ខេត្តកំពត៖ នាព្រឹកថ្ងៃ អង្គារ ១២កើត ខែផល្គុន ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៣ ខែកុម្ភៈ ឆ្នាំ២០២១ លេខាធិការដ្ឋាន គ.ជ.អ.ប. បានរៀបចំវគ្គបណ្តុះបណ្តាលគ្រូបង្គោលថ្នាក់ខេត្ត ក្រុង ស្រុក ស្តីពីការអនុវត្តផែនការយុទ្ធសាស្ត្រគណនេយ្យភាពសង្គមនៅខេត្តកំពត ដឹកនាំដោយ លោកស្រី ហេង សិទ្ធា អនុប្រធានអង្គភាពត្រួតពិនិត្យ វាយតម្លៃ និងព័ត៌មាន នៃលេខាធិការដ្ឋាន គ.ជ.អ.ប. ដែលទទួលបានការគាំទ្រថវិកាពីធនាគារពិភពលោក(WB)។
វគ្គបណ្តុះបណ្តាលនេះ មានការចូលរួមពី លោក លោកស្រី តំណាងក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសុខាភិបាល រដ្ឋបាលខេត្តកំពត រដ្ឋបាលខេត្តព្រះសីហនុ តំណាងអង្គការទស្សនៈពិភពលោក (WVI-C) តំណាងអង្គការ RACHA និងអ្នកពាក់ព័ន្ធដ៏ទៃទៀត ប្រមាណជា ២៥រូប ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្តេច តេជោ ហ៊ុន សែន វិធានការការពារ Covid-19 ៣ការពារ និង ៣កុំ។
មានប្រសាសន៍បើកវគ្គបណ្តុះបណ្តាល លោកស្រី ហេង សិទ្ធា អនុប្រធានអង្គភាពត្រួតពិនិត្យ វាយតម្លៃ និងព័ត៌មាន នៃលេខាធិការដ្ឋាន គ.ជ.អ.ប. បានលើកឡើងថា៖ ក្នុងស្ថានភាពនៃការរាតត្បាតនៃជំងឺកូវីត១៩ (Covid-19) ទៅក្នុងសហគមន៍សាជាថ្មី និងជាលើកទី៣ ដែលហៅថា ព្រឹត្តិការណ៍សហគមន៍២០កុម្ភៈ ដោយមានការគិតគូរខ្ពស់ពីថ្នាក់ដឹកនាំនៃលេខាធិការដ្ឋាន គ.ជ.អ.ប. លោកបានសម្រេចចិត្តក្នុងការកាត់បន្ថយចំនួនសិក្ខាកាមពីខេត្តចំនួន០២ គឺខេត្តសៀមរាប និងកំពង់ឆ្នាំង ដែលនឹងត្រូវបណ្តុះបណ្តាលនាពេលក្រោយ គឺក្នុងគោលបំណងអនុវត្តតាមអនុសាសន៍ណែនាំរបស់សម្តេចតេជោ ហ៊ុន សែន (វិធានការ ៣ការពារ និង៣កុំ) និងវិធានការសុវត្ថិភាពរបស់ក្រសួងសុខាភិបាល គឺធ្វើយ៉ាងណារក្សានូវគម្លាតសុវត្ថិភាព ១.៥ ម៉ែត្រ ការពាក់ម៉ាស និងលាងដៃជាប្រចាំដើម្បីបង្ការនូវជំងឺកូវីត១៩ជូនសិក្ខាកាមវគ្គបណ្តុះបណ្តាលទាំងមូល។
វគ្គបណ្ដុះបណ្ដាលនេះមានគោលបំណង ផ្តល់ចំណេះដឹងមូលដ្ឋានអំពី «ផែនការយុទ្ធសាស្ត្រស្តីពីការងារគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ» ដល់គ្រូបង្គោលថ្នាក់ខេត្ត និងថ្នាក់ក្រុង ស្រុក ដើម្បីមានលទ្ធភាពបណ្តុះបណ្តាលបន្តទៅដល់អង្គភាពផ្តល់សេវា អំពី «ផែនការអនុវត្តគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ» ដោយផ្តោតការយកចិត្តទុកដាក់ទៅលើការពង្រឹងភាពងាយស្រួលទទួលបានព័ត៌មាននានា និងព័ត៌មានថវិកា ការត្រួតពិនិត្យតាមដានដោយប្រជាពលរដ្ឋ ការសម្របសម្រួល និងការពង្រឹងសមត្ថភាព និងការប្រមូលមេរៀនបទពិសោធន៍ និងការត្រួតពិនិត្យតាមដាន។
លោកស្រី ហេង សិទ្ធា បានស្នើទៅសិក្ខាកាមទាំងអស់ឱ្យយកចិត្តទុកដាក់តាមដានស្តាប់នូវមេរៀននីមួយៗ ដើម្បីជាទុនដ៏សំខាន់សម្រាប់យកទៅបង្រៀនបន្តដល់រដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាព ដើម្បីអនុវត្តការងារគណនេយ្យភាពសង្គមនេះ ប្រកបដោយគុណភាព និងប្រសិទ្ធភាព។
សូមបញ្ជាក់ថា វគ្គបណ្តុះបណ្តាលគ្រូបង្គោលនេះ ត្រូវបានរៀបចំរយៈពេល០៣ថ្ងៃ ដោយផ្តោតលើមេរៀនសំខាន់ៗដូចខាង៖
- មេរៀនទី១៖ ផែនការយុទ្ធសាស្ត្រគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ
- មេរៀនទី២៖ ផែនការអនុវត្តគណនេយ្យភាពសង្គម
- មេរៀនទី៣៖ តួនាទី និងភារកិច្ចផ្នែកផ្គត់ផ្គង់
- មេរៀនទី៤៖ តួនាទី និងភារកិច្ចផ្នែកតម្រូវការ
- មេរៀនទី៥៖ កញ្ចប់ព័ត៌មានសម្រាប់ប្រជាពលរដ្ឋ
- មេរៀនទី៦៖ ប្រព័ន្ធទិន្នន័យគណនេយ្យភាពសង្គម
- មេរៀនទី៧៖ ដំណើរការត្រួតពិនិត្យតាមដានដោយប្រជាពលរដ្ឋ
- មេរៀនទី៨៖ ការគាំទ្រ និងការតាមដានការអនុវត្តផែនការសកម្មភាពរួមស្តីពីការងារគណនេយ្យភាពសង្គមដោយគណៈកម្មាធិការ JAAP
- មេរៀនទី៩៖ ការប្តេជ្ញាចិត្តផ្នែកបរិស្ថាន និងសង្គម
- មេរៀនទី១០៖ នីតិវិធីហិរញ្ញវត្ថុនៃគម្រោង ISAF
- ការរៀបចំផែនការសម្រាប់ការអនុវត្ត៕
