សេចក្តីប្រកាសព័ត៌មាន
ស្តីពី
លទ្ធផលនៃកិច្ចប្រជុំលើកទី២២ របស់ គ.ជ.អ.ប.
ថ្ងៃអង្គារ ១៣រោច ខែមិគសិរ ឆ្នាំថោះ បញ្ចស័ក ព.ស. ២៥៦៧
ត្រូវនឹងថ្ងៃទី០៩ ខែមករា ឆ្នាំ២០២៤
នាពេលរសៀលថ្ងៃអង្គារ ១៣រោច ខែមិគសិរ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី០៩ ខែមករា ឆ្នាំ២០២៤ នៅទីស្តីការក្រសួងមហាផ្ទៃ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) បានរៀបចំកិច្ចប្រជុំលើកទី២២ ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប. ដោយមានការចូលរួមពីឯកឧត្តមឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី ឯកឧត្តម លោកជំទាវ រដ្ឋលេខាធិការដែលជាសមាជិក សមាជិកានៃ គ.ជ.អ.ប. រដ្ឋមន្រ្តី រដ្ឋលេខាធិការតំណាងក្រសួង ស្ថាប័ន និងថ្នាក់ដឹកនាំរដ្ឋបាលរាជធានី ខេត្ត ដែលមានចំនួនសរុបប្រមាណ១៥០រូប។
កិច្ចប្រជុំលើកទី២២ របស់ គ.ជ.អ.ប. នេះ បានពិនិត្យ ពិភាក្សា និងអនុម័តលើរបៀបវារៈសំខាន់ៗដូចខាងក្រោម៖
១. របាយការណ៍អនុវត្តផែនការសកម្មភាព និងថវិកាឆ្នាំ២០២៣ របស់ គ.ជ.អ.ប.
បន្ទាប់ពីការធ្វើបទបង្ហាញ ការពិនិត្យ និងពិភាក្សា អង្គប្រជុំបានអនុម័តលើរបាយការណ៍នៃការអនុវត្ត ផែនការសកម្មភាព និងថវិកាឆ្នាំ២០២៣របស់ គ.ជ.អ.ប. ដែលបានសម្រេចលទ្ធផលប្រមាណ៨៥%នៃលទ្ធផលរំពឹងទុក និងសកម្មភាពនៅសេសសល់មួយចំនួនត្រូវលើកយកមកអនុវត្តនៅឆ្នាំ២០២៤។
ជាមួយគ្នានេះ អង្គប្រជុំក៏បានឯកភាពឱ្យក្រសួង ស្ថាប័ន និងរដ្ឋបាលថ្នាក់ក្រោមជាតិត្រូវបន្តពង្រឹងភាពម្ចាស់ការ និងការទទួលខុសត្រូវលើការអនុវត្តផែនការសកម្មភាព និងថវិកាឆ្នាំ២០២៤របស់ គ.ជ.អ.ប.ឱ្យសម្រេច បានលទ្ធផលតាមការរំពឹងទុក។
២. សេចក្តីព្រាងផែនការសកម្មភាព និងថវិកា ឆ្នាំ២០២៤ របស់ គ.ជ.អ.ប.
ផែនការសកម្មភាព និងថវិកាឆ្នាំ២០២៤ របស់ គ.ជ.អ.ប. គឺជាផែនការឆ្នាំទី៤នៃការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យដំណាក់កាលទី២ ដែលបានបន្តផ្តោតលើការពង្រឹងរដ្ឋបាល ថ្នាក់ក្រោមជាតិឱ្យកាន់តែមានភាពរឹងមាំ ស្អាតស្អំ មានសមត្ថភាព លទ្ធភាព និងការទទួលខុសត្រូវច្បាស់លាស់ក្នុងការអនុវត្តមុខងារដែលបានផ្ទេរទៅឱ្យរដ្ឋបាលថ្នាក់ក្រោមជាតិ ព្រមទាំងការធ្វើទំនើបកម្មយន្តការនិងនីតិវិធីនៃការផ្តល់សេវាសាធារណៈ និងការអភិវឌ្ឍមូលដ្ឋាន ដើម្បីលើកកម្ពស់គុណភាព ប្រសិទ្ធភាព តម្លាភាព និងគណនេយ្យភាពក្នុងការផ្តល់សេវាសាធារណៈជូនប្រជាពលរដ្ឋឱ្យកាន់តែប្រសើរឡើង។
ជារួម បន្ទាប់ពីការពិនិត្យពិភាក្សា អង្គប្រជុំបានអនុម័តលើផែនការសកម្មភាព និងថវិកាឆ្នាំ២០២៤របស់ គ.ជ.អ.ប. ដែលមានលទ្ធផលរំពឹងទុកចំនួន៣៤ សកម្មភាពជាអាទិភាពចំនួន៨៧ និងសូចនាករចំនួន១៣៩ ក្រោមថវិកាប៉ាន់ស្មានប្រមាណជិត១.៨០០លានដុល្លារ។
៣. សេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅនៃអនុគណៈកម្មាធិការនានារបស់ គ.ជ.អ.ប.
