ខេត្តកោះកុង៖ ក្រុមការងាររេដបូកមកពីក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក្រសួងមហាផ្ទៃ និងរដ្ឋបាលជលផលកម្ពុជា ក្រោមការគាំទ្រមូលនិធិពីគម្រោងមូលនិធិភាពជាដៃគូកាបូនព្រៃឈើ និងកម្មវិធីអភិវឌ្ឍន៍អង្គការសហប្រជាជាតិ (UNDP) បានសហការគ្នារៀបចំសិក្ខាសាលាផ្សព្វផ្សាយស្តីពី រេដបូកនៅរដ្ឋបាលថ្នាក់ក្រោមជាតិដែលមានសមាសភាពរដ្ឋបាលថ្នាក់ក្រោមជាតិចូលរួមប្រមាណ ១០០នាក់មកពីខេត្តចំនួន៤ រួមមាន ខេត្តកោះកុង កំពត ព្រះសីហនុ និងខេត្តកំពង់ស្ពឺ។ សិក្ខាសាលានេះប្រព្រឹត្តឡើងរយៈពេលពីរថ្ងៃ គឺនៅថ្ងៃអង្គារ ១៥កើត និងថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៩ និង៣០ ខែឧសភា ឆ្នាំ២០១៨ ក្នុងសណ្ឋាគារកោះកុងរីហ្សត។
សិក្ខាសាលានេះមានគោលបំណងលើកកម្ពស់កម្រិតយល់ដឹងមន្ត្រី និងថ្នាក់ដឹកនាំមន្ទីរវិស័យពាក់ព័ន្ធនឹងព្រៃឈើ និងថ្នាក់រដ្ឋបាលក្រោមជាតិស្តីពី ទស្សនទានរេដបូក ការផ្តួចផ្តើម ការអនុវត្ត និងវឌ្ឍនភាពនៃកម្មវិធីរេដបូកនៅកម្ពុជា ផែនការអនុវត្តយុទ្ធសាស្រ្តរេដបូកជាតិ និងសេចក្តីត្រូវការនូវការគាំទ្ររបស់មន្ទីរវិស័យ និងរដ្ឋបាលខេត្ត ក្រុង ស្រុក ឃុំ សង្កាត់។
តាងនាមអភិបាលនៃគណៈអភិបាលខេត្តកោះកុង ឯកឧត្តម ស្រេង ហុង អភិបាលរងនៃគណៈអភិបាលខេត្តកោះកុងបានឡើងថ្លែងមតិស្វាគមន៍យ៉ាងកក់ក្តៅចំពោះរដ្ឋបាលថ្នាក់ជាតិមកពីក្រសួង ស្ថាប័នពាក់ព័ន្ធ សិក្ខាកាមរដ្ឋបាលថ្នាក់ក្រោមជាតិ និងម្ចាស់មូលនិធិទាំងអស់ដែលបានអញ្ជើញចូលរួមសិក្ខាសាលានៅក្នុងខេត្តកោះកុង។ ឯកឧត្តមបានមានប្រសាសន៍ថា សិក្ខាសាលានេះពិតជាមានសារៈសំខាន់ណាស់ ពីព្រោះវានឹងជួយឱ្យសិក្ខាកាមនៅរដ្ឋបាលថ្នាក់ក្រោមជាតិបានយល់ជ្រួតជ្រាបពីគម្រោងរេដបូកកាន់តែច្បាស់ ដើម្បីអនុវត្តគម្រោងបង្កើនគម្របព្រៃឈើនៅកម្ពុជា។
ឯកឧត្តមសង្ឃឹមជឿជាក់ថា សិក្ខាសាលាពេលនេះ នឹងត្រូវបានផ្សព្វផ្សាយយ៉ាងទូលំទូលាយដល់អាជ្ញាធរ និងប្រជាពលរដ្ឋមូលដ្ឋាន ដើម្បីចូលរួមអភិរក្សការពារព្រៃឈើ។
