ភ្នំពេញ៖ ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ និងប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញជាអធិបតីភាពដ៏ខ្ពង់ខ្ពស់ធ្វើបាឋកថាស្តីពី បញ្ហាប្រឈមនិងកាលានុវត្តភាពសម្រាប់រដ្ឋបាលក្រុង ស្រុក ខណ្ឌដល់ឯកឧត្តមអនុរដ្ឋលេខាធិការ ឯកឧត្តមអគ្គនាយក ឯកឧត្តម លោកជំទាវ អភិបាលរងរាជធានី ខេត្ត លោក លោកស្រីអភិបាលនៃគណៈអភិបាលក្រុង ស្រុក ខណ្ឌចំនួន ៣០០រូប នៅថ្ងៃពុធ ១០កើត ខែភទ្របទ ឆ្នាំច សំរឹទ្ធិស័ក ព.ស. ២៥៦២ នាមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC)។
នៅក្នុងឱកាសបទបាឋកថា ស្តីពីបញ្ហាប្រឈម និងកាលានុវត្តភាពសម្រាប់រដ្ឋបាលក្រុង ស្រុក ខណ្ឌ ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ និងប្រធានលេខាធិការដ្ឋាន គ.ជ.អ.ប បានមានប្រសាសន៍លើកបង្ហាញពីបញ្ហាប្រឈម និងកាលានុវត្តភាពសំខាន់ៗ រួមមាន សាវតារ និងការប្រៀបរវាងរចនាសម្ព័ន្ធគ្រប់គ្រងរដ្ឋបាលក្រុង ស្រុក ខណ្ឌ មុន និងក្រោយកំណែទម្រង់វិមជ្ឈការ និងវិសហមជ្ឈការឆ្នាំ២០០៩, គោលបំណងនៃកំណែទម្រង់វិមជ្ឈការ និងវិសហមជ្ឈការ, បញ្ហាប្រឈម, កាលានុវត្តភាព, និងសេចក្តីសន្និដ្ឋានសម្រាប់ការគ្រប់គ្រងរដ្ឋបាលក្រុង ស្រុក ខណ្ឌ ដែលជារដ្ឋបាលមានសក្តានុពលក្នុងការផ្តល់សេវាសាធារណៈ និងការអភិវឌ្ឍមូលដ្ឋានប្រកបដោយប្រសិទ្ធភាព និងចរីភាព ស្របតាមគោលការណ៍នៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
ឯកឧត្តមរដ្ឋលេខាធិការក្រសួងមហាផ្ទៃ បានមានប្រសាសន៍ទៅកាន់ឯកឧត្តម លោកជំទាវ លោក លោកស្រីដែលមានវត្តមានអញ្ជើញចូលរួមក្នុងវេទិកាថា ការកែទម្រង់ប្រព័ន្ធគ្រប់គ្រងរដ្ឋបាលត្រូវបានរៀបចំឡើងវិញតាមគោលការណ៍នៃរដ្ឋបាលឯកភាព គឺដើម្បីលើកកម្ពស់ប្រសិទ្ធភាពការងារផ្តល់សេវាសាធារណៈជូនប្រជាជនដែលជាម្ចាស់របស់អាជ្ញាធរឱ្យកាន់តែប្រសើរ និងធ្វើឱ្យមានការអភិវឌ្ឍន៍មូលដ្ឋានតាមបែបប្រជាធិបតេយ្យប្រកបដោយចីរភាព។ ជាថ្មីម្តងទៀត ឯកឧត្តមក្រើនរម្លឹកអាជ្ញាធរមូលដ្ឋានត្រូវយកចិត្តទុកដាក់លើគោលការណ៍អភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ក្នុងនោះ រួមមាន ភាពជាតំណាងសាធារណៈ ស្វ័យភាពក្នុងក្របខ័ណ្ឌរដ្ឋបាលសាធារណៈ ការបើកឲ្យមានការពិគ្រោះយោបល់ និងការចូលរួមពីសំណាក់ប្រជាជន ការលើកកម្ពស់គុណភាពជីវិត និងជីវភាពរបស់ប្រជាជននៅមូលដ្ឋាន ការលើកកម្ពស់សមធម៌ តម្លាភាព សុចរិតភាព និងការប្រឆាំងអំពើពុករលួយ។
ជាទីបញ្ចប់នៃបាឋកថា ឯកឧត្តមរដ្ឋលេខាធិការក្រសួងមហាផ្ទៃ និងប្រធានលេខាធិការដ្ឋាន គ.ជ.អ.ប បានផ្តាំផ្ញើ និងណែនាំឯកឧត្តម លោកជំទាវ លោក លោកស្រីអភិបាល និងអភិបាលរងនៃគណៈអភិបាលរាជធានី ខេត្ត ក្រុង ស្រុក ខណ្ឌត្រូវប្រកាន់ភ្ជាប់នូវភាពជាអ្នកដឹកនាំជានិច្ច។ ឯកឧត្តមបានមានប្រសាសន៍បញ្ជាក់ថា អ្នកដឹកនាំមិនចេះគ្រប់រឿងទាំងអស់នោះទេ ដូច្នេះអ្នកដឹកនាំត្រូវតែបង្កើនសមត្ថភាពជាប្រចាំ តាមរយៈការអាន ការសិក្សាស្រាវជ្រាវពីបទពិសោធន៍ការងារ និងតាមដានស្ថានការណ៍វិវត្តរបស់ពិភពលោកដែលកំពុងមានការផ្លាស់ប្តូរជាប្រចាំ។ លើសពីនេះទៀត ឯកឧត្តមរដ្ឋលេខាធិការក្រសួងមហាផ្ទៃបានមានប្រសាសន៍បន្ថែមថា អ្នកដឹកនាំត្រូវចេះជំរុញ ប្រមូល និងលើកទឹកចិត្តមនុស្សជុំវិញខ្លួនឱ្យមកធ្វើការងារជាមួយខ្លួន ហើយត្រូវស្គាល់ព្រំដែនអំណាចឱ្យបានជាក់លាក់ដែលមាន ច្បាប់ និងលិខិតបទដ្ឋានគតិយុត្តនានាជាឧបករណ៍ការពារខ្លួន៕