ភ្នំពេញ ២៥ មេសា ២០១៦៖ ក្រសួងបរិស្ថាន សហការជាមួយក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៥ ខែមេសា ឆ្នាំ២០១៦ នេះ បានរៀបចំសិក្ខាសាលាពិគ្រោះយោបល់ថ្នាក់ជាតិស្តីពី «ការរៀបចំដាក់ព្រៃឡង់ ព្រៃក្រវាញខាងត្បូង ព្រៃព្រះរកា ព្រៃសៀមប៉ាងខាងលិច និងព្រៃវ៉ឺនសៃ ជាតំបន់ការពារធម្មជាតិ»។
ភ្នំពេញ ២៥ មេសា ២០១៦៖ ក្រសួងបរិស្ថាន សហការជាមួយក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៥ ខែមេសា ឆ្នាំ២០១៦ នេះ បានរៀបចំសិក្ខាសាលាពិគ្រោះយោបល់ថ្នាក់ជាតិស្តីពី «ការរៀបចំដាក់ព្រៃឡង់ ព្រៃក្រវាញខាងត្បូង ព្រៃព្រះរកា ព្រៃសៀមប៉ាងខាងលិច និងព្រៃវ៉ឺនសៃ ជាតំបន់ការពារធម្មជាតិ»។
ការរៀបចំសិក្ខាសាលានេះធ្វើឡើងក្នុងគោលបំណងដើម្បីពិនិត្យ និងវាយតម្លៃតំបន់ការពារធម្មជាតិថ្មី ពិភាក្សាពីចំណាត់ថ្នាក់នៃតំបន់ការពារធម្មជាតិ និងសំយោគមតិយោបល់របស់អ្នកពាក់ព័ន្ធទាំងអស់សម្រាប់ការគ្រប់គ្រងតំបន់ការពារធម្មជាតិទាំងអស់នេះឱ្យមានប្រសិទ្ធភាព។
ភាគីពាក់ព័ន្ធនានាបានចាប់អារម្មណ៍ខ្ពស់ និងគូសបញ្ជាក់ពីសារៈសំខាន់ក្នុងការដាក់ព្រៃផ្តល់ផលចំនួន ៥ កន្លែងជាតំបន់ការពារធម្មជាតិថាបានចូលរួមក្នុងកិច្ចគាំពារបរិស្ថាន និងការអភិរក្សជីវៈចម្រុះ និងព្រៃឈើក៏ដូចជាជួយដល់ការលើកកម្ពស់ជីវភាពរស់នៅរបស់ប្រជាសហគមន៍នៅក្នុងតំបន់នោះ។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា សិក្ខាសាលាថ្ងៃនេះ គឺជាថ្ងៃប្រវត្តិសាស្ត្រមួយ ដែលបង្ហាញពីការទទួលខុសត្រូវខ្ពស់ និងការផ្លាស់ប្តូរផ្នត់គំនិតថ្មីរបស់ភាគីពាក់ព័ន្ធលើការងារការពារ និងអភិរក្សលើធនធានធម្មជាតិ។
ឯកឧត្តម សាយ សំអាល់ បានស្នើដល់ភាគីពាក់ព័ន្ធនានាចូលរួមក្នុងការផ្តល់យោបល់ចាំបាច់នានាទាក់ទងនឹងព្រៃផ្តល់ផលទាំង ៥ កន្លែងនេះ ដើម្បីឆ្លើយតបនឹងតម្រូវការជាក់ស្តែង បំណងការពារតំបន់ទាំងនេះប្រកបដោយប្រសិទ្ធភាព។ ឯកឧត្តមរដ្ឋមន្ត្រីបានស្នើសុំឱ្យភាគីពាក់ព័ន្ធ រួមទាំងសហគមន៍នៅក្នុងតំបន់ទាំងអស់ត្រូវសហការគ្នាក្នុងការការពារធានធានធម្មជាតិ។
