ខេត្តតាកែវ៖ នៅថ្ងៃទី០៥ ខែកញ្ញា ឆ្នាំ២០១៩ រដ្ឋបាលស្រុកត្រាំកក់បានរៀបចំកិច្ចប្រជុំប្រចាំឆមាសទី១ស្តីពី វឌ្ឍនភាពនៃការអនុវត្តការងារគណនេយ្យភាពសង្គម និងការពិនិត្យទិន្នន័យលទ្ធផលការងារ (Post-on) កន្លងមក។
ពិធីបើកកិច្ចប្រជុំនេះប្រព្រឹត្តឡើងនៅក្នុងសាលប្រជុំសាលាស្រុកត្រាំកក់ ក្រោមអធិបតីភាពលោក ម៉ឹង វុធី អភិបាលរង នៃគណៈអភិបាលខេត្តតាកែវ តំណាងដ៏ខ្ពង់ខ្ពស់ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងមានការអញ្ជើញចូលរួមពីសំណាក់លោក អភិបាលរង សមាជិកក្រុមប្រឹក្សាស្រុក លោកនាយករដ្ឋបាល លោក លោកស្រីមន្រ្តីរាជការសាលាស្រុក ក្រុមការងារគណនេយ្យភាពសង្គមនៅរដ្ឋបាលថ្នាក់ខេត្ត រដ្ឋបាលស្រុក លោកមេឃុំ ស្មៀនឃុំ នាយក នាយិកាសាលាបឋមសិក្សា ប្រធានការិយាល័យសុខាភិបាលស្រុកប្រតិបត្តិ (OD) ប្រធានការិយាល័យអប់រំ យុវជន និងកីឡាស្រុក លោកលោកស្រីប្រធានមណ្ឌលសុខភាព តំណាងអង្គការទស្សនពិភពលោកប្រចាំខេត្តតាកែវ តំណាងអង្គការសុវណ្ណាភូមិ តំណាងអង្គការ CADDP និងអ្នកសម្របសម្រួលការងារគណនេយ្យភាពសង្គមសហគមន៍(CAF)សរុបចំនួន១៥៦នាក់។
ក្នុងនាមឯកឧត្តម អ៊ូច ភា អភិបាលនៃគណៈអភិបាលខេត្តតាកែវ លោក ម៉ឹង វុធី អភិបាលរង នៃគណៈអភិបាលខេត្តតាកែវ បានថ្លែងអំណរគុណ និងស្វាគមន៍យ៉ាងកក់ក្ដៅចំពោះលោក លោកស្រី ដែលបានអញ្ជើញ ចូលរួមកិច្ចប្រជុំប្រចាំឆមាសទី១ របស់រដ្ឋបាលស្រុកត្រាំកក់ ស្តីពីការអនុវត្តការងារគណនេយ្យភាព សង្គម និងផ្ទៀងផ្ទាត់ទិន្នន័យ Post-On ( ការបំពេញការងារ ព័ត៌មានថវិកា ចំណូល-ចំណាយ) របស់ អង្គភាពផ្តល់សេវានៅថ្នាក់មូលដ្ឋានទាំង០៣វិស័យ មានរដ្ឋបាលឃុំ មណ្ឌលសុខភាព និងសាលាបឋម សិក្សា ។
លោក ម៉ឹង វុធី បានមានប្រសាសន៍ថា គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានរៀបចំ និងអនុម័តផែនការយុទ្ធសាស្រ្តគណនេយ្យភាពសង្គមនៅថ្ងៃទី១១ ខែកក្កដា ឆ្នាំ២០១៣ ដែលមានផែនការយុទ្ធសាស្រ្តគន្លឹះចំនួន៥គឺ (១)ព័ត៌មាន៖ ការលើកកម្ពស់ តម្លាភាព និងភាពងាយ ទទួលបាននូវព័ត៌មានអំពីស្តង់ដារ ថវិកា និងការបំពេញការងារ (២)ការត្រួតពិនិត្យតាមដាន៖ ការសម្រប សម្រួលឱ្យមានការត្រួតពិនិត្យតាមដានរបស់ប្រជាពលរដ្ឋទៅលើសកម្មភាព