កិច្ចប្រជុំពិភាក្សា និងពិគ្រោះយោបល់ខាងលើ បានរៀបចំឡើងក្នុងគោលបំណង ដើម្បីពិភាក្សាប្រមូលធាតុចូលបំពេញបន្ថែម និងកែសម្រួលលើចំនុចខ្វះខាត ដើម្បីធានាថាឯកសារសេចក្តីព្រាងការពិពណ៌នាមុខតំណែងគ្រប់គ្រង និងមុខតំណែងវិជ្ជាជីវៈរបស់រដ្ឋបាលរាជធានីនឹងមានអត្ថន័យពេញលេញ និងមានលក្ខណៈគ្របដណ្តប់បានគ្រប់ជ្រុងជ្រោយ។

សូមបញ្ជាក់ថា កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យ ដំណាក់កាលទី២ (២០២១-២០៣០) បាននឹងកំពុងរៀបចំ និងដាក់ឱ្យអនុវត្តនូវប្រព័ន្ធគ្រប់គ្រងផ្អែកលើសមិទ្ធកម្មនៅរដ្ឋបាលថ្នាក់ក្រោមជាតិ តាមរយៈការដាក់ចេញសេចក្ដីណែនាំដោយផ្ដោតជាសំខាន់ទៅលើការរៀបចំការពិពណ៌នាមុខតំណែង លក្ខខណ្ឌការងារ ការគ្រប់គ្រងវត្តមានរបស់បុគ្គលិក ការវាយតម្លៃលើលទ្ធផលនៃការបំពេញការងារ ក៏ដូចជាការលើកទឹកចិត្តដល់បុគ្គលិកនៃរដ្ឋបាលថ្នាក់ក្រោមជាតិ។ លទ្ធផលនៃការរៀបចំការពិពណ៌នាមុខតំណែង និងលទ្ធផលនៃវាយតម្លៃផ្អែកលើសមិទ្ធកម្ម គឺជាមូលដ្ឋានសម្រាប់ការតែងតាំង ការដំឡើងថ្នាក់ ឋានន្តរស័ក្តិ ការអភិវឌ្ឍសមត្ថភាព ការលើកទឹកចិត្ត ក៏ដូចជាការដាក់ទណ្ឌកម្មខាងវិន័យផងដែរ។ ការរៀបចំការពិពណ៌នាមុខតំណែងរបស់រដ្ឋបាលរាជធានី ខេត្ត គឺដើម្បី (១).ពិនិត្យមើលរចនាសម្ព័ន្ធ មុខងារ តួនាទី ភារកិច្ច និងការទទួលខុសត្រូវរបស់អង្គភាពនីមួយៗនៃរដ្ឋបាលរាជធានី ខេត្ត (២).កំណត់អំពីតម្រូវការមុខតំណែងគ្រប់គ្រង និងមុខតំណែងវិជ្ជាជីវៈនៅតាមអង្គភាពចំណុះនៃរដ្ឋបាលរាជធានី ខេត្ត និង (៣).កំណត់អំពីការពិពណ៌នាមុខតំណែងរបស់បុគ្គលិកនៅរដ្ឋបាលរាជធានី ខេត្តផងដែរ។