ខេត្តកំពង់ធំ៖ ឯកឧត្តម សុខ លូ អភិបាលនៃគណៈអភិបាលខេត្តកំពង់ធំបានអញ្ជើញជាអធិបតីដ៏ខ្ពង់ខ្ពស់ក្នុងកិច្ចប្រជុំផ្សព្វផ្សាយអំពីសមិទ្ធផលគម្រោង និងផែនការគាំទ្របន្តរយៈពេល៤ឆ្នាំរបស់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) នៅក្នុងឃុំដូង ស្រុកប្រាសាទបល្ល័ង្គ ខេត្តកំពង់ធំ នាថ្ងៃទី២៤ ខែមិថុនា ឆ្នាំ២០១៨ នៅក្នុងបរិវេណវត្តក្របៅ។ កិច្ចប្រជុំនេះមានការអញ្ជើញចូលរួមពីមន្ត្រីពាក់ព័ន្ធនៅក្នុងខេត្ត មន្ត្រីគម្រោង LASED II និងប្រជាពលរដ្ឋចូលរួមសរុបប្រមាណជិត១០០០នាក់។
ការរៀបចំកិច្ចប្រជុំនេះមានគោលបំណងបង្ហាញដល់ប្រជាពលរដ្ឋអំពីសមិទ្ធផល និងផែនការគាំទ្របន្តរយៈពេល៤ឆ្នាំទៅមុខទៀតរបស់គម្រោង LASED II ដែលកំពុងអនុវត្តនៅក្នុងឃុំដូងចាប់ពីឆ្នាំ២០១៦ រហូតដល់ឆ្នាំ២០២១ខាងមុខ។
ឯកឧត្តម សុខ លូ អភិបាលនៃគណៈអភិបាលខេត្តកំពង់ធំបានមានប្រសាសន៍ជម្រាបជូនដល់ប្រជាពលរដ្ឋដែលបានចូលរួមក្នុងឱកាសនោះថា ការដែលលោកអញ្ជើញចូលរួមក្នុងកិច្ចប្រជុំនៅថ្ងៃនេះ គឺដើម្បីជាសក្ខីភាព និងបង្កើនទំនុកចិត្តដល់ប្រជាពលរដ្ឋឱ្យមានជំនឿជឿជាក់លើរាជរដ្ឋាភិបាល អាជ្ញាធរខេត្ត និងមន្ត្រីអនុវត្តគម្រោង LASED II ដែលបាននឹងកំពុងបន្តជួយដល់ប្រជាពលរដ្ឋក្រីក្រគ្មានដីធ្លី និងប្រជាពលរដ្ឋដែលមានដីធ្លីតិចតួច ដើម្បីទទួលបានដីលំនៅឋាន និងដីកសិកម្ម សម្រាប់ការប្រើប្រាស់ក្នុងការបង្កើនជីវភាពរស់នៅ។ ឯកឧត្តមបានបន្ថែមទៀតថា តាមរយៈការអនុវត្តគម្រោង LASED II នៅក្នុងឃុំដូងនេះ ប្រជាពលរដ្ឋដែលបានបំពេញទៅតាមលក្ខខណ្ឌនានារបស់គម្រោង និងប្រជាពលរដ្ឋក្រីក្រអត់ដីធ្លីពិតប្រាកដ ឬក៏មានដីធ្លីតិចតួចនឹងទទួលបានដីសម្បទានសង្គមកិច្ចជាដីលំនៅឋានទំហំ ៣០ x ៤០ ម៉ែត្រ និងដីកសិកម្មទំហំចាប់ពី១ហិចតា ទៅតាមទំហំគ្រួសារ។
ប្រជាពលរដ្ឋដែលបានចូលរួមក្នុងកិច្ចប្រជុំនេះបានសម្តែងនូវការរីករាយ និងសប្បាយចិត្តចំពោះការអនុវត្តគម្រោង LASED II នៅក្នុងឃុំដូង ហើយពួកគាត់កាន់តែមានទំនុកចិត្តបន្ថែមទៀតដោយឃើញវត្តមានឯកឧត្តមអភិបាលខេត្ត និងមន្ត្រីពាក់ព័ន្ធនានាបានចូលរួមកិច្ចប្រជុំផ្សព្វផ្សាយអំពីសមិទ្ធផលគម្រោង និងផែនការគាំទ្របន្តរយៈពេល៤ឆ្នាំរបស់គម្រោង LASED II នៅក្នុងឃុំដូងនៅពេលនេះ។