ពាក់ព័ន្ធនឹងរបៀបវារៈនេះ ដើម្បីធានាលើកកម្ពស់ប្រសិទ្ធភាពនៃការដឹកនាំ ការសម្របសម្រួល និងការសម្រួចការអនុវត្តកំណែទម្រង់វិមជ្ឈការ និងវិសហមជ្ឈការ អង្គប្រជុំបានសម្រេចលើការស្នើ
កែសម្រួលអនុគណៈកម្មាធិការនៃ គ.ជ.អ.ប. ដែលមានចំនួន៥ មករក្សាទុកត្រឹមចំនួន៣ គឺ ១. អនុគណៈ
កម្មាធិការមុខងារនិងធនធាន ២.អនុគណៈកម្មាធិការកិច្ចការសារពើពន្ធ និង៣.អនុគណៈកម្មាធិការបុគ្គលិករដ្ឋបាលថ្នាក់ក្រោមជាតិ ដោយស្នើលុបចោលអនុគណៈកម្មាធិការចំនួន២ គឺអនុគណៈកម្មាធិការផែនការរដ្ឋបាលថ្នាក់ក្រោមជាតិ និងអនុគណៈកម្មាធិការសេវាយុត្តិធម៌។ តួនាទី ភារកិច្ចរបស់អនុគណៈ
កម្មាធិការដែលបានលុបចោលទាំងនេះ ត្រូវបានដាក់បញ្ចូលក្នុងតួនាទីរបស់អនុគណៈកម្មាធិការមុខងារ និងធនធាន និងអនុគណៈកម្មាធិការបុគ្គលិករដ្ឋបាលថ្នាក់ក្រោមជាតិ។
៤. របៀបវារៈផ្សេងៗ៖
ក្រៅពីរបៀបវារៈខាងលើ អង្គប្រជុំក៏បានពិនិត្យ ពិភាក្សាលើរបៀបវារៈផ្សេងៗចំនួន៣ទៀតដែលពាក់ព័ន្ធនឹង៖
- ការជំរុញ និងពង្រឹងការគ្រប់គ្រងការវិនិយោគនៅរដ្ឋបាលរាជធានី ខេត្ត ដោយអង្គប្រជុំបានស្នើឱ្យក្រសួង ស្ថាប័នថ្នាក់ជាតិពន្លឿនការធ្វើប្រតិភូកម្មសិទ្ធិអំណាចទៅឱ្យមន្ទីរ អង្គភាពខ្សែបណ្តោយរបស់ខ្លួន ដើម្បីធ្វើជាសេនាធិការឱ្យអនុគណៈកម្មាធិការវិនិយោគនៅរដ្ឋបាលរាជធានី ខេត្តក្នុងការពិនិត្យ និងសម្រេចលើគម្រោងវិនិយោគដែលមានទុនសមមូល៥លានដុល្លារចុះក្រោម យ៉ាងយូរត្រឹមត្រីមាសទី១នៃឆ្នាំ២០២៤នេះ
- ស្ថានភាពនៃការអនុវត្តការងារគណនេយ្យភាពសង្គម ដែលមានវឌ្ឍនភាពគួរឱ្យកត់សម្គាល់ ដោយបានពង្រឹង និងពង្រីកវិសាលភាពនៃការអនុវត្តជាបន្តបន្ទាប់គ្របដណ្តប់ទាំងថ្នាក់ឃុំ សង្កាត់ និងក្រុង ស្រុក ខណ្ឌក្នុងគោលបំណងពង្រឹងការប្រាស្រ័យទាក់ទងរវាងរដ្ឋបាលថ្នាក់ក្រោមជាតិជាមួយប្រជាពលរដ្ឋ និងការជំរុញការចូលរួមរបស់ប្រជាពលរដ្ឋក្នុងការតាមដាន ត្រួតពិនិត្យ និងការផ្តល់យោបល់កែលម្អលើការបំពេញការងារ និងការផ្តល់សេវានៅតាមមូលដ្ឋាន។
- ការពន្លឿនការផ្ទេរធនធានហិរញ្ញវត្ថុទៅឱ្យរដ្ឋបាលក្រុង ស្រុក ខណ្ឌ ដើម្បីឱ្យរដ្ឋបាលក្រុង ស្រុក ខណ្ឌមានលទ្ធភាពអនុវត្តមុខងារតាមវិស័យនានាដែលបានផ្ទេរឱ្យ។
ជារួម កិច្ចប្រជុំ គ.ជ.អ.ប. លើកទី២២នេះ បានបញ្ចប់នៅវេលាម៉ោង១៨ និង០០នាទី នាថ្ងៃខែឆ្នាំដដែល ប្រកបដោយបរិយាកាសរីករាយ។
