ខេត្តកែប៖ ក្រុមការងារលេខាធិការដ្ឋានគណៈកម្មាធិការជាតិសម្រាប់អភិវឌ្ឍន៍ប្រជាធិបតេយ្យនៅថ្នាក់ក្រោមជាតិ (គ.ជ.អ.ប) សហការជាមួយក្រុមការងារអគ្គលេខាធិការគណៈកម្មាការជាតិគ្រប់គ្រងគ្រោះមហន្តរាយ (គ.ជ.គ.ម) បានរៀបចំសិក្ខាសាលាឆ្លុះបញ្ជាំងលទ្ធផលនៃការអនុវត្តគម្រោងកាត់បន្ថយហានិភ័យគ្រោះមហន្តរាយនៅសហគមន៍មូលដ្ឋាន និងគម្រោងពង្រឹងការសម្របសម្រួលការគ្រប់គ្រងគ្រោះមហន្តរាយ ក្រោមអធិបតីភាព ឯកឧត្តម ឡាំ ហេងហួត អគ្គលេខាធិការគណៈកម្មាការជាតិគ្រប់គ្រងគ្រោះមហន្តរាយ និងជាប្រធានគម្រោង ដោយមានអ្នកចូលរួមប្រមាណជា ១០០នាក់ ដែលបានប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី១៣ – ១៥ ខែមិថុនា ឆ្នាំ២០១៨។
សិក្ខាសាលានេះ រៀបចំឡើងដើម្បីឆ្លុះបញ្ជាំងការអនុវត្តគម្រោងរយៈពេលបីឆ្នាំកន្លងមក ពោលគឺជាឆ្នាំចុងក្រោយនៃការបញ្ចប់គម្រោងនេះ។ គម្រោងនេះ បានចាប់យកឃុំគោលដៅចំនួន ២៤ នៃស្រុកចំនួន ១២ ក្នុងខេត្តចំនួន ៦ រួមមាន៖ ខេត្តព្រៃវែង ខេត្តសៀមរាប ខេត្តបន្ទាយមានជ័យ ខេត្តកំពង់ធំ ខេត្តបាត់ដំបង និងខេត្តកំពង់ចាម។
គម្រោងកាត់បន្ថយហានិភ័យគ្រោះមហន្តរាយនៅសហគមន៍មូលដ្ឋាន (CDRR) ទទួលបានការគាំទ្រពីមូលនិធិជប៉ុនសម្រាប់កាត់បន្ថយភាពក្រីក្រ មានបំណងកែលម្អការត្រៀមខ្លួនដើម្បីឆ្លើយតបទៅនឹងគ្រោះមហន្តរាយធម្មជាតិនៅក្នុងប្រទេសកម្ពុជា ជាមួយនឹងលទ្ធផលរំពឹងទុកនៃការគ្រប់គ្រងគ្រោះមហន្តរាយ នឹងការឆ្លើយតបឱ្យកាន់តែប្រសើរឡើងនៅថ្នាក់ស្រុក និងថ្នាក់ឃុំសង្កាត់ដើម្បីជួយដោះស្រាយគ្រោះមហន្តរាយធម្មជាតិនៅក្នុងប្រទេសកម្ពុជា ដោយមានអគ្គលេខាធិការដ្ឋាន គ.ជ.គ.ម គឺជាស្ថាបន័ប្រតិបត្តិ ចំណែកឯលេខាធិការដ្ឋាន ឝ.ជ.អ.ប គឺជាស្ថាបន័អនុវត្ត។
គោលបំណងចំបងៗនៃគម្រោងមានចំនួន ២ ដូចតទៅ៖
១. ដើម្បីកាត់បន្ថយផលប៉ះពាល់អវិជ្ជមានពីទឹកជំនន់ និងគ្រោះមហន្តរាយផ្សេងទៀតទៅលើបណ្តាលសហគមន៍ដែលងាយរងគ្រោះខ្លាំងបំផុតនៅកម្ពុជា។
២. សូចនាករសំខាន់ៗស្តីពីការអនុវត្តការងាររួមមាន (១) ការកាត់បន្ថយការបាត់បង់អាយុជីវិត និងមុខរបរចិញ្ចឹមជីវិតបាន ១៥% បើធៀបទៅនឹងការសិក្សាមូលដ្ឋានដំបូងកាលពីឆ្នាំ២០១៣ (រយៈពេលមធ្យម ៥ឆ្នាំ ពីឆ្នាំ២០០៩ ទៅ ២០០១៣) ក្នុងចំនួនគ្រួសារដែលរងគ្រោះ និងការបាត់បង់សេដ្ឋកិច្ចដោយសារគ្រោះទឹកជំនន់នៅក្នុងតំបន់គោលដៅនៅត្រឹមឆ្នាំ២០២០ និង (២) ត្រឹមឆ្នាំ២០១៧ អង្គភាពរដ្ឋាភិបាលមូលដ្ឋាន (ថ្នាក់ស្រុក និងឃុំ សង្កាត់) បានលើកកម្ពស់សមត្ថភាពក្នុងការគ្រប់គ្រងគ្រោះមហន្តរាយរបស់ខ្លួន និងបានបញ្ជ្រាបនូវការត្រៀមបម្រុងសម្រាប់គ្រោះមហន្តរាយការកាត់បន្ថយហានិភ័យគ្រោះមហន្តរាយ និងការបន្ស៊ាំទៅនឹងការប្រែប្រួលអាកាសធាតុចូលទៅក្នុងដំណើរការរៀបចំផែនការអភិវឌ្ឍន៍មូលដ្ឋាន។
