ដំណើរទស្សនកិច្ចសិក្សាស្វែងយល់នេះ រៀបចំឡើងក្នុងគោលបំណង ដើម្បី៖

១.ចែករំលែកមេរៀន បទពិសោធនៃការគ្រប់គ្រងសំរាម សំណល់រឹង និងការគ្រប់គ្រងទឹកដែលធន់នឹងការប្រែប្រួលអាកាសធាតុរបស់រដ្ឋបាលក្រុង ស្រុកជាដៃគូអនុវត្តកម្មវិធីISD និងការចែករំលែកបទពិសោធនៃការគ្រប់គ្រងសំរាម សំណល់រឹង និងការគ្រប់គ្រងទឹកដែលធន់នឹងការប្រែប្រួលអាកាសធាតុរបស់រដ្ឋបាលក្រុងដែលមិនមែនជាដៃគូអនុវត្តក្នុងកម្មវិធី

២.សិក្សាស្វែងយល់អំពីលទ្ធផលដែលជាការបង្កើតថ្មី និងបញ្ហាប្រឈមពាក់ព័ន្ធនានារបស់រដ្ឋបាលក្រុង ស្រុកដែលបានអនុវត្តគំនិតផ្តួចផ្តើមពាក់ព័ន្ធការគ្រប់គ្រងសំរាម សំណល់រឹង

៣.ជំរុញការលើកទឹកចិត្តតាមរយៈការផ្តល់មតិកែលម្អ រួមទាំងការកំណត់សកម្មភាពអាទិភាព និងកិច្ចអន្តរាគមន៍នានា ដើម្បីគាំទ្រដល់រដ្ឋបាលក្រុង ស្រុក ក្នុងការគ្រប់គ្រងសំរាម សំណល់រឹង និងការគ្រប់គ្រងទឹកដែលធន់នឹងការប្រែប្រួលអាកាសធាតុនៅថ្នាក់មូលដ្ឋាន និង

៤.ជាមូលដ្ឋានក្នុងការរៀបចំផែនការ ការពង្រីកការអនុវត្តការគ្រប់គ្រងសំរាម សំណល់រឹង និងការគ្រប់គ្រងទឹកដែលធន់នឹងការប្រែប្រួលអាកាសធាតុនៅរដ្ឋបាលថ្នាក់ក្រោមជាតិស្របទៅនឹងស្ថានភាពភូមិសាស្ត្រតំបន់នៅក្នុងក្របខណ្ឌទូទាំងប្រទេស។

ក្នុងដំណើរទស្សនកិច្ចសិក្សារយៈពេលចំនួន៥ថ្ងៃកន្លងមកនេះ ក្រុមប្រតិភូអន្តរក្រសួង បានរៀបចំសកម្មភាពជាច្រើន តាមរយៈការរៀបចំសិក្ខាសាលាឆ្លុះបញ្ចាំងការចែករំលែកមេរៀន និងបទពិសោធនៃការគ្រប់គ្រងសំរាម សំណល់រឹង ការជជែកពិភាក្សា និងលើកអំពីបញ្ហាប្រឈម និងដំណោះស្រាយដែលក្រុង ស្រុកបានជួបប្រទះ ព្រមទាំងការចុះទស្សនកិច្ចជួបពិភាក្សាផ្ទាល់ជាមួយអាជ្ញាធរមូលដ្ឋាន នៅតាមរដ្ឋបាលក្រុង ស្រុក រដ្ឋបាលឃុំ និងសហគមន៍ដែលបានអនុវត្តគម្រោងកម្មវិធីISD និងការចុះទស្សនកិច្ចនៅគ្រឹះស្ថានសិក្សា សាលារៀន និងអង្គការពាក់ព័ទ្ធដែលបានអនុវត្តសកម្មភាពការងារពាក់ព័ន្ធនឹងការគ្រប់គ្រងសំរាម សំណល់រឹង ការរៀបចំផែនការគ្រប់គ្រងទឹកដោយគិតពីបម្រែបម្រួលអាកាសធាតុ។

