រាជធានីភ្នំពេញ៖ នៅថ្ងៃសុក្រ ១០កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២២ ខែមិថុនា ឆ្នាំ២០១៨ សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាម បែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញជា អធិបតីភាពដ៏ខ្ពង់ខ្ពស់ដឹកនាំកិច្ចប្រជុំលើកទី១៦ របស់ គ.ជ.អ.ប ដោយមានការអញ្ជើញចូលរួមពីសមាជិក គ.ជ.អ.ប តំណាងក្រសួង ស្ថាប័នថ្នាក់ជាតិពាក់ព័ន្ធមួយចំនួន និងរដ្ឋបាលថ្នាក់ក្រោមជាតិ ចាប់ពីម៉ោង ៨:០០ ព្រឹក ដល់ម៉ោង ១១:៤៥ ថ្ងៃត្រង់ នៅសាលប្រជុំក្រសួងមហាផ្ទៃ (អគារ S)។
ថ្លែងសុន្ទរកថាបើកកិច្ចប្រជុំលើកទី១៦ របស់ គ.ជ.អ.ប សម្តេចក្រឡាហោម ស ខេង បានមានប្រសាសន៍ថា ការកោះប្រជុំលើកទី១៦ មានគោលបំណងត្រួតពិនិត្យលើស្ថានភាពនៃការងារកំណែទម្រង់វិមជ្ឈការ និងវិសហមជ្ឈការក្នុងឆមាសទី១នៃឆ្នាំ២០១៨ តាមរយៈការរៀបចំ និងការអនុវត្តផែនកាសកម្មភាព និងថវិកាឆ្នាំ ២០១៨ របស់ គ.ជ.អ.ប. ដែល គ.ជ.អ.ប បានពិនិត្យពិភាក្សាក្នុងកិច្ចប្រជុំលើកទី១៥ កាលថ្ងៃទី១៨ ខែធ្នូ ឆ្នាំ២០១៧កន្លងទៅ។ ក្នុងនាម គ.ជ.អ.ប និងសម្តេចផ្ទាល់ សម្តេចក្រឡាហោមបានថ្លែងអំណរគុណ និងស្វាគមន៍យ៉ាងកក់ក្ដៅចំពោះឯកឧត្ដម លោកជំទាវសមាជិក សមាជិកា គ.ជ.អ.ប ឯកឧត្ដម លោកជំទាវ អស់លោក លោកស្រី ដែលបានអញ្ជើញចូលរួមកិច្ចប្រជុំលើកទី១៦របស់ គ.ជ.អ.ប។ ទន្ទឹមនឹងនេះ សម្តេចក្រឡាហោមបានរម្លឹកអង្គប្រជុំថា ផែនការសកម្មភាព និងថវិកាឆ្នាំ២០១៨ របស់ គ.ជ.អ.ប. គឺជាផែនការអនុវត្តឆ្នាំទី១នៃផែនការអនុវត្តរយៈពេល៣ឆ្នាំដំណាក់កាលចុងក្រោយ នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ហើយ ដើម្បីធានាដល់ការ ពង្រឹងភាពជាម្ចាស់របស់រាជរដ្ឋាភិបាលឱ្យបានពេញលេញ និងមាននិរន្តរភាពក្នុងការដឹកនាំ គ្រប់គ្រង សម្របសម្រួលការងារកំណែទម្រង់ដ៏មានសារៈសំខាន់នេះ គ.ជ.អ.ប បានឯកភាពគ្នាថា ចាប់ពីឆ្នាំ២០១៨នេះតទៅ ត្រូវដាក់បញ្ចូលផែនការសកម្មភាព និងថវិកាប្រចាំឆ្នាំរបស់ គ.ជ.អ.ប ទៅក្នុងគម្រោងថវិកាប្រចាំឆ្នាំរបស់ក្រសួង ស្ថាប័ន និងរដ្ឋបាលថ្នាក់ក្រោមជាតិសាមីនីមួយៗ។
