សិក្ខាសាលាឆ្លុះបញ្ចាំងការអនុវត្តផែនការគណនេយ្យភាពសង្គមប្រចាំឆ្នាំ២០២១ ខេត្តកែប

ខេត្តកែប៖ នារសៀលថ្ងៃពុធ ១០រោច ខែមិគសិរ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៩ ខែធ្នូ ឆ្នាំ២០២១ រដ្ឋបាលខេត្តកែបបានរៀបចំសិក្ខាសាលាឆ្លុះបញ្ចាំងការអនុវត្តផែនការគណនេយ្យភាពសង្គមប្រចាំឆ្នាំ២០២១ ដើម្បីឆ្លុះបញ្ចាំងពីលទ្ធផលការងារ និងបញ្ហាប្រឈមដែលកើតមានកន្លងមក ជាពិសេសដើម្បីទទួលបាននូវអនុសាសន៍គន្លឹះថ្មីៗបន្ថែមទៀតសម្រាប់ជាមូលដ្ឋានក្នុងការអនុវត្តកម្មវិធីគម្រោងគណនេយ្យភាពសង្គមរបស់ខេត្តកែបឱ្យទទួលបានលទ្ធផលកាន់តែល្អប្រសើរបន្ថែមសម្រាប់ឆ្នាំបន្ទាប់។ សិក្ខាសាលានេះប្រព្រឹត្តទៅក្រោមអធិបតីភាព តំណាងឯកឧត្តម អភិបាលនៃគណៈអភិបាលខេត្តកែប លោក អ៊ុក ថា អភិបាលរងខេត្តកែប ដែលមានសមាសភាពចូលរួមមកពី តំណាងលេខាធិការដ្ឋាន គ.ជ.អ.ប. ក្រុមការងារគណនេយ្យភាពសង្គមថ្នាក់ខេត្ត ក្រុង ស្រុក នាយក នាយករងសាលាបឋមសិក្សាទូទាំងខេត្ត លោកមេឃុំ ចៅសង្កាត់ទូទាំងខេត្ត ស្មៀនឃុំ សង្កាត់ទូទាំងខេត្ត អង្គការ CCSP អង្គការ WVI-C និងអ្នកសម្របសម្រួលគណនេយ្យភាពសហគមន៍ (CAF) សរុបប្រមាណជា ១០០នាក់។

តំណាងលេខាធិការដ្ឋាន គ.ជ.អ.ប. លោក ជេដ្ឋ គីមជុង ប្រធានសម្របសម្រួលគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ និងជាអនុប្រធានអង្គភាពត្រួតពិនិត្យ វាយតម្លៃ និងព័ត៌មាន បានផ្តល់អនុសាសន៍មួយចំនួនដល់ក្រុមការងារគណនេយ្យភាពសង្គម ថ្នាក់ខេត្ត ថ្នាក់ក្រុង ថ្នាក់ស្រុក អង្គភាពស្ថាប័នពាក់ព័ន្ធ និងអង្គការដៃគូអនុវត្តនានា យកចិត្តទុកដាក់ លើចំណុចសំខាន់ៗ មួយចំនួនដូចខាងក្រោម៖

ធ្វើការបញ្ចូលទិន្នន័យក្នុងប្រព័ន្ឋឱ្យចប់សព្វគ្រប់ក្នុងដំណាច់ឆ្នាំ២០២១ ខាងមុខនេះ។
ផ្ញើរបាយការណ៍ប្រចាំឆ្នាំ ស្តីពីវឌ្ឍនៈភាព បញ្ហាប្រឈមនៃការអនុវត្តសកម្មភាពគណនេយ្យ ភាពសង្គម ជូនលេខាធិការដ្ឋាន គ.ជ.អ.ប.
រៀបចំវគ្គតម្រង់ទិសអភិវឌ្ឍសមត្ថភាពនិងគាំទ្របច្ចេកទេសអំពីការងារគណនេយ្យភាពសង្គម ដល់មន្រ្តីរាជការ ក្រុមប្រឹក្សា និង អង្គភាពពាក់ព័ន្ធ
រដ្ឋបាលខេត្ត រដ្ឋបាលក្រុង និងរដ្ឋបាលស្រុក គួរពិនិត្យលទ្ធភាពគាំទ្រថវិកាសម្រាប់គាំទ្រ ដល់ដំណើរការអនុវត្ត I-SAF ដំណាក់កាលទី២ នៅឆ្នាំ២០២២ និងឆ្នាំបន្តបន្ទាប់ទៀត។
រដ្ឋបាលខេត្ត ក្រុង ស្រុក និងរដ្ឋបាលឃុំ សង្កាត់ អង្គការសង្គមស៊ីវិល ត្រូវមានកិច្ចសហការ ឱ្យកាន់តែល្អប្រសើរឡើងបន្ថែមទៀត ក្នុងការអនុវត្តសកម្មភាពគណនេយ្យភាពសង្គម។
រដ្ឋបាលខេត្ត និងរដ្ឋបាលក្រុង ស្រុក ត្រូវសហការគ្នា ធ្វើការផ្សព្វផ្សាយឲ្យបានទូលំទូលាយ អំពីការអនុវត្តការងារគណនេយ្យភាពសង្គម ក្នុងកម្មវិធី ឬ វេទិការរបស់គណៈអភិបាល ឬ ក្នុងកិច្ចប្រជុំនានា ទៅតាមពេលវេលាសមស្របណាមួយ។
រដ្ឋបាលខេត្ត និងរដ្ឋបាលក្រុង ស្រុក គួរមានរបៀបវារៈមួយក្នុងកិច្ចប្រជុំទៀងទាត់ប្រចាំខែ របស់ក្រុមប្រឹក្សា ស្តីពីការអនុវត្តការងារគណនេយ្យភាពសង្គម សម្រាប់ការអភិវឌ្ឍតាម បែបប្រជាធិបតេយ្យនៅថ្នាក់ក្រោមជាតិ។

សូមជម្រាបជូនថា រដ្ឋបាលខេត្តកែបបានអនុវត្តការងារគណនេយ្យភាពសង្គមនេះ នៅរដ្ឋបាលក្រុង ស្រុកគោលដៅ ចំនួន០២ ដែលគ្របដណ្តប់ លើអង្គភាព ផ្តល់សេវារដ្ឋបាលឃុំ សង្កាត់ចំនួន០៥ សាលាបឋមសិក្សា ចំនួន២២ និងមណ្ឌលសុខភាពចំនួន០៥៕