រាជធានីភ្នំពេញ៖ នៅព្រឹកថ្ងៃសុក្រ ១០រោច ខែជេស្ឋ សំរឹទ្ធិស័ក ព.ស. ២៥៦២ ត្រូវនឹងថ្ងៃទី០៨ ខែមិថុនា ឆ្នាំ២០១៨ ឯកឧត្តម ង៉ាន់ ចំរើន អនុរដ្ឋលេខាធិការ ក្រសួង មហាផ្ទៃ និងអនុប្រធានប្រតិបត្តិនៃលេខាធិការដ្ឋានគណៈកម្មាធិការជាតិសម្រាប់ការអភិឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញដឹកនាំ កិច្ចប្រជុំស្តីពី ការរៀបចំផ្ទេរធនធាននានាសម្រាប់អនុវត្តមុខងារក្នុងវិស័យសង្គមកិច្ចដែលបានប្រគល់ទៅឱ្យរដ្ឋបាលថ្នាក់ក្រោមជាតិ ពិសេសគឺការរៀបចំផ្ទេរកញ្ចប់ថវិកាសម្រាប់មណ្ឌលកុមារកំព្រាទៅឱ្យរដ្ឋបាលរាជធានី ខេត្តដែលមានគ្រោងផែនការថវិកានៅឆ្នាំ២០១៩ខាងមុខ។
កិច្ចប្រជុំបានរៀបចំឡើងក្នុងសាលប្រជុំលេខាធិការដ្ឋាន គ.ជ.អ.ប ដោយមានសមាសភាពថ្នាក់ដឹកនាំពាក់ព័ន្ធអញ្ជើញមកពីលេខាធិការដ្ឋាន គ.ជ.អ.ប ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុសរុបប្រមាណ ៣០រូប។
កិច្ចប្រជុំស្តីពីការរៀបចំផ្ទេរធនធាននៃមុខងារវិស័យសង្គមកិច្ចទៅឱ្យរដ្ឋបាលថ្នាក់ក្រោមជាតិមានគោលបំណងដើម្បីពន្លឿនកិច្ចដំណើរការផ្ទេរធនធាននានា និងរៀបចំបែបផែននៃការផ្ទេរធនធានទៅឱ្យរដ្ឋបាលថ្នាក់ក្រោមជាតិ។