ភ្នំពេញ ៣១ សីហា ២០១៦៖ ការប្ដេជ្ញាចិត្តរបស់ក្រសួងមហាផ្ទៃ និងអង្គការតម្លាភាពកម្ពុជាទៅលើគម្រោងរៀបចំបង្កើតសាលាអភិបាលកិច្ចល្អ យ៉ាងហោចណាស់នឹងបើកវគ្គបណ្ដុះបណ្ដាលឲ្យបានមួយវគ្គនៅក្នុងចុងឆ្នាំ២០១៦។
ភ្នំពេញ ៣១ សីហា ២០១៦៖ ការប្ដេជ្ញាចិត្តរបស់ក្រសួងមហាផ្ទៃ និងអង្គការតម្លាភាពកម្ពុជាទៅលើគម្រោងរៀបចំបង្កើតសាលាអភិបាលកិច្ច ល្អយ៉ាងហោចណាស់នឹងបើកវគ្គបណ្ដុះបណ្ដាលឲ្យបានមួយវគ្គនៅក្នុង ចុងឆ្នាំ២០១៦។
នេះជាការលើកឡើងរបស់ លោក ប៊ុត ជិ នាយកគម្រោងសាលាអភិបាលកិច្ចក្រសួងមហាផ្ទៃ ក្នុងកិច្ចប្រជុំពិគ្រោះយោបល់ស្ដីពីការអភិវឌ្ឍន៍កម្មវិធីសិក្សា និងវគ្គបណ្ដុះបណ្ដាល កាលពីថ្ងៃទី៣១ ខែសីហា ឆ្នាំ២០១៦ នៅរាជធានីភ្នំពេញ។
លោក ប៊ុត ជិ បានបន្តទៀតថា កិច្ចប្រជុំដែលមានការចូលរួមពីអង្គការសង្គមស៊ីវិល និងនាយកដ្ឋានជំនាញមានគោលបំណងសំខាន់ចំនួន៣ រួមមាន៖ ១. ពិគ្រោះ ពិភាក្សាអំពីក្រុមគោលដៅដែលគួរទទួលបានវគ្គបណ្ដុះបណ្ដាល ២. ពិគ្រោះ ពិភាក្សាអំពីប្រធានបទឬ មុខវិជ្ជាសម្រាប់កម្មវិធីបណ្ដុះបណ្ដាលរយៈពេលខ្លី និង ៣. វាយតម្លៃតាមដានលទ្ធផល ក៏ដូចជាចំណុចខ្វះខាតនៃវគ្គបណ្ដុះបណ្ដាលចុងឆ្នាំ២០១៦នេះ។
គម្រោងរៀបចំបង្កើតសាលាអភិបាលកិច្ច គឺជាការផ្ដួចផ្ដើមរួមគ្នារវាងក្រសួងមហាផ្ទៃ និងអង្គការតម្លាភាពកម្ពុជាដែលមានទស្សនៈវិស័យវែងឆ្ងាយក្នុងការរួមចំណែកអភិវឌ្ឍធនធានមនុស្សដោយផ្ដោតលើការលើកកម្ពស់ និងបណ្ដុះនូវសីលធម៌ ចរិយាធម៌ សច្ចៈធម៌ សុចរិតភាព និងអត្តសញ្ញាណជាតិសម្រាប់សង្គមកម្ពុជា ប្រជាពលរដ្ឋគ្រប់ស្រទាប់វណ្ណៈ និងអង្គការស្ថាប័នគ្រប់វិស័យ និងគ្រប់កម្រិត។ គោលបំណងនៃការបង្កើតកម្មវិធីសិក្សានេះគឺដើម្បី៖
- បង្កើនប្រសិទ្ធភាពការងារ
- លើកកម្ពស់អភិបាលកិច្ចល្អ និងការទទួលខុសត្រូវសង្គម
- បណ្ដុះសុចរិតភាព និងការប្រឆាំងអំពើពុករលួយ
- សុខដុមនីយកម្មស្ថាប័ន និងសង្គមជាតិ
- ជំរុញកំណើនសេដ្ឋកិច្ច និងការអភិវឌ្ឍដោយចីរភាពសម្រាប់អន្តរជំនាន់
- បង្កើនតម្លាភាព និងសិទ្ធិទទួលព័ត៌មាន
- លើកកម្ពស់ការប្រើប្រាស់ព័ត៌មាន ការទំនាក់ទំនង និងបច្ចេកវិទ្យា (ICT)
- ទំនាក់ទំនងសាធារណៈ
គួរបញ្ជាក់ផងដែរថា កិច្ចប្រជុំពិគ្រោះយោបល់ស្ដីពីការអភិវឌ្ឍន៍កម្មវិធីសិក្សា និងវគ្គបណ្ដុះបណ្ដាលប្រព្រឹត្តទៅដោយមានការចូលរួមពី នាយកគម្រោងសាលាអភិបាលកិច្ច ក្រសួងមហាផ្ទៃ មន្រ្តីសម្របសម្រួលអង្គការតម្លាភាពកម្ពុជា តំណាងអង្គការសង្គមស៊ីវិល ក្រុមការងារគាំទ្រការអនុវត្តគម្រោង នៃនាយកដ្ឋានសុចរិតភាព និងអភិបាលកិច្ចក្រសួងមហាផ្ទៃ និងអ្នកជំនាញការឯករាជ្យផ្នែករៀបចំផែនការយុទ្ធសាស្ត្រសម្រាប់និរន្តរភាពគម្រោងផងដែរ។ NCDDS