ឱកាសនេះដែរ ឯកឧត្តម ជាម ប៉េអា អគ្គនាយករង នៃអគ្គនាយកដ្ឋានរដ្ឋបាលក្រសួងមហាផ្ទៃ និងជាប្រធានអង្គភាពត្រួតពិនិត្យ វាយតម្លៃ និងព័ត៌មាននៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានមានប្រសាសន៍លើកឡើងពីការចេញលិខិតបទដ្ឋានគតិយុត្ត ប្រព័ន្ធគ្រប់គ្រងហិរញ្ញវត្ថុ កម្មវិធី និងផែនការអភិវឌ្ឍន៍មួយច្បាស់លាស់ ដើម្បីឱ្យការអនុវត្តកម្មវិធីរេដបូកនេះឱ្យមានលក្ខណៈល្អប្រសើរ និងមាននិរន្តរភាព។ ឯកឧត្តម ជាម ប៉េអា បានបន្តមានប្រសាសន៍ថា វិធានការនេះគឺជាផែនការអនុវត្តយុទ្ធសាស្ត្រស្តង់ការងារមួយដែលកំណត់ពីការអនុវត្តតួនាទី ភារកិច្ចមួយច្បាស់លាស់រវាងរដ្ឋបាលថ្នាក់ជាតិ និងថ្នាក់ក្រោមជាតិ ពិសេសគឺការអនុវត្តនៅថ្នាក់រដ្ឋបាលមូលដ្ឋាន។ បន្ថែមលើសពីនេះ ឯកឧត្តមបានស្នើអាជ្ញាធរមូលដ្ឋានឱ្យដាក់កម្មវិធីរេដបូកទៅផែនការវិនិយោគរបស់ឃុំ សង្កាត់ ហើយបើកឱកាសឱ្យប្រជាពលរដ្ឋបានចូលរួមជជែកពិភាក្សាគ្នា ដើម្បីឱ្យកម្មវិធីនេះផ្តល់ផលប្រយោជន៍ដល់មនុស្សជំនាន់ក្រោយយូរអង្វែង។
ថ្លែងបើកសិក្ខាសាលាឱកាសនេះដែរ ឯកឧត្តម ជា សំអាង អគ្គនាយក នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ នៃក្រសួងបរិស្ថាន បានមានប្រសាសន៍ថ្លែងអំណរគុណរដ្ឋបាលថ្នាក់ជាតិ និងថ្នាក់ក្រោមជាតិពាក់ព័ន្ធដែលបានអញ្ជើញចូលរួមក្នុងសិក្ខាសាលា ដើម្បីផ្សព្វផ្សាយ និងស្វែងយល់ពីគម្រោងរេដបូកនៅកម្ពុជា។ ឯកឧត្តមបានមានប្រសាសន៍ថា ការអនុវត្តរេដបូកមានគោលបំណងកាត់បន្ថយឧស្ម័នផ្ទះកញ្ចក់ និងការបង្កើនគម្របព្រៃឈើបៃតងនៅកម្ពុជា។
ឯកឧត្តម ជា សំអាង សង្ឃឹមជឿជាក់ថា សិក្ខាកាមទាំងអស់នឹងយល់ដឹងពីរេដបូកនៅកម្ពុជា និងការអនុវត្តកម្រិតអន្តរជាតិ ដើម្បីឱ្យការអនុវត្តរេដបូកកាន់តែទូលំទូលាយ និងមាននិរន្តរភាព។
សូមជម្រាបជូនថា កម្មវិធីរេដបូក គឺជាយន្តការអន្តរជាតិមួយនៃអនុញ្ញាក្របខណ្ឌសហប្រជាជាតិស្តីពី ការប្រែប្រួលអាកាសធាតុ (UNFCCC) ដើម្បីផ្តល់ការលើកទឹកចិត្តដល់បណ្តាប្រទេសកំពុងអភិវឌ្ឍន៍ក្នុងការកាត់បន្ថយការបញ្ចេញឧស្ម័នដែលបណ្តាលមកពីការបាត់បង់ និងរេចរឹលព្រៃឈើ។ រាជរដ្ឋាភិបាលកម្ពុជាបានយកចិត្តទុកដាក់ក្នុងការការពារ និងអភិរក្សធនធានធម្មជាតិ តាមរយៈ ការធ្វើកំណែទម្រង់ស្ថាប័ន ការបង្កើតបន្ថែមតំបន់ការពារ បង្កើតយុទ្ធសាស្ត្រព្រៃឈើថ្មីៗបន្ថែម និងការទទួលយកនូវកម្មវិធី និងគំនិតផ្តួចផ្តើមនានាក្នុងនោះ មានកម្មវិធីរេដបូក (REDD+)។ ហើយ យុទ្ធសាស្ត្ររេដបូកជាតិនេះត្រូវបានទទួលការអនុម័តពីរាជរដ្ឋាភិបាលជាផ្លូវការ កាលពីថ្ងៃទី០៨ ខែធ្នូ ឆ្នាំ២០១៧កន្លងទៅ។