នេះគឺជាថ្ងៃទី៣ នៃដំណើរបេសកម្មសិក្សាស្វែងយល់នៅក្នុងរដ្ឋខេត្ត ក្រុង ស្រុក ឃុំ សង្កាត់ ដែលបានឆ្លុះបញ្ចាំងថាការងារគណនេយ្យភាពសង្គម ពិតជាមាន សារៈសំខាន់ណាស់ ដើម្បីធានាដល់ការលើកកម្ពស់ការប្រាស្រ័យទាក់ទងគ្នារវាង អាជ្ញាធរមូលដ្ឋាន ជាមួយនឹងប្រជាពលរដ្ឋ ដើម្បីផ្តល់ឱកាសឱ្យប្រជាពលរដ្ឋសម្តែងនូវមតិយោបល់ និងចូលរួមតាមដាន ការបំពេញការងាររបស់មន្រ្តី និងអង្គភាពផ្តល់សេវា សំដៅលើកកម្ពស់ ការផ្តល់សេវាសាធារណៈ ប្រកបដោយគុណភាព ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ដែលជាធាតុដ៏សំខាន់ក្នុងការពង្រឹងអភិបាលកិច្ច និងការអភិវឌ្ឍនៅមូលដ្ឋាន។

ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. និងជានាយកគម្រោងគណនេយ្យភាពសង្គម បានបង្ហាញនូវការកត់សំគាល់សំខាន់ៗ លើលទ្ធផលក្នុងដំណើរបេសកកម្មរយៈពេល៣ថ្ងៃនេះ រួមមានដូចជា ១,ការបន្ស៊ីក្របខណ្ឌពេលវេលានៃការបង្កើតផែនការសកម្មភាពរួមស្តីពីការងារគណនេយ្យភាពសង្គម(JAAP) ជាមួយនឹងការរៀបចំផែនការវិនិយោគឃុំ(CIP) អាចប្រព្រឹត្ត ទៅបានតាមបច្ចេកទេស នៃការអនុវត្តសាកល្បងនិរន្តរភាពគណនេយ្យភាពសង្គមថ្នាក់ឃុំ សង្កាត់ របស់រដ្ឋបាលក្រុង ស្រុក ២,ការៀបចំកិច្ចប្រជុំវាយតម្លៃខ្លួនឯង អាចរៀបចំ និងដឹកនាំដោយអង្គភាពផ្តល់សេវានីមួយៗ ដោយមានការគាំទ្របច្ចេកទេសខ្លះៗពីអ្នកសម្របសម្រួលគណនេយ្យភាពសហគមន៍ ៣, ការចូលរួមគាំទ្រដល់ការអនុវត្តការងារគណនេយ្យភាពសង្គម របស់រដ្ឋបាលខេត្ត រដ្ឋបាល ក្រុង ស្រុក និងអង្គភាពផ្តល់សេវាមានភាពល្អប្រសើរ តាមរយៈការពង្រឹងការផ្សព្វផ្សាយព័ត៌មាន ការបង្កើនការចូលរួមរបស់ប្រជាពលរដ្ឋ និងការអនុវត្ត JAAP ដើម្បីឆ្លើយតបទៅនឹងតម្រូវការរបស់សហគមន៍មូលដ្ឋាន និងលើកកម្ពស់ការផ្តល់សេវាសាធារណៈ ៤, ការប្តេជ្ញាចិត្តខ្ពស់របស់រដ្ឋបាលខេត្ត រដ្ឋបាលក្រុង ស្រុក រដ្ឋបាលឃុំ សង្កាត់ និងអង្គភាព ផ្តល់សេវាក្នុងការបែងចែក និងប្រើប្រាស់ថវិកា មូលនិធិរបស់ខ្លួនក្នុងការគាំទ្រការងារគណនេយ្យភាពសង្គម នាពេលកន្លងមក និងពេលអនាគត ៥, ការបន្តគាំទ្រដល់អ្នកសម្របសម្រួលសហគមន៍ (CAF) ក្នុងការសហការ សម្របសម្រួល និងកៀរគរការចូលរួមរបស់ប្រជាពលរដ្ឋ និងអ្នកផ្តល់សេវាក្នុងដំណើរការគណនេយ្យភាពសង្គម។

បេសកកម្មនេះ មានការអញ្ជើញចូលរួមពីតំណាងលេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសុខាភិបាល ធនាគារពិភពលោក អង្គការទស្សនៈពិភពលោកអន្តរជាតិ រដ្ឋបាលលខេត្ត មន្ទីរពាក់ព័ន្ធ រដ្ឋបាលស្រុក និងអ្នកពាក់ព័ន្ធ សរុបចំនួន១២០រូប ស្រី១២រូប៕