កំពង់ចាម ២ កញ្ញា ២០១៤៖ ឯកឧត្ដម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ កាលពី ថ្ងៃទី២៩ ខែសីហា ឆ្នាំ២០១៤ បានអញ្ជើញពិនិត្យការអនុវត្តគម្រោងកែលំអផ្លូវជនបទ ចំនួនពីរខ្សែនៅ ខេត្តកំពង់ចាម និងខេត្តត្បូងឃ្មុំដែលជាគម្រោងរបស់រាជរដ្ឋាភិបាលកម្ពុជា គាំទ្រហិរញ្ញប្បទានដោយធនាគារអភិវឌ្ឍន៍អាស៊ី (ADB)។
អត្ថបទដកស្រង់ចេញពីគេហទំព័រក្រសួងអភិវឌ្ឍន៍ជនបទ៖ អានព័ត៌មានបន្ថែម
កំពង់ចាម ២ កញ្ញា ២០១៤៖ ឯកឧត្ដម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី២៩ ខែសីហា ឆ្នាំ២០១៤ បានអញ្ជើញពិនិត្យ
ការអនុវត្តគម្រោងកែលំអផ្លូវជនបទចំនួនពីរខ្សែនៅ ខេត្តកំពង់ចាម និងខេត្តត្បូងឃ្មុំដែលជាគម្រោងរបស់រាជរដ្ឋាភិបាលកម្ពុជា គាំទ្រហិរញ្ញប្បទាន
ដោយធនាគារអភិវឌ្ឍន៍អាស៊ី (ADB)។
ផ្លូវខ្សែទី១ មានទីតាំងពីភ្នំហាន់ជ័យ ទៅស្រុកស្ទឹងត្រង់ ខេត្តកំពង់ចាម ប្រវែង៩,៩៦ គ.ម និងខ្សែទី២ មានទីតាំងពីពងទឹក ឃុំរការពប្រាំ ស្រុកត្បូងឃ្មុំ
ទៅវត្តឈូក ឃុំឈូក ស្រុកក្រូចឆ្មារ ខេត្តត្បូងឃ្មុំ មានប្រវែង១២,៥ គ.ម។ ផ្លូវទាំងពីរខ្សែនេះត្រូវកែលំអពីផ្លូវក្រាលក្រួសក្រហម ទៅជាផ្លូវ
ក្រាលកៅស៊ូពីរជាន់ (DBST)។
នៅក្នុងឱកាសនៃការជួបសំណេះសំណាលជាមួយប្រជាពលរដ្ឋទទួលផល នៅភូមិព្រែកកក់ ឃុំព្រែកបាក់ ស្រុកស្ទឹងត្រង់ ខេត្តកំពង់ចាម
និងនៅភូមិឈូក ឃុំឈូក ស្រុកត្បូងឃ្មុំ ខេត្តត្បូងឃ្មុំ ឯកឧត្ដម ជា សុផារ៉ា បានមានប្រសាសន៍ពាំនាំនូវការផ្ដាំផ្ញើសាកសួរសុខទុក្ខពីសំណាក់
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោកជំទាវ ជូនដល់ប្រជាជនទូទាំងស្រុកស្ទឹងត្រង់
ស្រុកត្បូងឃ្មុំ និងស្រុកក្រូចឆ្មារ។
ឯកឧត្ដម បានមានប្រសាសន៍ថា ជានិច្ចកាលរាជរដ្ឋាភិបាលតែងតែយកចិត្តទុកដាក់ក្នុងការកសាងផ្លូវថ្នល់ជូនដល់ប្រជាជនប្រើប្រាស់
ដើម្បីផ្តល់ក្តីសង្ឃឹមជូនពួកគាត់ក្នុងការកែប្រែជីវភាពឲ្យកាន់តែល្អប្រសើរ ដូចពាក្យពោលថា “មានផ្លូវ គឺមានសង្ឃឹម” ។
ឯកឧត្តម បញ្ជាក់ថា ជាក់ស្តែងផ្លូវក្រាលកៅស៊ូ ប្រភេទ DBST ដែលកំពុងសាងសងនៅក្នុងភូមិនេះនឹងដាក់ជូនប្រជាជនក្នុងពេលឆាប់ៗខាងមុខនេះ
ដើម្បីជួយសម្រួលដល់ការដឹកជញ្ជូនកសិផល និងទំនិញផ្សេងៗចំណេញពេលវេលា និងថវិកាតិច និងផ្ដល់ឱកាសការងារ និងការបង្កើត
មុខរបរថ្មីជួយលើកកម្ពស់កម្រិតជីវភាព សម្រួលដល់ការតាំងលំនៅដ្ឋានថ្មី ផ្តល់លក្ខណៈងាយស្រួលដល់ប្រជាជន សិស្សានុសិស្ស និងគ្រូបង្រៀន
ធ្វើដំណើរទៅកាន់សាលារៀនទៅកាន់មន្ទីរពេទ្យ ទៅកាន់ទីផ្សារ ទៅកាន់វត្តអារាម ទៅកាន់មជ្ឈមណ្ឌលផ្តល់សេវាសាធារណៈដទៃទៀត
និងផ្តល់លទ្ធភាពក្នុងការអភិវឌ្ឍលើវិស័យកសិពាណិជ្ជកម្ម។
ជាមួយគ្នានេះ ឯកឧត្ដមរដ្ឋមន្ត្រី បានរំលឹកឡើងថា ប្រទេសកម្ពុជាយើងមានឱកាសអភិវឌ្ឍឲ្យមានភាពរីកចម្រើនលើគ្រប់វិស័យរួមទាំងផ្លូវថ្នល់
កំពុងសាងសង់នេះផង គឺដោយសារប្រទេសជាតិមានសន្តិភាពពេញលេញ ដែលជាសមិទ្ធផលដ៏ធំធេងនៃការខិតខំរបស់រាជរដ្ឋាភិបាលកម្ពុជា។
ឯកឧត្ដម បន្ថែមថា សន្តិភាព គឺជាមូលដ្ឋានគ្រឹះនៃការអភិវឌ្ឍន៍ ដូច្នេះហើយរាជរដ្ឋាភិបាលដាច់ខាតត្រូវបន្តការពារ និងថែរក្សាសន្តិភាព
និងស្ថេរភាពនយោបាយ ដើម្បីភាពរីកចម្រើន និងសុខដុមរបស់ប្រជាពលរដ្ឋនៅទូទាំងប្រទេស។
ជាទីបញ្ចប់ ឯកឧត្ដម ជា សុផារ៉ា បានផ្ដាំផ្ញើដល់ប្រជាជនទាំងអស់ចូលរួមថែរក្សាផ្លូវនេះ និងប្រើប្រាស់ប្រកបដោយការប្រុងប្រយ័ត្នខ្ពស់
ជាពិសេសនៅពេលធ្វើដំណើរឆ្លងកាត់ផ្លូវ ឬធ្វើដំណើរតាមដងផ្លូវ ដើម្បីជៀសវាងនូវគ្រោះថ្នាក់ចរាចរណ៍ជាយថាហេតុ និងសូមឱ្យចូលរួមដាំឈើ ឬដើមត្នោតនៅតាមដងផ្លូវដើម្បីសោភ័ណភាព និងបរិស្ថាន៕