ចំណែកសកម្មភាពត្រូវផ្តោតមានចំនួន ៤ ដូចជា៖ សមាសភាគទី១ សមត្ថភាពស្ថាបន័ និងបច្ចេកទេសប្រសើរជាងមុននៃស្រុកអាទិភាពលើការគ្រប់គ្រងគ្រោះមហន្តរាយ ការកាត់បន្ថយហានិភ័យគ្រោះមហន្តរាយ និងការបន្ស៊ាំទៅនឹងការប្រែប្រួលអាកាសធាតុ។ សមាសភាគទី២ សមត្ថភាពនៅថ្នាក់ឃុំ សង្កាត់ ត្រូវបានពង្រឹងលើការគ្រប់គ្រងគ្រោះមហន្តរាយ និងការកាត់បន្ថយហានិភ័យគ្រោះមហន្តរាយ និងការបន្ស៊ាំទៅនឹងការប្រែប្រួលអាកាសធាតុ។ សមាសភាគទី៣ ការអនុវត្តសកម្មភាពការកាត់បន្ថយហានិភ័យតាមសហគមន៍ និងការបន្ស៊ាំទៅនឹងការប្រែប្រួលអាកាសធាតុ។ សមាសភាពទី៤ ការគ្រប់គ្រងគម្រោងប្រកបដោយប្រសិទ្ធភាព និងការផ្សព្វផ្សាយនូវការអនុវត្តល្អៗ និងវិធីសាស្ត្រសម្រាប់ភាពច្នៃប្រឌិត។
លទ្ធផលនៃការអនុវត្តគម្រោង CDRR មានដូចតទៅ៖
– គម្រោងហេដ្ឋារចនាសម្ព័ន្ធថ្នាក់ស្រុកសម្រេចបាន១០០% សរុបចំនួន ១២គម្រោង។
– គម្រោងហេដ្ឋារចនាសម្ព័ន្ធថ្នាក់ឃុំសម្រេចបាន១០០% សរុបចំនួន ២៤គម្រោង។
– គម្រោងសាងសង់ផ្លូវបេតុងអាមេប្រវែង៤៦០ម៉ែត្រ ទទឹង៤ម៉ែត្រ មានទីតាំងនៅឃុំពាមប្រធ្នោះ ស្រុកកោះសូទិន ខេត្តកំពង់ចាម មិនត្រឹមត្រូវតាមស្ថានភាពទីតាំងគម្រោងដែលមានស្រាប់ (ទទឹងផ្លូវបេតុង ធំជាងគ្រឹះផ្លូវ)។
– ការដាក់លូកប់ក្នុងដីជ្រៅដែលបណ្តាលឱ្យក្បាលលូលិបចូលខាងក្នុងជ្រៅមើលមិនឃើញដូចជាការសាងសង់លូ ឃុំបឹងដោល និងឃុំរាធរ ស្រុកព្រះស្តេច និងឃុំកោះសំពៅ ស្រុកពាមជរ ខេត្តព្រៃវែង ឃុំបវេល ស្រុកបវេល ខេត្តបាត់ដំបង។
– គម្រោងសាងសង់ផ្លូវដីសប្រវែង៤១៨ម៉ែត្រ ទទឹងង៤ម៉ែត្រ និងកម្ពស់ ២.៥ម៉ែត្រ ស្ថិតក្នុងភូមិស្ទឹងកំបុត ឃុំរហាល ស្រុកព្រះនេត្រព្រះ ខេត្តបន្ទាយមានជ័យ មិនបានដាក់លូរំដោះទឹកចេញនៅរដូវវស្សា។
ជារួមមេរៀន និងបទពិសោធន៍ល្អៗនៃការអនុវត្តគម្រោងកន្លងមក ដែលយើងអាចយកជាគំរូមានដូចជា៖ (១) ដើម្បីឱ្យការអនុវត្តគម្រោងកាត់បន្ថយហានិភ័យគ្រោះមហន្តរាយនៅសហគមន៍មូលដ្ឋានប្រកបដោយប្រសិទ្ធភាព គុណភាព និងឆ្លើយតបតាមតម្រូវការជាក់ស្តែងនៅមូលដ្ឋាន លុះត្រាតែមានការចូលរួមគ្រប់ភាគីពាក់ព័ន្ធ ជាពិសេសអាជ្ញាធរមូលដ្ឋាន និងអ្នកទទួលផលគម្រោង។ (២) ការគ្រប់គ្រងថវិកាគម្រោងតាមរយៈការបើកគណនីធនាគារពាណិជ្ជណាមួយនៅថ្នាក់ក្រោមជាតិ ជាកត្តាជំរុញឱ្យការអនុវត្តគម្រោងមានតម្លាភាព គណនេយ្យភាព និងទាន់ពេលវេលា។ និង (៣) យន្តការនៃការចុះត្រួតពិនិត្យការអនុវត្តគម្រោងពីថ្នាក់ជាតិប្រចាំជាចលករមួយជំរុញឱ្យមានការយកចិត្តទុកដាក់ពីសំណាក់អ្នកទទួលការចំពោះការអនុវត្តគម្រោងប្រកបដោយគុណភាព និងត្រឹមត្រូវតាមស្តង់ដារបច្ចេកទេសដែលបានកំណត់៕