និងការផ្តល់សេវាកម្ម មូលដ្ឋានរបស់រដ្ឋបាលថ្នាក់ក្រោមជាតិ (៣)ការងារថវិកា៖ ការលើកកម្ពស់សមត្ថភាពយល់ដឹងរបស់ប្រជាពលរដ្ឋអំពីថវិកា (៤)ការសម្របសម្រួលការចូលរួម៖ ការគាំទ្រដល់តួអង្គនានា និងការកសាងសមត្ថភាពដល់តួអង្គទាំងនោះដើម្បីសម្របសម្រួលការចូលរួមរបស់ប្រជាពលរដ្ឋ និងកិច្ចដំណើរការនានា នៃគណនេយ្យភាពសង្គម និង(៥)ការសិក្សារៀនសូត្រស្វែងយល់៖ការប្រមូលមេរៀនបទពិសោធន៍ដែលបានមកពីអន្តរាគមន៍នានានៅមូលដ្ឋាន ដើម្បីប្រែក្លាយបទពិសោធន៍ទាំងនោះដាក់បញ្ចូលទៅក្នុងគោលនយោបាយរបស់រាជរដ្ឋាភិបាល និងពង្រឹងការបំពេញការងារអង្គការសង្គមស៊ីវិលនានា។
លើសពីនេះ លោកបានមានប្រសាសន៍បន្ថែមថា នៅឆ្នាំ២០១៩នេះគឺជាឆ្នាំដំបូងនៃការអនុវត្តគណនេយ្យភាពសង្គមដំណាក់កាលទី២ដែលមានរយៈពេល៥ឆ្នាំ (២០១៩-២០២៣) ដែលលេខាធិការដ្ឋានគ.ជ.អ.ប បានចាប់យកខេត្តតាកែវ អនុវត្តលើស្រុកចំនួន០៩ ក្នុងនោះមានឃុំ៩៧,មណ្ឌលសុខភាពចំនួន៧៥ និងសាលាបឋមសិក្សាចំនួន ៣៦៨មកអនុវត្ត ដែលសម្របសម្រួលអនុវត្តសកម្មភាពគ្រោងដោយអង្គការទស្សនៈពិភពលោកអន្តរជាតិ អង្គការដៃគូក្នុងស្រុកចំនួន០៦ក្រោមការផ្តល់ជំនួយពីសហភាពអឺរ៉ុប(EU) និងសម្របសម្រួលគាំទ្រការ ងារបច្ចេកទេសដោយលេខាធិការដ្ឋាន គ.ជ.អ.ប ព្រមទាំងរដ្ឋបាលថ្នាក់ក្រោមជាតិ ។
ជាមួយនេះ លោក ម៉ឹង វុធី បានបញ្ជាក់ថា ក្នុងកិច្ចប្រជុំនេះ គណៈអភិបាលស្រុក លោក លោកស្រី នឹងទទួលបាននូវការយល់ដឹងស្តីពីលទ្ធផលសម្រេចបានក្នុងឆមាសទី១ ឆ្នាំ២០១៩, បញ្ហាប្រឈមដំណោះស្រាយ, ផែនការ ដែលត្រូវអនុវត្ត បន្តរវាងផ្នែកផ្គត់ផ្គង់ និងផ្នែកតម្រូវការ ព្រមទាំងផ្ទៀងផ្ទាត់ទិន្នន័យ Post-On ឲ្យបាន ច្បាស់លាស់មុននឹងធ្វើការបិតផ្សាយ និងផ្សព្វផ្សាយជាសាធារណៈជូនប្រជាពលរដ្ឋ។
លោក ម៉ឹង វុធី បានស្នើសុំលោកលោកស្រី មេត្តាយកចិត្តទុកដាក់តាមដានស្តាប់នូវបទបង្ហាញនូវប្រធានបទនីមួយៗ និងចូលរួម ផ្តល់យោបល់ឱ្យបានផុលផុសទៅតាមប្រធានបទនៅក្នុងក្រុមពិភាក្សាព្រោះថាគំនិតយោបល់អនុសាសន៍របស់ លោក លោកស្រី គឺជាធាតុចូលដ៏សំខាន់សម្រាប់ការអនុវត្តការងារគណនេយ្យភាព សង្គមប្រកបដោយជោគជ័យនៅរដ្ឋបាលស្រុក ក៏ដូចជាខេត្តតាកែវទាំងមូលផងដែរ៕
