រាជធានីភ្នំពេញ៖ ឯកឧត្តម ង៉ាន់ ចំរើន រដ្ឋលេខាធិការ ក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញដឹកនាំកិច្ចប្រជុំលើកដំបូងសម្រាប់ពិនិត្យមើលការអនុវត្តគម្រោងចំនួន ០២ ដែលគម្រោងទី១៖ «គម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ» អនុវត្តដោយលេខាធិការដ្ឋាន គ.ជ.អ.ប. (NCDDS) និងគម្រោងទី២៖ «គម្រោងការផ្សារភ្ជាប់ប្រជាពលរដ្ឋដើម្បីចូលរួមធ្វើឲ្យប្រសើរឡើងនូវសេវាសាធារណៈតាមរយៈការងារគណនេយ្យភាពសង្គម» អនុវត្តដោយអង្គការទស្សនៈពិភពលោក (WVI)។ កិច្ចប្រជុំនេះរៀបចំឡើងតាមរយៈប្រព័ន្ធវីដេអូ កាលពីថ្ងៃ ចន្ទ ១១កើត ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ២៨ ខែកញ្ញា ឆ្នាំ២០២០។
លេខាធិការដ្ឋាន គ.ជ.អ.ប. បានទទួលការគាំទ្រថវិកាពីមូលនិធិបរធនបាលកិច្ច របស់ធនាគារពិភពលោក តាមរយៈគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ។ គម្រោងនេះត្រូវបានចុះហត្ថលេខាលើកិច្ចព្រមព្រៀងហិរញ្ញប្បទាន ដោយរាជរដ្ឋាភិបាល និងធនាគារពិភពលោកនៅថ្ងៃទី១៧ ខែមីនា ឆ្នាំ២០២០។ នៅក្នុងកិច្ចព្រមព្រៀងហិរញ្ញទាននេះ លេខាធិការដ្ឋាន គ.ជ.អ.ប. បានទទួលថវិកាគាំទ្រចំនួន១,៧២ លានដុល្លារអាមេរិក ដើម្បីអនុវត្តសកម្មភាពគណនេយ្យភាពសង្គម ទាំងនៅថ្នាក់ជាតិ និងថ្នាក់ក្រោមជាតិ ដែលមានរដ្ឋបាលឃុំ សង្កាត់ចំនួន៤៦៥ ក្នុងក្រុង ស្រុកចំនួន៥៥ នៃខេត្តចំនួន១០។ គម្រោងត្រូវបានបែងចែកជាសមាសភាពចំនួន០៥ រួមមាន៖
១)តម្លាភាព និងភាពងាយទទួលបានព័ត៌មាននានា
២)ការត្រួតពិនិត្យតាមដានដោយប្រជាពលរដ្ឋ
៣)ការអនុវត្តផែនការសកម្មភាពរួមស្តីពីការងារគណនេយ្យភាពសង្គម (JAAPs)
៤)ការអភិវឌ្ឍសមត្ថភាព និង
៥)ការគាំទ្រ និងការសម្របសម្រួលថ្នាក់ជាតិ និងថ្នាក់ក្រោមជាតិ។
ស្របជាមួយគ្នានេះ អង្គការទស្សនពិភពលោកបានទទួលការគាំទ្រថវិកាពីធនាគារពិភពលោកតាមរយៈគម្រោងការផ្សារភ្ជាប់ប្រជាពលរដ្ឋដើម្បីចូលរួមធ្វើឲ្យប្រសើរឡើងនូវសេវាសាធារណៈតាមរយៈការងារគណនេយ្យភាពសង្គម ចំនួនប្រមាណជា ៤,៧ លានដុល្លារអាមេរិក៕