ក្នុងន័យនេះ សម្តេចក្រឡាហោមបានមានប្រសាសន៍បន្តថា ក្រសួង ស្ថាប័ន និងរដ្ឋបាលថ្នាក់ក្រោមជាតិនីមួយៗត្រូវប្រើប្រាស់ថវិការបស់ខ្លួនសម្រាប់គាំទ្រដល់កិច្ចប្រតិបត្តិការ និងការអនុវត្តសកម្មភាពស្នូលនានានៃកំណែទម្រង់វិមជ្ឈការ និងវិសហមជ្ឈការ ជំនួសឱ្យការប្រើប្រាស់ថវិកាដែលធ្លាប់បានទទួលពី “ថវិកាកញ្ចប់រួម” របស់គ.ជ.អ.ប.ដែលជាហិរញ្ញប្បទានគាំទ្រពីដៃគូអភិវឌ្ឍន៍ បន្ទាប់ពីដៃគូអភិវឌ្ឍន៍មួយចំនួនបានបញ្ចប់ការគាំទ្ររបស់ខ្លួននៅចុងឆ្នាំ២០១៧។
ជាការកត់សម្គាល់ ក្នុងឆ្នាំ២០១៨នេះ ក៏ជាឆ្នាំចុងក្រោយរបស់រាជរដ្ឋាភិបាលនីតិកាលទី៥នៃរដ្ឋសភា ដែលជាឆ្នាំមានការមមារញឹកយ៉ាងខ្លាំង ដើម្បីត្រៀមខ្លួនចូលរួមការបោះឆ្នោតជ្រើសរើសតំណាងរាស្រ្ត សម្រាប់នីតិកាលទី៦នៃរដ្ឋសភា។ ទោះយ៉ាងណា សម្តេចក្រឡាហោមបានមានប្រសាសន៍បញ្ជាក់ថា៖ “ការដឹកនាំ ការសម្របសម្រួល ការតាមដាន ត្រួតពិនិត្យលើការងារកំណែទម្រង់វិមជ្ឈការ និងវិសហ មជ្ឈការ គឺជាតួនាទីស្នូលរបស់ គ.ជ.អ.ប. ដែលយើងត្រូវប្រកាន់ខ្ជាប់ និងត្រូវអនុវត្តឱ្យមានប្រសិទ្ធភាព”។
សូមជម្រាបជូនថា កិច្ចប្រជុំនេះមានគោលបំណងពិនិត្យ ពិភាក្សា និងអនុម័តលើឯកសារសំខាន់ៗដែលមានចែងក្នុងរបៀបវារៈដូចជា៖ ១). ការពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំលើកទី១៥ របស់ គ.ជ.អ.ប ២). ការពិនិត្យ ពិភាក្សាលើស្ថានភាពនៃការអនុវត្តផែនការសកម្មភាព និងថវិកាឆ្នាំ ២០១៨ របស់ គ.ជ.អ.ប សម្រាប់ឆមាសទីមួយ ៣). ការពិនិត្យពិភាក្សា និងអនុម័តសេចក្តីណែនាំស្តីពី ការរៀបចំយន្តការរបស់រដ្ឋបាលថ្នាក់ជាតិនីមួយៗសម្រាប់ដឹកនាំសម្របសម្រួលនិងគាំទ្រការងារកំណែទម្រង់វិមជ្ឈការ និងវិសហមជ្ឈការ ៤). ការពិនិត្យពិភាក្សាលើស្ថានភាពនៃការផ្ទេរមុខងារ និងការអនុវត្តមុខងារដែលបានផ្ទេរទៅឱ្យរដ្ឋបាលថ្នាក់ក្រោមជាតិ ៥). ការពិនិត្យពិភាក្សាអំពីវឌ្ឍនភាព និងដំណោះស្រាយបញ្ហាប្រឈមនៃការរៀបចំយន្តការច្រកចេញចូលតែមួយនៅរដ្ឋបាល ថ្នាក់ក្រោមជាតិ ៦). ការពិនិត្យពិភាក្សាលើលទ្ធផលនៃការសិក្សាអំពីលទ្ធភាពសម្រាប់ការដាក់ឱ្យដំណើរការនូវសាលាជាតិរដ្ឋបាលមូលដ្ឋាន និង៧). បញ្ហាផ្សេងៗ៕