ទីតាំងដីសង្គមកិច្ចនៅក្នុងឃុំដូង ស្រុកប្រាសាទបល្ល័ង្គ ខេត្តកំពង់ធំ ជាទីតាំងថ្មីទើបត្រូវបានអនុវត្តនៅក្នុងគម្រោង LASED II ចាប់ពីឆ្នាំ២០១៦ នឹងបន្តរហូតដល់ឆ្នាំ២០២១។ ទីតាំងដីសម្បទានសង្គមកិច្ចនៅឃុំដូងមានចម្ងាយប្រមាណ៨៦គីឡូម៉ែត្រពីទីរួមខេត្តកំពង់ធំ។ គិតមកត្រឹមខែមិថុនា ឆ្នាំ២០១៨នេះ ក្រុមការងារគម្រោង LASED II ប្រចាំខេត្តកំពង់ធំ បានសម្របសម្រួលសហការជាមួយអ្នកពាក់ព័ន្ធចុះសិក្សាផលប៉ះពាល់ និងដោះស្រាយជូនប្រជាពលរដ្ឋជាច្រើនលើក ដោយបានធ្វើការសម្របសម្រួលជាមួយប្រជាពលរដ្ឋដែលបានប្រើប្រាស់ដីនៅក្នុងតំបន់ដីស្នើសុំ និងកាត់ឆ្វៀលចេញពីផែនទី។ ជាចុងក្រោយ នៅសល់ដីទំហំ ១.៩៩២,៧៩ហិកតា និងបានប្រជុំគណៈកម្មាធិការគ្រប់គ្រងនិងបែងចែកដីរដ្ឋថ្នាក់ខេត្តអនុម័តរួចរាល់។
លើសពីនេះ ក្រុមការងារក៏បានសម្របសម្រួលប្រជុំផ្សព្វផ្សាយអំពីលក្ខណៈវិនិច្ឆ័យសម្បទានិកដល់ប្រជាពលរដ្ឋទាំង៨ភូមិ និងបានទទួលពាក្យស្នើសុំរួចរាល់។ មកដល់ពេលនេះ ក្រុមការងារបាននឹងកំពុងបូកសរុបដាក់ពិន្ទុ និងបន្ទាប់មកបន្តផ្សព្វផ្សាយលទ្ធផលជូនប្រជាពលរដ្ឋ និងរង់ចាំការតវ៉ា និងដោះស្រាយប្រកបដោយតម្លាភាព ដែលតាមគម្រោងមានសម្បទានិកសរុបចំនួន៧០០គ្រួសារនឹងត្រូវជ្រើសរើសក្នុងការផ្តល់ដីសម្បទានសង្គមកិច្ចនេះ។
ទន្ទឹមនឹងនេះដែរ ក្រុមការងារគម្រោងបាននឹងកំពុងចាប់ផ្តើមអនុវត្តការងាររៀបចំដីកសិកម្ម និងដីលំនៅឋានសរុបប្រមាណ ៥០០ហិកតា សម្រាប់ចែកជូនប្រជាពលរដ្ឋជាសម្បទានិកទាំង៧០០គ្រួសារដែលនឹងត្រូវជ្រើសរើស។
នៅក្នុងឆ្នាំ២០១៨នេះ គម្រោងនឹងចំណាយថវិកាសម្រាប់អភិវឌ្ឍនៅក្នុងទីតាំងដីសម្បទានសង្គមកិច្ចនៅក្នុងឃុំដូងចំនួន១.៦៩៦.១៦០ដុល្លារអាមេរិក ដោយគម្រោងនឹង៖
- គាំទ្រសម្ភារៈសាងសង់ជម្រកដែលរួមមានការផ្តល់ស័ង្កសីចំនួន៤០សន្លឹកក្នុងមួយគ្រួសារ
