ការអនុវត្តការងារ​គណនេយ្យភាពសង្គម​ត្រូវ​បាន​ពង្រីក​ដល់​ស្រុក​ពួក​ហើយ

ខេត្ត​សៀមរាប៖ វគ្គ​បណ្តុះ​បណ្តាល​ ស្តីពី​ការ​អនុវត្តការងារ​គណនេយ្យ​ភាព​សង្គម ដល់​វិស័យទាំងបី​ រួមមាន រដ្ឋបាលឃុំ សាលាបឋមសិក្សា និង​មណ្ឌលសុខភាព ត្រូវបានរៀបចំឡើងនៅ​សាលា​ស្រុក​ពួក ដោយ​​រដ្ឋបាល​ខេត្តសៀមរាបសហការជាមួយរដ្ឋបាលស្រុកពួក​ និង​ការ​សម្រប​សម្រួល​​បច្ចេកទេស​​ពី​​​ក្រុម​ការងារ​​ពី​លេខាធិការដ្ឋាន គ.ជ.អ.ប. ដែល​បានប្រព្រឹត្តទៅកាល​ពី​ថ្ងៃទី ៣-៤ ខែ​កញ្ញា ឆ្នាំ​២០២០ មាន​អ្នកចូលរួម​សរុប​ចំនួន ៨០រូប ស្ត្រីចំនួន ១៦រូប

លោក​ ជេដ្ឋ គីម​ជុង អនុប្រធាន​អង្គភាព​ត្រួតពិនិត្យ វាយតម្លៃ និង​ព័ត៌មាន​ និង​ជា​ប្រធាន​សម្រប​សម្រួល​គម្រោង​​គណនេយ្យភាពសង្គម​ នៃ​លេខាធិការ​ដ្ឋាន​ គ.ជ.អ.ប.​ មាន​ប្រសាសន៍បញ្ជាក់ថា ការ​អនុវត្ត​ការងារ​គណនេយ្យ​ភាព​សង្គមបានអនុវត្ត​រយៈពេល ៤ឆ្នាំ​កន្លងមកហើយ ប៉ុន្តែ​សុ្រកពួក​ជាស្រុកគោលដៅថ្មី​ក្នុង​ឆ្នាំ២០២០ ដែល​ត្រូវ​បាន​ពង្រឹក​ បូក​រួម​ទាំង​ក្រុង​សៀម​រាបផងដែរ។

លោក​ ជេដ្ឋ គីម​ជុង បាន​បន្ថែម​ថា ការ​អនុវត្ត​កិច្ច​ការ​ងារ​នេះ ជាការពង្រឹក​​យន្តការ​នៃ​ការផ្តល់សេវា​នៅ​រដ្ឋបាល​ថ្នាក់​ក្រោមជាតិ​ សម្រាប់​ថ្នាក់​រដ្ឋបាលឃុំទាំងអស់នៅ​ក្នុងស្រុក​ មណ្ឌលសុខភាព និង​សាលាបឋមសិក្សា ហើយ​ត្រូវ​​មាន​យន្ត​ការ​ជាក់លាក់​​ តួយ៉ាង​៖ ទី​១-ត្រូវ​បង្កើត​ ឬកែ​សម្រួល​ក្រុម​ការ​ងារគណនេយ្យ​ភាពសង្គម​​ថ្នាក់​​ខេត្ត និងទី២-ត្រូវ​បង្កើត​ក្រុម​ការងារ​គណនេយ្យភាពសង្គមថ្នាក់​ក្រុង ស្រុក ដែលមាន​សមាសភាពដូចជា អភិបាល ឬអភិបាលរងទទួល​បន្ទុក ឬអ្នក​ពាក់​ព័ន្ធ​ចំណុះ​ឱ្យ​ការិយាល័យ​នានានៅ​ក្នុង​ស្រុក​​ជា​សមាជិក​ ដើម្បី​អនុវត្ត​ការ​ងារ​នេះឱ្យកាន់​តែ​​មានភាព​​ច្បាស់​លាស់ និង​ដោយ​រលូន​។ យើង​ឃើញថារហូតមក​ដល់​ពេល​នេះ ​រដ្ឋបាល​ខេត្ត​សៀម​រាប​បាន​បង្កើត​យន្ត​កា​រទាំងនេះ​រួចហើយ ទើប​បានជា​អាច​រៀបចំវគ្គនេះឡើង។​

លោក ស៊ិន ចាន់ថុល អភិបាលស្រុកពួក ​​មាន​សង្ឃឹម​យ៉ាង​មុត​មាំ​ថា ក្រោយទទួល​​វគ្គ​បណ្តុះ​បណ្តាល​រយៈពេល​ ២ថ្ងៃនេះតទៅ ការអនុវត្ត​តួនាទីភារកិច្ច​ពាក់ព័ន្ធនឹងគណនេយ្យភាពសង្គម​នៅ​តាមបណ្តាឃុំយើងនឹងដំណើរការ​បានកាន់​តែ​ល្អប្រសើរបន្ថែមទៀត៕

ព័ត៌មានថ្មីៗ + បង្ហាញព័ត៌មានទាំងអស់