ឯកឧត្តមរដ្ឋមន្ត្រី ក៏បានមានប្រសាសន៍អំពីដំណើរការធ្វើទំនើបកម្មស្ថាប័នសម្រាប់ក្រសួងបរិស្ថាននាពេលកន្លងមក ជាពិសេសការរៀបចំរចនាសម្ព័ន្ធគ្រប់គ្រងឡើងវិញ ការពង្រឹងសមត្ថភាពធនធានមនុស្ស ការរៀបចំគោលនយោបាយ និងយុទ្ធសាស្ត្រ និងការរៀបចំបង្កើតក្រមបរិស្ថាន ដើម្បីឆ្លើយតបទៅនឹងតម្រូវការជាក់ស្តែងចំពោះមុខ និងអនាគតពាក់ព័ន្ធនឹងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព។
ឯកឧត្តមរដ្ឋមន្ត្រី បានគូសបញ្ជាក់ថា នៅក្នុងគោលនយោបាយអាណត្តិទី៥ នេះ រាជដ្ឋាភិបាលកម្ពុជាមិនបានផ្តល់សម្បទានដីសេដ្ឋកិច្ចថ្មីឡើយ ហើយបានបង្កើតគណៈកម្មាធិការអន្តរក្រសួងមួយដើម្បីត្រួតពិនិត្យ និងវាយតម្លៃលើគម្រោងវិនិយោគសម្បទានដីសេដ្ឋកិច្ច ដែលជាលទ្ធផលរាជរដ្ឋាភិបាលបានសម្រេចលុបគោលការណ៍វិនិយោគសម្បទានដីសេដ្ឋកិច្ចចំនួន ២៣ ដែលមិនបានអនុវត្តត្រឹមត្រូវតាមកិច្ចសន្យា និងគោលការណ៍នីតិវិធីច្បាប់ ហើយក្រុមហ៊ុនមួយចំនួនបានសម្រេចប្រគល់ត្រឡប់មកវិញនូវផ្ទៃដីវិនិយោគរបស់ខ្លួនដោយស្មគ្រចិត្ត ព្រមទាំងបានកាត់បន្ថយរយៈពេលវិនិយោគពី៩៩ ឆ្នាំមកនៅត្រឹម៥០ឆ្នាំ និងបានចូលរួមក្នុងការកាត់បន្ថយជម្លោះដីធ្លីនៅក្នុងប្រទេសកម្ពុជា។
ឯកឧត្តមរដ្ឋមន្ត្រី ក៏បានលើកឡើងពីភាពជោគជ័យនាពេលកន្លងមកក្នុងការទប់ស្តាត់ បង្ក្រាបការកាប់ឈើខុសច្បាប់ ហើយក្រសួងនឹងបន្តខិតខំក្នុងការបង្ក្រាបទប់ស្កាត់ការបំផ្លាញធនធានធម្មជាតិ។
ឯកឧត្តមរដ្ឋមន្ត្រី សាយ សំអាល់ បានថ្លែងថា ក្រសួងបរិស្ថានបានផ្ទេរគម្រោងវិនិយោគអភិវឌ្ឍន៍សម្បទានដីសេដ្ឋកិច្ចចំនួន ៧៣ ព្រមទាំងឯកសារពាក់ព័ន្ធទាំងអស់ទៅឱ្យក្រសួងកសិកម្ម រក្ខាប្រមាញ់ និងនេសាទគ្រប់គ្រង។ ចំណែកក្រសួងកសិកម្មត្រូវផ្ទេរតំបន់ការពារ និងអភិរក្សព្រៃឈើចំនួន ១៣ កន្លែងព្រមទាំងឯកសារពាក់ព័ន្ធនានាមកឱ្យក្រសួងបរិស្ថានគ្រប់គ្រង។ ជាងនេះទៅទៀត រាជរដ្ឋាភិបាលកម្ពុជា ក៏បានអនុញ្ញាតឱ្យក្រសួងបរិស្ថានបន្តការរៀបចំដាក់តំបន់ព្រៃផ្តល់ផលចំនួន ៥ កន្លែងរួមមានព្រៃឡង់ ព្រៃក្រវាញខាងត្បូង ព្រៃព្រះរកា ព្រៃសៀមប៉ាងខាងលិច និងព្រៃវ៉ឺនសៃ ជាតំបន់ការពារធម្មជាតិ។
ប្រភព៖ ក្រសួងបរិស្ថាន