- គាំទ្រសម្ភារៈចាប់ផ្តើមជម្រកស្នាក់នៅដំបូងដូចជាអំពូលពន្លឺព្រះអាទិត្យ តង់ប្លាស្ទិក កន្ទេល ភួយ ពាងទឹក និងធុងចម្រោះទឹក។ល។
- គាំទ្រសម្ភារៈកសិកម្មចំនួន៨មុខរួមមានចប កាំបិត ពូថៅ ធុងទឹក និងអង្ករចំនួន២០០គីឡូក្រាម គ្រាប់ពូជចំនួន៦មុខ និងដើមឈើ៥ដើម
- សាងសង់អគារសហគមន៍ចំនួន១ខ្នង
- សាងសង់សាលាបឋមសិក្សចំនួន២ខ្នង មាន១០បន្ទប់
- សាងសង់អគារប៉ុស្តិ៍សុខភាពចំនួន១ខ្នង
- សាងសង់អគារសម្រាប់គ្រូបង្រៀន និងគិលានុប្បយិការចំនួន១ខ្នង មាន៤បន្ទាប់
- សាងសង់ផ្ទាំងប៉ាណូផ្សព្វផ្សាយព័ត៌មានចំនួន១
- ផ្តល់គ្រាប់ពូជដំណាំគម្រប (សណ្តែក) និងកូនស្វាយចន្ទីសរុបចំនួន៥០០ហិកតា
- គាំទ្រភ្ជួរដីជូនប្រជាពលរដ្ឋសរុបចំនួន៥០០ហិកតា
- សង់អណ្តូងស្នប់ចំនួន៣៥
- បោះបង្គោលព្រំដីលំនៅឋាន ដីកសិកម្ម និងដីព្រំប្រទល់ព្រៃឈើ បឹង ត្រពាំង សរុបចំនួន៥.៣៥០
- គាំទ្រសកម្មភាពបណ្តុះបណ្តាលដោយមន្ទីរកសិកម្ម រុក្ខាប្រមាញ់ និងនេសាទ រួមមានការបណ្តុះបណ្តាលបច្ចេកទេសកសិកម្ម ការធ្វើបទបង្ហាញកសិកម្ម។ល។
- គាំទ្រសកម្មភាពមន្ទីរពាក់ព័ន្ធផ្សេងៗទៀតក្នុងការចូលរួមអភិវឌ្ឍទីតាំងឃុំដូងរួមមានមន្ទីរអភិវឌ្ឍន៍ជនបទ មន្ទីរសុខាភិបាល មន្ទីរកិច្ចការនារី មន្ទីរធនធានទឹក និងអាជ្ញាធរស្រុក និងឃុំ។
ចាប់ពីឆ្នាំ២០១៩ ដល់ឆ្នាំ២០២១ គម្រោង LASED II គ្រោងនឹងចំណាយថវិកាសរុបចំនួន៣.៨៨៥.១៨៣ ដុល្លារអាមេរិក ដោយថវិកាទាំងនេះនឹងផ្តោតលើការគាំទ្រទាំងផ្នែកហេដ្ឋារចនាសម្ព័ន្ធ សេវាកម្មបណ្តុះបណ្តាល និងការគាំទ្រទុនបង្វិលសហគមន៍ ដែលក្នុងនោះរួមមាន គម្រោងសាងសង់ផ្លូវដីស សរុបប្រវែង២៩គីឡូម៉ែត្រ និងផ្លូវគ្រួសក្រហមសរុបចំនួន២២គីឡូម៉ែត្រ សរុបចំនួន ១.៣៤២.០០០ដុល្លារអាមេរិក សេវាកម្មគាំទ្រទុនបង្វិលសហគមន៍រយៈពេល៣ឆ្នាំ (២៨០ដុល្លារអាមេរិកក្នុងមួយគ្រួសារ) ថវិកាសរុបចំនួន ១៩៦.០០០ ដុល្លារអាមេរិក និងគាំទ្រសេវាកម្មបណ្តុះបណ្តាលដោយមន្ទីរវិស័យ និងថវិកាប្រតិបត្តិសរុបចំនួន ៦៥១.១៨៣ ដុល្លារអាមេរិក៕
