រាជធានីភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ បានអញ្ជើញជាអធិបតីដ៏ខ្ពង់ខ្ពស់ក្នុងកម្មវិធីបើកវេទិកា ស្តីពី «ភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល» កាលពីព្រឹកថ្ងៃទី២១ ខែមិថុនា ឆ្នាំ២០១៨ នៅទីស្តីការក្រសួងមហាផ្ទៃ។
សម្តេចក្រឡាហោម ស ខេង បានមានប្រសាសន៍ថា៖ វេទិកាថ្ងៃនេះនឹងធ្វើឱ្យរាជរដ្ឋាភិបាល ពិសេសរដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល មានការយល់គ្នាកាន់តែច្បាស់លាស់ថែមទៀត ដោយកំណត់បាននូវបញ្ហានានាដែលបានជួបប្រទះកន្លងមក និងស្វែងរកដំណោះស្រាយដើម្បីឈានទៅពង្រឹងកិច្ចសហប្រតិបត្តិការក្នុងភាពជាដៃគូយ៉ាងពិតប្រាកដ ហើយជាពិសេសសមាគម និងអង្គការមិនមែនរដ្ឋាភិបាលនឹងចូលរួមអនុវត្តច្បាប់ស្តីពីសមាគម និងអង្គការមិនមែនរដ្ឋាភិបាលប្រកបដោយស្មារតីទទួលខុសត្រូវខ្ពស់ ក្នុងគោលបំណងលើកកម្ពស់នីតិរដ្ឋ និងការអភិវឌ្ឍសេដ្ឋកិច្ចសង្គមកម្ពុជាឱ្យកាន់តែមានភាពរឹងមាំ និងមានការរីកចម្រើនបន្ថែមទៀត។
រាជរដ្ឋាភិបាលកម្ពុជានៅតែចាត់ទុកអង្គការសង្គមស៊ីវិល គឺជាដៃគូមិនអាចខ្វះបានក្នុងការរួមចំណែកអភិវឌ្ឍជាតិ និងលើកកម្ពស់លទ្ធិប្រជាធិបតេយ្យនៅកម្ពុជា។ ជាក់ស្តែងកំណែទម្រង់វិមជ្ឈការ និងវិសហមជ្ឈការ ដែលក្នុងនោះគណៈកម្មាធិការសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ កាលពីឆ្នាំ២០១៣ បានដាក់ចេញនូវផែនការយុទ្ធសាស្ត្រស្តីពីការងារគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដើម្បីពង្រឹងភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល ក្នុងការធានាបាននូវគណនេយ្យភាពរបស់រដ្ឋបាលថ្នាក់ក្រោមជាតិ ក្នុងការឆ្លើយតបទៅនឹងតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន។ ការងារគណនេយ្យភាពសង្គម ត្រូវអនុវត្តរួមគ្នាដោយក្រសួង ស្ថាបន័ និងរដ្ឋបាលថ្នាក់ក្រោមជាតិ ដែលជាផ្នែកផ្គត់ផ្គង់ (Supply Side) ដោយមានការចូលរួមពីអង្គការសង្គមស៊ីវិលជាផ្នែកតម្រូវការ (Demand Side) ក្នុងស្មារតីសហការគ្នា និងជួយផ្តល់យោបល់ឱ្យគ្នាប្រកបដោយលក្ខណៈស្ថាបនា។ ការអនុវត្តការងារគណនេយ្យភាពសង្គមនឹងធានាបានថា ព័ត៌មាននានាពាក់ព័ន្ធនឹងកិច្ចការរដ្ឋបាលឃុំ សង្កាត់ ការបំពេញការងាររបស់សាលាបឋមសិក្សា