ក្នុងក្របខ័ណ្ឌនៃការអនុវត្តគម្រោងបន្ស៊ាំនឹងការប្រែប្រួលអាកាសធាតុនៅថ្នាក់មូលដ្ឋាន (LoCAL) សិក្ខាសាលាបណ្តុះបណ្តាលនេះ រៀបចំ​ឡើង​ដោយ​កិច្ច​សហការ​រវាង​លេខាធិការ​ដ្ឋាន ​នៃ​គណៈ​កម្មាធិការ​ជាតិ​សម្រាប់​ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) និងក្រសួងបរិស្ថាន គាំទ្រ​ដោយ​មូលនិធិ​អភិវឌ្ឍន៍​សហប្រជាជាតិ​ (UNCDF) និងមានគោលបំណង ដើម្បី ១). បង្កើនការយល់ដឹងអំពីការប្រែប្រួលអាកាសធាតុ និង​កៀរគរ​ថវិកា​តាមរយៈ​ការដាក់​បញ្ចូល​ផែនការ​សកម្មភាព​ទៅក្នុង​ផែនការ​អភិវឌ្ឍឃុំ​ ដើម្បី​ធានា​ឱ្យ​បាន​នូវចីរភាព​ហិរញ្ញវត្ថុ​ឆ្លើយតប​នឹង​ការ​ប្រែប្រួលអាកាសធាតុ ២). បញ្ជ្រាបចំណេះដឹងអំពីគោលដៅអាទិភាព និង​ផែនការ​យុទ្ធសាស្រ្ត​របស់​ផែនការ​ជាតិ​ក្នុងការ​រួមចំណែក​ឆ្លើយតប​នឹង​ការ​ប្រែប្រួល​អាកាស​ធាតុ​ដំណាក់​កាលទី៣​ (NDC3.0) ទៅថ្នាក់ក្រោមជាតិ និង ៣). កិច្ចពិភាក្សាដើម្បីបន្ស៉ី NDC3.0 ទៅក្នុងផែនការថវិការបស់រដ្ឋបាលថ្នាក់ក្រោមជាតិ សំដៅរួមចំណែកបង្កើនភាពធន់ និងកាត់បន្ថយភាពងាយរងគ្រោះពីអាកាសធាតុដល់សហគមន៍មូលដ្ឋាន។

លោក ជា វ៉ាន់ដា បានគូសបញ្ជាក់អំពីសារៈសំខាន់នៃសិក្ខាសាលាបណ្ដុះបណ្ដាល គឺ​ជាឱកាស​ដ៏​ល្អ​ដែល​អាច​ឱ្យ​រដ្ឋបាល​ថ្នាក់ក្រោម​ជាតិ​ ក្រសួង ស្ថាប័នពាក់ព័ន្ធ បានជ្រាបបន្ថែមអំពីការរៀបចំផែនការ និង​ថវិកា​ដោយ​បញ្ជ្រាប​ផែនការ​ជាតិ​រួមចំណែក​ឆ្លើយតប​ នឹង​ការប្រែប្រួល​អាកាសធាតុ​ (NDC3.0) សំដៅដល់ការលើកកម្ពស់សតម្ថភាព លទ្ធភាព និងការទទួលខុសត្រូវរបស់រដ្ឋបាលថ្នាក់ក្រោមជាតិ ដើម្បី​ចូលរួម​ចំណែក​ក្នុងការ​ដោះស្រាយ​បញ្ហា​ប្រឈមនានា​ និង​ការឆ្លើយតប​ទៅ​នឹង​ហានិភ័យ​ នៃការប្រែប្រួលអាកាសធាតុនៅមូលដ្ឋាន។

សិក្ខាសាលាបណ្ដុះបណ្ដាល ក៏បានផ្សព្វផ្សាយអំពីគម្រោងរដ្ឋបាលមូលដ្ឋាន និងការប្រែប្រួលអាកាសធាតុ (LGCC3) អនុវត្តដោយលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដែលត្រូវបានអនុម័តលើការផ្ដល់ហិរញ្ញប្បទានពីមូលនិធិអាកាសធាតុបៃតង (GCF) នៅថ្ងៃទី២៩ ខែតុលា ឆ្នាំ២០២៥ នៅក្នុងកិច្ចប្រជុំលើកទី៤៣ របស់ក្រុមប្រឹក្សាមូលនិធិអាកាសធាតុបៃតង (GCF)។ គម្រោង LGCC3 នេះមានគោលបំណង ដើម្បីពង្រឹងភាពធន់ទៅ នឹងអាកាសធាតុរបស់សហគមន៍ក្នុងស្រុកចំនួន១៥ នៅក្នុងប្រទេសកម្ពុជា ដែលនឹងសម្រេចបានដោយការបង្កើនសមត្ថភាពរបស់រដ្ឋាភិបាលមូលដ្ឋាន និង​សហគមន៍​ក្នុងការ​ទទួល​បាន​ និងប្រើប្រាស់មូលនិធិប្រកបដោយប្រសិទ្ធភាពសម្រាប់ការវិនិយោគ និងការបន្ស៊ាំសមស្រប ដែលគាំទ្រដល់គោលដៅអាកាសធាតុ គោលបំណងតាមវិស័យ និងគោលដៅអភិវឌ្ឍន៍ប្រកបដោយចីរភាព (SDG) របស់អង្គការសហប្រជាជាតិ៕