សិក្ខាសាលាស្តីពី ការអនុវត្តវិធានការឆ្លើយតបយេនឌ័រតាមវិស័យ ក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣

០១ តុលា ២០២៥

សណ្ឋាគារហ៊្វែរហៀលបាយ ម៉ារៀត រាជធានីភ្នំពេញ៖ នៅព្រឹកថ្ងៃពុធ ៩កើត ខែអស្សុជ ឆ្នាំម្សាញ់ ពុទ្ធសករាជ ២៥៦៩ ត្រូវនឹងថ្ងៃទី១ ខែតុលា ឆ្នាំ២០២៥ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការ ក្រសួងមហាផ្ទៃ និងប្រធានលេខាធិការដ្ឋាន គ.ជ.អ.ប.បានអញ្ជើញចូលរួម សិក្ខាសាលាស្តីពីការអនុវត្តវវិធានការឆ្លើយតបយេនឌ័រតាមវិស័យក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជាដំណាក់កាលទី៣ (NDC 3.0) “The implementation of sector Gender Measures in Cambodia’s NDC 3.0 “ ក្រោមអធិបតីភាពដ៏ខ្ពង់ខ្ពស់របស់លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារីនិងឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន។

សិក្ខាសាលានេះ ត្រូវបានរៀបចំទ្បើងដោយមានកិច្ចសហការរវាងក្រសួងកិច្ចការនារីជាមួយក្រសួងបរិស្ថាន និងធនាគារអភិវឌ្ឍន៍អាស៊ី (ADB) និងមានការអញ្ជើញចូលរួមពី លោកជំទាវ ឯកឧត្តម លោក លោកស្រី ជាថ្នាក់ដឹកនាំ និងសមាជិកក្រុមការងារបញ្ជ្រាបយេនឌ័រ(GMAGs)និងក្រុមការងារបច្ចេកទេសប្រែប្រួលអាកាសធាតុ(CCTWGs) របស់ក្រសួងស្ថាប័នពាក់ព័ន្ធក្នុងការរៀបចំនិងអនុវត្ត NDC 3.0 ដែលមានសមាសភាពសរុបចំនួន ១០៥រូប (ស្រ្តីមានចំនួន៧៩រូប និងបុរសមានចំនួន២៦រូប)។

សិក្ខាសាលានេះបានរៀបចំទ្បើងក្នុងគោលបំណងពីរធំៗគឺ

(១). លើកកម្ពស់ការយល់ដឹងរបស់ស្ថាប័ន និងការគាំទ្រលើការបន្ស៊ីរាល់ទិដ្ឋភាពយេនឌ័រនៃការប្រែប្រួលអាកាសធាតុ និងការដាក់បញ្ចូលវិធានការឆ្លើយតបនឹងយេនឌ័រនិងសូចនាករសមិទ្ធកម្មគន្លឹះៗ(KPIs)ព្រមទាំងលក្ខខណ្ឌតម្រូវពាក់ព័ន្ធនឹងការត្រួតពិនិត្យការផ្តល់របាយការណ៍និងការផ្ទៀងផ្ទាត់ (MRV) ទៅក្នុង NDC 3.0។

(២). ពង្រឹងកិច្ចសហការជាយុទ្ធសាស្រ្ត និងការអភិវឌ្ឍសមត្ថភាព ក្នុងចំណោម GMAGs និងCCTWGs ដើម្បីបញ្ចូលអភិក្រមដែលឆ្លើយតបយេនឌ័រទៅក្នុងផែនការសកម្មភាពបញ្ជ្រាបយេនឌ័រ (GMAGs)តាមវិស័យ និងតាមក្រសួង ស្ថាប័ន រួមទាំងការរៀបចំធនធាន និងយន្តការក្នុងការត្រួតពិនិត្យ តាមដាន និងវាយតម្លៃ (M&E)៕

Facebook Telegram 𝕏Twitter LinkedIn