និងមណ្ឌលសុខភាព សិទ្ធិ ស្តង់ដារ និងបញ្ហាហិរញ្ញវត្ថុត្រូវបានផ្តល់ជូនប្រជាពលរដ្ឋក្នុងលក្ខណៈសាមញ្ញ ងាយយល់ និងបង្កលក្ខណៈឱ្យប្រជាពលរដ្ឋទទួលបានព័ត៌មានទាំងនោះដោយងាយស្រួល និងលើកទឹកចិត្តឱ្យប្រជាពលរដ្ឋធ្វើការត្រួតពិនិត្យ និងវាយតម្លៃលើការបំពេញការងាររបស់ផ្នែកផ្គត់ផ្គង់ ហើយប្រជាពលរដ្ឋអាចធ្វើការពិភាក្សានូវចំណុចខ្វះខាតនានាពាក់ព័ន្ធនឹងការផ្តល់សេវា និងធ្វើការដោះស្រាយរួមគ្នា។ រហូតមកដល់ពេលនេះ ការអនុវត្តការងារគណនេយ្យភាពសង្គមត្រូវបានអនុវត្តក្នុងខេត្តចំនួន ១៨ គ្របដណ្តប់លើស្រុកចំនួន ៩៨ និងឃុំចំនួន ៨២៧។
នៅក្នុងឱកាសដែលប្រទេសកម្ពុជាយើងកំពុងដំណើរការរៀបចំការបោះឆ្នោតជ្រើសតាំងតំណាងរាស្រ្តនីតិកាលទី៦ ខាងមុខនេះ រាជរដ្ឋាភិបាលកម្ពុជាបានប្តេជ្ញាចិត្តយ៉ាងមុតមាំក្នុងធានាឱ្យការបោះឆ្នោតនេះប្រព្រឹត្តទៅដោយ សេរី ត្រឹមត្រូវ យុត្តិធម៌ និងមានសុវត្ថិភាព។ ទន្ទឹមនេះ សម្តេចក្រឡាហោម ក៏បានអំពាវនាវដល់អាជ្ញាធរមូលដ្ឋានដែលពាក់ព័ន្ធ ត្រូវតែខិតខំសម្របសម្រួល និងបង្កលក្ខណៈងាយស្រួលដល់គណបក្សនយោបាយ ដែលបានចុះបញ្ជីត្រឹមត្រូវនៅក្រសួងមហាផ្ទៃក្នុងការធ្វើសកម្មភាពដោយស្មើភាព ត្រឹមត្រូវ និងមិនលំអៀង ដើម្បីចូលរួមការបោះឆ្នោតជាតិនាពេលខាងមុខនេះ។
មួយវិញទៀត សម្តេចក្រឡាហោម បានអំពាវនាវដល់សមាគម និងអង្គការមិនមែនរដ្ឋាភិបាលទាំងអស់ត្រូវធ្វើសកម្មភាពប្រកបដោយភាពអព្យាក្រឹត្យ ស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល និងច្បាប់ ព្រមទាំងលិខិតបទដ្ឋានគតិយុត្តនានាជាធរមាន។
សូមបញ្ជាក់ថា បន្ទាប់ពីច្បាប់ស្តីពីសមាគម និងអង្គការមិនមែនរដ្ឋាភិបាលត្រូវបានប្រកាសឱ្យប្រើកាលពីចុងឆ្នាំ២០១៥ មានសមាគម និងអង្គការមិនមែនរដ្ឋាភិបាលចំនួន ៦៨៣ បន្ថែមទៀតបានចុះបញ្ជីនៅក្រសួងមហាផ្ទៃ។ រហូតមកដល់បច្ចុប្បន្ននេះ មានសមាគម និងអង្គការមិនមែនរដ្ឋាភិបាលដែលបានចុះបញ្ជីនៅក្រសួងមហាផ្ទៃ សរុបចំនួន ៥៣២៨ ដែលក្នុងនោះសមាគម មានចំនួន ២១៧៩ និងអង្គការមិនមែនរដ្ឋាភិបាល មានចំនួន ៣១៤៩។ តាមរយៈតួលេខនេះ បានបញ្ជាក់ឱ្យឃើញថា សិទ្ធិសេរីភាពក្នុងការបង្កើតសមាគម និងអង្គការមិនមែនរដ្ឋាភិបាល មិនមាននិន្នាការថយចុះដូចការលើកឡើងរបស់មជ្ឈដ្ឋានជាតិ និងអន្តរជាតិមួយចំនួននោះឡើយ៕