កម្មវិធីធ្វើឱ្យប្រសើឡើងនៃការផ្ដល់សេវាជូនប្រជាពលរដ្ឋ (The Improved Service Delivery to Citizens in Cambodia) ហៅកាត់ថាកម្មវិធីISD ជាកម្មវិធីដែលទទួលបានមូលនិធិគាំទ្រពីរដ្ឋាភិបាលអាល្លឺម៉ង់ និងរដ្ឋាភិបាលស្វីសតាមរយៈទីភ្នាក់ងារស្វីសសម្រាប់ការអភិវឌ្ឍនិងសហប្រតិបត្តិការ និងរដ្ឋាភិបាលលុចសំបួតាមរយៈទីភ្នាក់ងារលុចសំបួសម្រាប់កិច្ចសហប្រតិបត្តិការអភិវឌ្ឍន៍(LuxAid)។ កម្មវិធីISD បានសហការជាមួយលេខាធិការដ្ឋានគ.ជ.អ.ប.ក្នុងកិច្ចការមួយចំនួន រួមមាន៖ ១)ការអនុវត្តកម្មវិធីជាតិ ស្តីពីការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ឆ្នាំ២០២១-២០៣០ (NP-2) ពិសេសក្នុងវិស័យសុខាភិបាល និងការលើកកម្ពស់ស្ត្រីដែលបម្រើការងារនៅរដ្ឋបាលថ្នាក់ក្រោមជាតិ ២)ការផ្តល់សេវារដ្ឋបាលនៅការិយាល័យច្រកចេញចូលតែមួយតាមបែបឌីជីថល និងការផ្តល់សេវាចល័ត ៣)ការរៀបចំ និងការអនុវត្តផែនការគ្រប់គ្រងទឹក និងផែនការគ្រប់គ្រងសំរាម សំណល់រឹង ដែលធននឹងការប្រែប្រួលអាកាសធាតុ ៤)ការពង្រឹងសិទ្ធិអំណាចរបស់ប្រជាពលរដ្ឋក្នុងដំណើរការធ្វើសេចក្តីសម្រេចចិត្ត និងការពង្រឹងយន្តការបណ្តឹងតវ៉ានៅថ្នាក់ក្រុង ស្រុក និង៥)ការពង្រឹងកិច្ចការហិរញ្ញវត្ថុរបស់រដ្ឋបាលក្រុង ស្រុក ពាក់ព័ន្ធនឹងថវិកាសម្រាប់ផ្ដល់សេវា និងការគ្រប់គ្រងហិរញ្ញវត្ថុ។

ក្នុងកិច្ចការជាអាទិភាពទី៣នៃកម្មវិធីISD បានផ្ដល់ការគាំទ្របច្ចេកទេសដល់រដ្ឋបាលក្រុង ស្រុក ចំនួន៦ រួមមានៈ ក្រុងបាត់ដំបង ស្រុកមោងឬស្សី ស្រុកបវេលនៃខេត្តបាត់ដំបង ក្រុងសៀមរាប ស្រុកសូទ្រនិគមនៃខេត្តសៀមរាប និងក្រុងប៉ោយប៉ែតនៃខេត្តបន្ទាយមានជ័យ ក្នុងការរៀបចំផែនការគ្រប់គ្រងសំរាម សំណល់រឹង ព្រមទាំងបានផ្តល់ការគាំទ្រដល់រដ្ឋបាលក្រុង ស្រុក ចំនួន៤ផ្សេងទៀត រួមមានៈ ក្រុងសិរីសោភ័ណ ស្រុកមង្គលបុរី ស្រុកព្រះនេត្រព្រះ និងស្រុកស្វាយចេកនៃខេត្តបន្ទាយមានជ័យក្នុងការរៀបចំផែនការគ្រប់គ្រងទឹកដែលធន់នឹងការប្រែប្រួលអាកាសធាតុ។ តាមរយៈការអនុវត្តនៃកម្មវិធីនេះ បានផ្តល់ការប្រឹក្សាយោបល់ និងការកសាងសមត្ថភាពដល់រដ្ឋបាលក្រុង ស្រុក ក្នុងការរៀបចំផែនការគ្រប់គ្រងសំរាម សំណល់រឹង ការរៀបចំផែនការគ្រប់គ្រងទឹកដោយគិតពីបម្រែបម្រួលអាកាសធាតុ ព្រមទាំងការរៀបចំនីតិវិធីនៃការវិភាគថវិកាសម្រាប់ប៉ាន់ប្រមាណអំពីចំណូល-ចំណាយពាក់ព័ន្ធនឹងការគ្រប់គ្រងសំរាម សំណល់រឹង និងសេវារដ្ឋបាលរបស់ការិយាល័យច្រកចេញចូលតែមួយ។

តាមរយៈកម្មវិធីទាំងនេះ បានបង្ហាញឱ្យឃើញអំពីការអនុវត្តសិទ្ធិអំណាច និងការធ្វើសេចក្តីសំរេចចិត្តរបស់រដ្ឋបាលក្រុង ស្រុក ក្នុងភាពជាម្ចាស់ក្នុងការអនុវត្តមុខងាររបស់ខ្លួន អនុលោមតាមស្មារតីអនុក្រឹត្យ លេខ១៨២ អនក្រ.បក ចុះថ្ងៃទី០២ ខែធ្នូ ឆ្នាំ២០១៩ ស្តីពីមុខងារ និងរចនាសម្ព័ន្ធរដ្ឋបាលក្រុង និងអនុក្រឹត្យ លេខ១៨៤ អនក្រ.បក ចុះថ្ងៃទី០២ ខែធ្នូ ឆ្នាំ២០១៩ ស្តីពីមុខងារ និងរចនាសម្ព័ន្ធរដ្ឋបាលស្រុក។