្រោមជាតិយ៉ាងតិចចំនួនមួយ ដើម្បីឆ្លើយតបតាមតម្រូវការរបស់ប្រជាពលរដ្ឋនៅមូលដ្ឋានឱ្យមានប្រសិទ្ធភាពខ្ពស់។
ភ្នំពេញ ២៤ កុម្ភៈ ២០១៧៖ សម្ដេចតេជោ ហ៊ុន សែន នាយករដ្ឋមន្ត្រីបានបន្តជំរុញឱ្យក្រសួង ស្ថាប័នថ្នាក់ជាតិទាំងអស់ត្រូវបន្តខិតខំផ្ទេរមុខងារ និងធនធានសមស្របទៅឱ្យរដ្ឋបាលថ្នាក់ក្រោមជាតិយ៉ាងតិចចំនួនមួយ ដើម្បីឆ្លើយតបតាមតម្រូវការរបស់ប្រជាពលរដ្ឋនៅមូលដ្ឋានឱ្យមានប្រសិទ្ធភាពខ្ពស់។
នេះជាប្រសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០១៦ និងលើកទិសដៅការងារឆ្នាំ ២០១៧ របស់ក្រសួងមហាផ្ទៃ នៅរសៀលថ្ងៃទី២៤ ខែកុម្ភៈ ឆ្នាំ២០១៧ នៅសាលប្រជុំក្រសួងមហាផ្ទៃ។
សម្ដេចមានប្រសាសន៍ថា ការអនុវត្តកំណែទម្រង់វិមជ្ឈការ និងវិសហមជ្ឈការបានឈានដល់ដំណាក់កាលកាន់តែស៊ីជម្រៅនោះគឺដំណាក់កាលការផ្ទេរមុខងារ និងធនធាន ដែលតម្រូវឱ្យក្រសួង ស្ថាប័ននីមួយៗត្រូវផ្ទេរមុខងារសមស្របយ៉ាងតិចចំនួនមួយដល់រដ្ឋបាលថ្នាក់ក្រោមជាតិ។ «ខ្ញុំនៅតែបន្តអំពាវនាវឱ្យបណ្ដារដ្ឋមន្ត្រីនៅទីនេះ បន្តធ្វើការផ្ទេរមុខងារ និងធនធានទៅឱ្យរដ្ឋបាលថ្នាក់ក្រោមជាតិ។ អត់ត្រូវនៅកកស្ទះនៅខាងលើនោះទេ [នៅក្រសួង ស្ថាប័ន]»។
សម្ដេចមានប្រសាសន៍បន្តទៀតថា ជាលទ្ធផល រហូតមកដល់ពេលបច្ចុប្បន្ននេះ មានក្រសួង ស្ថាប័នចំនួន១៥ បាននឹងកំពុងដំណើរការផ្ទេរមុខងារ និងធនធាន និងបានធ្វើសំណើផ្ទេរមុខងារនិងធនធានជាបន្តបន្ទាប់ដើម្បីឆ្លើយតបតម្រូវការរបស់ប្រជាពលរដ្ឋនៅមូលដ្ឋាននីមួយៗ។
ក្នុងឱកាសនោះដែរ សម្ដេចតេជោក៏មានប្រសាសន៍ឱ្យគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បន្តសហការ សម្របសម្រួល និងដឹកនាំកែសម្រួលរចនាសម្ព័ន្ធគ្រប់គ្រងរបស់រដ្ឋបាលស្រុកឱ្យសមស្របតាមស្ថានភាពបច្ចុប្បន្ន ពោលគឺរៀបចំទៅជាចង្កោមៗដែលត្រូវស្ថិតក្រោមរចនាសម្ព័ន្ធដែលមានស្រាប់។ ឧទាហរណ៍ចង្កោមផលិតកម្ម មានផ្នែកកសិកម្ម អភិវឌ្ឍន៍ជនបទ បរិស្ថាន ឧស្សាហកម្ម រ៉ែនិងថាមពល។ល៕